Ebangedi ya Mareka 5:1-43
5 Ke moka ba fihla ka mošola wa lewatle nageng ya Bagerasa.+
2 Ge Jesu a se na go tšwa ka sekepeng, o ile a kopana le monna yo a bego a laolwa ke letemona* a etšwa mabitleng.
3 O be a dula mabitleng gomme go ba go fihla ka nako yeo, go be go se na motho yo a kilego a kgona go mo tlema a mo tiiša gaešita le ka ketane.
4 O be a kile a tlengwa maoto le matsogo ka diketane gantši, eupša o be a kgaola diketane tšeo ebile go be go se na motho yo a bego a na le maatla a go mo fenya.
5 O be a dula a goeletša bošego le mosegare a le mabitleng le dithabeng gomme a ikgatla ka maswika.
6 Eupša ge a bona Jesu a sa le kgole a mo kitimela a mo khunamela.+
7 Ke moka a goeletša ka lentšu la godimo a re: “O tlile go dira eng mo wena Jesu Morwa wa Modimo yo Godimodimo? Ke go eniša ka Modimo gore o se ke wa ntlaiša.”+
8 Ka gobane Jesu o be a botša letemona leo a re: “Etšwa go motho yo, wena letemona.”+
9 Eupša Jesu a mmotšiša a re: “Leina la gago ke wena mang?” Yena a re go Jesu: “Leina la ka ke nna Madira ka gobane re ba bantši.”
10 Ke moka monna yoo a dulela go kgopela Jesu gore a se ke a raka matemona ao nageng yeo.+
11 Bjale mohlape o mogolo wa dikolobe+ o be o le moo thabeng o fula.+
12 Ka gona matemona ao a mo kgopela a re: “Re rakele mohlapeng wa dikolobe gore re tsene go tšona.”
13 A a dumelela. Ke moka a tšwa a tsena dikolobeng, gomme mohlape woo wa dikolobe wa kitimela legageng wa napa wa wela ka lewatleng. E be e le dikolobe tše e ka bago tše 2 000, ka moka ga tšona di ile tša kgangwa ke meetse.
14 Eupša badiši ba tšona ba ile ba tšhaba ba ya ba botša batho bao ba dulago motseng woo le bao ba dulago go o dikologa ka taba yeo, ke moka batho bao ba tla ba bona seo se diragetšego.+
15 Ka gona, ba ile ba tla go Jesu gomme ba bona monna yoo a bego a na le letemona leo mathomong le ilego la ipitša gore ke lona Madira. Monna yoo o be a dutše ebile a apere diaparo gomme monagano wa gagwe o boetše sekeng. Ke moka ba tšhoga kudu.
16 Le gona, batho bao ba bonego seo ba ile ba ba hlalosetša ka seo se diragaletšego monna yoo a bego a ntšhitšwe letemona le seo se diragaletšego mohlape wa dikolobe.
17 Ka gona ba thoma go mo kgopela gore a tloge tikologong ya bona.+
18 Bjale ge a namela sekepe, monna yo a bego a ntšhitšwe letemona o ile a mo kgopela go sepela le yena.+
19 Eupša a se mo dumelele, go e na le moo, o ile a re go yena: “Eya gae go batho ba geno, gomme o ba botše dilo ka moka tšeo Jehofa* a go diretšego tšona le kamoo a go gaugetšego ka gona.”
20 Ke moka monna yoo a tloga a thoma go botša batho ba Dekapoli* dilo ka moka tšeo Jesu a mo diretšego tšona, gomme batho bao ka moka ba makala.
21 Le gona, ka morago ga ge Jesu a ile lebopong leo le lego ka mošola wa lewatle ka sekepe, lešaba le legolo le ile la mo kgobokanela ge a be a le moo.+
22 Yo mongwe wa baetapele ba sinagoge, yoo leina la gagwe e bego e le Jairo, o ile a tla gomme a re ge a bona Jesu, a khunama pele ga gagwe.+
23 O ile a mo kgopela ka makga a mantši a re: “Morwedi wa ka yo monyenyane o babja kudu. Ke kgopela gore o tle o mo fodiše*+ e le gore a phele.”
24 Ka gona, Jesu a mo latela. Lešaba le legolo le be le mo šetše morago ebile le mo pitlaganya.
25 Bjale go be go na le mosadi yo a bego a swerwe ke bolwetši bja go ya matšatšing a sa fetše*+ ka mengwaga e 12.+
26 O ile a kgotlelela bohloko ge dingaka tše dintši di be di mo alafa. O ile a šomiša tšhelete ya gagwe ka moka ka ge a be a nyaka go alafiwa, eupša ga se a ka a kaonefala, go e na le moo o ile a babja le go feta.
27 Ge a ekwa dilo tšeo batho ba di bolelago ka Jesu, o ile a tla ka morago ga gagwe a le lešabeng gomme a kgwatha seaparo sa gagwe sa ka ntle,+
28 ka gobane o be a duletše gore: “Ge nka no kgwatha diaparo tša gagwe tša ka ntle, ke tla fola.”+
29 Gateetee, bolwetši bjoo bo bego bo mo swere bja fola, gomme le yena a ikwa mo mmeleng wa gagwe gore o fodile bolwetši bjoo bjo bohloko.
30 Ka yona nako yeo, Jesu a lemoga gore maatla+ a tšwile go yena, ke moka a retologa a lebelela lešaba a re go lona: “Ke mang yo a kgwathilego diaparo tša ka tša ka ntle?”+
31 Eupša barutiwa ba gagwe ba re go yena: “O a bona gore lešaba le le go pitlagantše, eupša o botšiša gore: ‘Ke mang yo a nkgwathilego?’”
32 O be a lebelela mahlakore ka moka gore a bone yo a bego a mo kgwathile.
33 Eupša ka ge mosadi yoo a be a tseba seo se bego se mo diragaletše, o ile a tla a khunama pele ga gagwe a mmotša dinnete ka moka a tšhogile ebile a thothomela.
34 Jesu a re go yena: “Morwedi wa ka, tumelo ya gago e go fodišitše. Sepela ka khutšo+ gomme o fole bolwetši bja gago bjo bohloko.”+
35 A re a sa bolela, gwa tla banna ba bangwe bao ba tšwago legaeng la Jairo e lego moetapele wa sinagoge, ba re: “Morwedi wa gago o hlokofetše! Ke ka baka la eng o sa tshwenya Morutiši?”+
36 Eupša Jesu a utswa ka tsebe seo se bego se bolelwa gomme a re go Jairo: “O se ke wa tšhoga, wena e no bontšha tumelo feela.”+
37 Eupša ga se a ka a dumelela motho gore a mo šale morago ka ntle le Petro, Jakobo le Johane ngwanabo Jakobo.+
38 Ka gona, ba fihla ntlong ya moetapele wa sinagoge, gomme Jesu a kwa batho bao ba tladitšego lešata le bao ba bego ba lla ebile ba goeletša gabohloko.+
39 Eitše ge Jesu a tsene, a re go bona: “Ke ka baka la eng le lla gabohloko ebile le bakile tlhakatlhakano? Ngwana yo ga se a hlokofala, eupša o robetše.”+
40 Ge a realo, ba thoma go mo sega ka lenyatšo. Eupša ka morago ga gore a ba ntšhetše ka ntle ka moka, a tšea tatago ngwana yoo le mmagwe le bao ba bego ba na le yena, a tsena ka moo ngwana yoo a bego a le ka gona.
41 Ke moka, ge a se na go swara seatla sa ngwana yoo, o ile a re go yena: “Talitha kumi,” yeo e bolelago gore: “Mosetsana, ke re go wena, tsoga!”+
42 Mosetsana yoo a napa a tsoga ka yona nako yeo gomme a thoma go sepela. (O be a na le mengwaga e 12.) Ka morago ga moo, batswadi ba mosetsana yoo ba ile ba thaba kudu moo ba ilego ba palelwa ke go itshwara.
43 Eupša a ba laela ka makga a mantši gore ba se botše motho ka taba yeo+ gomme a re mosetsana yoo a fiwe sa go ja a je.
