Ebangedi ya Mareka 4:1-41
4 Le gona, o ile a thoma go ruta batho kgauswi le lewatle gomme lešaba le legolo kudu la mo kgobokanela. Ka gona a namela sekepe a dula ka gare ga sona ke moka a ya kgojana le lebopo eupša lešaba ka moka le be le le lebopong kgauswi le lewatle.+
2 A thoma go le ruta dilo tše dintši a diriša dipapišo.+ Ge a dutše a le ruta, o ile a re:+
3 “Theetšang! Mobjadi o ile a tšwa a yo bjala peu.+
4 Ge a dutše a bjala, peu e nngwe ya wela kgauswi le tsela gomme dinonyana tša tla tša eja tša e fetša.
5 E nngwe e ile ya wela lekgwareng, moo go bego go se na mobu o montši. Gateetee e ile ya mela ka ge mobu o be o sa iše fase.+
6 Eupša ge letšatši le hlaba, dimelana tšeo di ile tša swa tša omelela ka baka la ge di be di se na medu.
7 E nngwe e ile ya wela meetlweng gomme meetlwa ya gola ya khupetša dimelana tšeo ke moka tša se tšweletše dienywa.+
8 Eupša e nngwe e ile ya wela mobung o mobotse, ya tšweletša dimelana ke moka dimelana tšeo tša gola, gomme tša thoma go tšweletša dienywa tše dintši kudu. Tše dingwe tša tšweletša go feta ga 30, tše dingwe go feta ga 60 gomme tše dingwe tša tšweletša go feta ga 100.”+
9 Ke moka a re: “Anke yo a nago le tsebe, a kwe.”+
10 Bjale ge a be a le noši, batho bao ba bego ba mo dikologile ba na le baapostola ba gagwe ba 12 ba thoma go mmotšiša ka dipapišo tšela.+
11 A re go bona: “Modimo o le dumeletše gore le kgone go kwešiša sephiri se sekgethwa+ sa Mmušo wa magodimo, eupša batho ba bangwe ka moka ke ba rutile dilo ka moka ke diriša dipapišo,+
12 e le gore le ge ba lebelela ba tla lebelela eupša ba ka se bone. Le ge ba ekwa, ba tla no kwa eupša ba ka se kwešiše ebile ba ka se ke ba boela go Modimo gore a ba lebalele.”+
13 Le gona, o ile a re go bona: “Ga le kwešiše gore papišo ye e ra goreng, bjale le ka kwešiša bjang dipapišo tše dingwe ka moka?
14 “Mobjadi o bjala lentšu.+
15 Batho ba bangwe ba swana le peu yeo e bjetšwego kgauswi le tsela, ge ba se na go kwa lentšu, Sathane o a tla+ gomme a tumola lentšu leo le bjetšwego dipelong tša bona.+
16 Batho ba bangwe ba swana le peu yeo e bjetšwego lekgwareng. Ge ba se na go kwa lentšu, ba le amogela ka lethabo.+
17 Eupša le ge lentšu leo le se la tsema medu dipelong tša bona, ba tšwela pele ba le dumela ka nakwana. Eupša ge ba se na go welwa ke mathata goba tlaišego ka baka la lentšu leo, ba tlogela go le dumela.
18 Go sa na le peu e nngwe yeo e bjetšwego meetlweng. Yona ke batho bao ba kwelego lentšu,+
19 eupša dipelaelo+ tša bophelo lefaseng* le gotee le tshepišo ya maaka ya gore mahumo+ a a šireletša le dikganyogo+ tše di fapafapanego tšeo ba nago le tšona, di tsena dipelong tša bona gomme tša kgama lentšu leo ke moka la se be le dienywa.
20 Peu yeo e bjetšwego mobung o mobotse ke batho bao ba kwelego lentšu gomme ba le amogela ke moka ba tšweletša dienywa tše dintši kudu. Ba bangwe ba tšweletša go feta ga 30, ba bangwe ba tšweletša go feta ga 60 gomme ba bangwe ba tšweletša go feta ga 100.”+
21 A buša a re go bona: “Na lebone le tlišetšwa go bewa ka fase ga tafola* goba ka fase ga mpete? Na ga le tlišetšwe go bewa godimo ga sehlomelalebone?+
22 Ga go na selo seo se utilwego seo se ka se utollwego. Le gona ga go na selo seo se utilwego ka kelohloko seo se ka se tšweletšwego pele ga batho.+
23 Anke mang le mang yo a nago le ditsebe, a kwe.”+
24 A buša a re go bona: “Elang hloko seo le se kwago.+ Sekala seo le kalago ka sona, le lena le tla kalelwa ka sona ebile le tla okeletšwa go feta ka mo le letetšego ka gona.
25 Mang le mang yo a nago le selo o tla fiwa dilo tše dintši,+ eupša mang le mang yo a se nago selo, gaešita le se a nago le sona o tla se tšeelwa.”+
26 Ka gona, a tšwela pele a re go bona: “Mmušo wa Modimo o ka swantšhwa le motho yo a bjalago peu mobung.
27 Letšatši le lengwe le le lengwe o ya go robala bošego ke moka a tsoga mesong. Ka nako yeo, peu ya mela gomme dimelana tšeo tša gola ya ba tše ditelele. Gore seo se diragetše bjang ga a tsebe.
28 Mobu o dira gore peu e mele ganyenyane-ganyenyane, peu yeo e thoma ka go tšweletša ntlhana ke moka ya ntšha hlogwana. Mafelelong gwa tšwelela dithoro tšeo di tletšego hlogwaneng.
29 Eupša ge sebjalo seo se se na go butšwa, o se buna ka sekela ka gobane nako ya puno e fihlile.”
30 Ke moka a tšwela pele a re: “Mmušo wa Modimo re ka o bapiša le eng goba re ka o hlalosa ka papišo efe?
31 O swana le thoro ya mohlare wa mosetata yeo nakong ya ge e be e bjalwa mobung e bego e le e nyenyane-nyenyane go feta dipeu ka moka mo lefaseng,+
32 eupša ge e bjetšwe, e a mela gomme ya gola ya ba mohlare o mogolo. Wa ntšha makala a magolo e le gore dinonyana di kgone go dula moriting wa wona.”
33 O be a ba ruta lentšu la Modimo a diriša dipapišo.+ Le gona o be a nagana ka seo ba bego ba ka kgona go se kwešiša.
34 Ge e le gabotse, o be a sa bolele le bona ka ntle le go diriša dipapišo, eupša barutiwa ba gagwe o be a ba hlalosetša dilo ka moka ka sephiring.+
35 Letšatšing leo, ge e šetše e le mantšiboa, o ile a re go bona: “A re yeng ka mošola wa lewatle.”+
36 Ka gona, ge barutiwa ba gagwe ba se na go phatlalatša lešaba, ba ile ba mo tšea ka sekepe ba ya le yena ka mošola wa lewatle. Le gona go be go na le dikepe tše dingwe tšeo di bego di sepela le yena.+
37 Bjale go ile gwa tsoga ledimo le legolo le lešoro ke moka maphoto a lewatle a thoma go betha sekepe moo sekepe se bego se le kgauswi le go tlala ka meetse.+
38 Eupša o be a le moseleng wa sekepe, a robetše a sametše mosamelo. Ka gona, ba tla ba mo tsoša ba re: “Morutiši, na ga o na taba le gore re kgauswi le go hwa?”
39 Ge ba realo, a tsoga a kgalemela phefo gomme a re go lewatle: “Homola o re tuu!”+ Ke moka phefo yeo ya ema. Lewatle le lona la homola la re tuu!
40 Ke moka a re go bona: “Ke ka baka la eng le tšhogile? Na ga se la hlwa le eba le tumelo?”
41 Eupša ba kwa ba boifa kudu gomme ba boledišana ba re: “Gabotsebotse motho yo ke mang? O kwewa le ke diphefo le lewatle.”+
Mengwalo ya Tlase
^ Phetolelo ya lentšu ka lentšu e re, “tshepedišong ye ya dilo.” Bona Tlhaloso ya Mantšu.
^ Goba, “ka fase ga mmanki.”
