Ebangedi ya Mareka 8:1-38
8 Matšatšing ao, lešaba le legolo le ile la kgobokana gape ebile le se sa na dijo. Ka gona a bitša barutiwa ba gagwe a re go bona:
2 “Ke kwela batho ba bohloko,+ ka gobane e šetše e le matšatši a mararo ba na le nna ebile ga ba na sa go ja.+
3 Ge nka ba bušetša magaeng a bona ba swerwe ke tlala ba tla felelwa ke maatla tseleng ebile ba bangwe ba bona ba tšwa kgole.”
4 Eupša barutiwa ba gagwe ba re go yena: “Motho o tla hwetša kae dinkgwa tše di lekanego lefelong le leo le lego kgole le batho e le gore batho ba ba je ba khore?”
5 Ke moka Jesu a ba botšiša a re: “Le na le dinkgwa tše kae?” Ba re: “Tše šupago.”+
6 Ke moka a laela lešaba gore le dule fase. Ka gona a tšea dinkgwa tšeo tše šupago gomme a rapela, a di ngwathaganya, a thoma go di nea barutiwa ba gagwe gore ba di nee lešaba ke moka bona ba di nea lešaba leo.+
7 Le gona ba be ba na le dihlapi tše sego kae tše dinyenyane, ge a se na go di rapelela o ile a botša barutiwa ba gagwe gore le tšona ba di fe lešaba.
8 Ka gona ba ile ba ja, ba khora gomme barutiwa ba kgoboketša marathana ao a šetšego ba tlatša mebanki e megolo e šupago.+
9 Go be go na le banna bao e ka bago ba 4 000. Ke moka a ba kgopela gore ba sepele.
10 A napa a namela sekepe le barutiwa ba gagwe a tla tikologong ya Dalamanutha.+
11 Ge a le moo Bafarasei ba tla gomme ba thoma go mo ngangiša. Ba mmotša gore a ba bontšhe mohlolo wo o tšwago legodimong e le gore ba mo leke.+
12 Ka gona Jesu a kwa bohloko kudu, a re: “Ke ka baka la eng moloko wo o nyaka go bona mohlolo?+ Ruri ke le botša gore ga go na mohlolo wo moloko wo o tlago go o bona.”+
13 Ge a realo a ba tlogela, a namela sekepe gape a ya lebopong la ka lehlakoreng le lengwe la lewatle.
14 Eupša ba be ba lebetše go tšea dinkgwa. Ba be ba se ba swara dijo eupša ba be ba na le senkgwa se setee feela ka sekepeng.+
15 A ba botša tsebe-go-kwa a re: “Dulang le butše mahlo. Hlokomelang komelo* ya Bafarasei le komelo ya Heroda.”+
16 Ka gona ba thoma go ngangišana ka taba ya gore ba be ba se na senkgwa.
17 Ge a lemoga seo a re go bona: “Ke ka baka la eng le ngangišana ka taba ya gore ga le na senkgwa? Na ga se la tšwa le kwešiša seo ke le botšago sona? Na menagano ya* lena e sa thatafalelwa ke go kwešiša?
18 ‘Na ga le bone gaešita le ge le na le mahlo? Le gona na ga le kwe gaešita le ge le na le ditsebe?’ Na le sa gopola
19 gore nakong ya ge ke ngwathaganya dinkgwa tše hlano+ gore di fiwe banna ba 5 000 le ile la tlatša mebanki e mekae ka marathana ao le a kgobokeditšego?” Ba re go yena: “Mebanki e 12.”+
20 “Ge ke be ke ngwathaganya dinkgwa tše šupago gore di fiwe banna ba 4 000 le ile la tlatša mebanki e mekae ka marathana ao le a kgobokeditšego?” Ke moka ba re go yena: “E šupago.”+
21 Ge ba realo a re go bona: “Na le gona bjale ga se la tšwa le kwešiša?”
22 Bjale ba fihla Betsaida. Ge ba le moo batho ba ile ba tlišetša Jesu monna wa sefofu gomme ba mo kgopela gore a mo kgwathe.+
23 A swara monna yoo wa sefofu ka seatla gomme a mo ntšhetša ka ntle ga motsana. Ka morago ga ge a tshwetše mare mahlong a gagwe,+ o ile a bea diatla godimo ga gagwe a re: “Na go na le seo o se bonago?”
24 Monna yoo a lebelela gomme a re: “Ke bona batho ba sepela eupša ba bonagala eka ke mehlare.”
25 Ke moka a bea diatla tša gagwe gape mahlong a monna yoo. Monna yoo a fola gomme a bona dilo ka moka gabotse.
26 Ka gona a mmotša gore a ye gae, a re: “O se ke wa tsena motsaneng.”
27 Bjale Jesu le barutiwa ba gagwe ba tloga ba ya metsaneng ya Kesarea Filipi, ge ba le tseleng a botšiša barutiwa ba gagwe a re: “Batho ba re ke nna mang?”+
28 Ba re go yena: “Ba re ke wena Johane Mokolobetši,+ eupša ba bangwe ba re ke wena Eliya+ gomme ba bangwe ba re o yo mongwe wa baporofeta.”
29 Ke moka a botšiša bona a re: “Bjale lena le re ke nna mang?” Petro a re go yena: “Ke wena Kriste.”+
30 Ge Petro a realo, Jesu a ba botša tsebe-go-kwa gore ba se ke ba botša motho ka yena.+
31 Le gona, a thoma go ba ruta gore Morwa wa motho o swanetše go tlaišwa kudu, a be a ganwe ke banna ba bagolo, baperisita ba bagolo le ditsebi tša molao, gomme a bolawe+ ke moka a tsoge ka morago ga matšatši a mararo.+
32 Ruri o be a bolela seo ka mo go kwagalago. Eupša Petro a mo iša ka thoko a thoma go mo kgalemela.+
33 Ke moka Jesu a retologa, a lebelela barutiwa ba gagwe gomme a kgalemela Petro, a re: “Ntlogele Sathane! Ka gobane o nagana dikgopolo tša batho e sego tša Modimo.”+
34 Bjale a bitša lešaba gore le tle go yena le barutiwa ba gagwe, a re: “Ge e ba motho le ge e le ofe a nyaka go ntšhala morago, anke a se sa hlwa a iphelela eupša a a rwale kota ya gagwe ya tlhokofatšo* gomme a tšwele pele a ntšhala morago.+
35 Ka gobane motho le ge e le ofe yo a lekago go phološa bophelo bja gagwe o tla bo loba, eupša motho le ge e le ofe yo a lobago bophelo bja gagwe ka baka la ka le ka baka la ditaba tše dibotse tša Modimo, o tla bo hwetša.+
36 Ge e le gabotse motho o holega ka eng ge a ka hwetša dilo ka moka tšeo di lego mo lefaseng eupša a loba bophelo bja gagwe?+
37 Ge e le gabotse motho a ka dira eng gore a reke bophelo bja gagwe?+
38 Ka gobane gare ga moloko wo wa go se botegele Modimo* le wa sebe, motho le ge e le ofe yo a hlabjago ke dihlong ka baka la ka le ka baka la mantšu a ka, Morwa wa motho le yena o tla hlabja ke dihlong ka baka la gagwe+ ge a etla a na le maatla ao* Tatagwe a mo filego ona a na le barongwa ba bakgethwa.”+
Mengwalo ya Tlase
^ Bona Tlhaloso ya Mantšu.
^ Phetolelo ya lentšu ka lentšu e re, “dipelo tša.”
^ Bona Tlhaloso ya Mantšu.
^ Phetolelo ya lentšu ka lentšu e re, “wa go hlotlola.”
^ Phetolelo ya lentšu ka lentšu e re, “letago leo.”
