Ebangedi ya Mareka 2:1-28
2 Ka morago ga matšatši a sego kae, Jesu o ile a ya Kaperenaume gape gomme batho ba kwa gore o ka gae.+
2 Batho ba bantši ba ile ba tlala ka ntlong moo go ilego gwa hlokwa le moo go ka tshwelwago mare. Ba be ba thibile le lebati gomme a thoma go ba botša lentšu la Modimo.+
3 Batho ba bangwe ba mo tlišetša monna yo a bego a robetše bolaong a sa kgone go tsoga yoo a bego a rwelwe ke banna ba bane.+
4 Eupša ka ge lešaba le be le tletše, ba be ba sa kgone go mo tliša go Jesu. Ba ile ba phula lešoba tlhakeng ya ntlo go lebana le moo Jesu a bego a le gona gomme ba theoša bolao bjoo monna yoo a bego a robetše go bjona.
5 Ge Jesu a bona tumelo ya bona+ a re go monna yoo: “Ngwanaka, o lebaletšwe dibe tša gago.”+
6 Bjale go be go na le ba bangwe ba ditsebi tša molao, ba dutše gomme ba bolela ka dipelong tša bona ba re:+
7 “Ke ka baka la eng monna yo a bolela ka tsela ye? O roga Modimo. Ga go na motho yo a ka lebalelago dibe ge e se Modimo feela.”+
8 Eupša kapelapela ge Jesu a lemogile gore ba nagana bjalo ka dipelong tša bona, a re go bona: “Ke ka baka la eng le nagana dilo tša go swana le tše ka dipelong tša lena?+
9 Go bonolo go botša motho yo a sa kgonego go tsoga gore: ‘Dibe tša gago di lebaletšwe,’ eupša na go na le motho yo a ka rego go monna yo: ‘Emelela o tšee bolao bja gago o sepele,’ gomme monna yo a emelela a sepela?
10 Eupša e le gore le tsebe gore Morwa wa motho+ o na le maatla a go lebalela dibe lefaseng . . .”+ a botša monna yoo a bego a robetše bolaong ebile a sa kgone go tsoga a re:
11 “Ke re go wena: Tsoga o tšee bolao bja gago o ye gae.”
12 Ka yona nako yeo, a emelela a tšea bolao bja gagwe gomme a tšwa pele ga bona ka moka. Ka moka ga bona ba ile ba šala ba maketše gomme ba tumiša Modimo ba re: “Ga se ra ka ra bona selo sa go swana le se.”+
13 A buša a ya kgauswi le lewatle gape, lešaba ka moka la dulela go tla go yena, gomme yena a thoma go le ruta.
14 Eupša ge a dutše a tšwela pele ka leeto, o ile a bona Lefi morwa wa Alifeose a dutše ofising yeo go patelwago motšhelo go yona, a re go yena: “Eba morutiwa wa ka.” Ke moka Lefi a napa a emelela a mo latela.+
15 Nakong ya ge Jesu a be a dutše tafoleng ka ntlong ya Lefi, batho ba bantši ba go patediša metšhelo le badiradibe ba be ba dutše le Jesu le barutiwa ba gagwe tafoleng. Ba bantši ba bona e ile ya ba balatedi ba gagwe.+
16 Eupša ge ditsebi tša molao le Bafarasei ba be ba bona gore o be a eja le badiradibe le batho ba go patediša metšhelo, ba re go barutiwa ba gagwe: “Na o ja le batho ba go patediša metšhelo le badiradibe?”
17 Ge Jesu a ekwa seo a re go bona: “Bao ba phetšego gabotse mmeleng ga ba hloke ngaka, eupša bao ba babjago ba a e hloka. Ga se ka tlela go bitša baloki, eupša ke tletše go bitša badiradibe.”+
18 Le gona, barutiwa ba Johane le Bafarasei ba be ba tlwaetše go ikona dijo. Ka gona, ba ile ba ya go Jesu gomme ba re go yena: “Ke ka baka la eng rena barutiwa ba Johane le barutiwa ba Bafarasei re tlwaetše go ikona dijo eupša barutiwa ba gago bona ba sa dire bjalo?”+
19 Ka gona Jesu a re go bona: “Na bagwera ba monyadi+ ba na le lebaka la go ikona dijo ge monyadi a sa na le bona? Ge feela monyadi a sa na le bona ba ka se ikone dijo.
20 Eupša go tla tla matšatši ao monyadi a tlago go tlošwa go bona,+ gomme ba tla ikona dijo ka letšatši leo.
21 Ga go yo a rokelelago segaswa* godimo ga seaparo sa ka ntle sa kgale, ka gobane ge a ka dira bjalo, segaswa seo se tla nganga seaparo seo gomme sa gagoga le go feta.+
22 Le gona ga go yo a bolokago beine e mpsha ka mapotlelong a kgale a mokgopa a beine. Ge a ka dira bjalo, beine yeo e tla dira gore mapotlelo ao a mokgopa a palege, ke moka a loba beine gotee le mapotlelo ao. Eupša beine e mpsha e bolokelwa ka mapotlelong a maswa a mokgopa a beine.”
23 Bjale ge Jesu a be a feta ka gare ga mašemo a korong ka Sabatha, barutiwa ba gagwe ba ile ba thoma go kga korong yeo ge ba dutše ba sepela.+
24 Ka gona, Bafarasei ba re go yena: “Bona gore ba dira eng! Ke ka baka la eng ba dira selo seo molao o sa dumelego gore se dirwe ka Sabatha?”
25 Eupša a re go bona: “Na ga se la ka la bala seo Dafida a ilego a se dira ge a be a hloka dijo, nakong ya ge yena le banna bao ba bego ba na le yena ba swerwe ke tlala?+
26 Na ga se la ka la bala pego ya moperisita yo mogolo Abiathara,+ yeo e bontšhago kamoo Dafida a ilego a tsena ka ntlong ya Modimo gomme a ja dinkgwa tšeo di neetšwego Modimo,* a ba a fa le banna bao ba bego ba na le yena? Go ya ka molao go be go se na motho yoo a bego a dumeletšwe go ja dinkgwa tšeo ka ge e be e le baperisita feela+ bao ba bego ba dumeletšwe go di ja.”
27 Ke moka a re go bona: “Sabatha e bile gona e le gore motho a tle a holege,+ eupša motho o be a se a bopelwa gore a tle a boloke Sabatha.
28 Ka gona, Morwa wa motho ke yena Morena gaešita le wa Sabatha.”+
