Ebangedi ya Mareka 13:1-37
13 Ge Jesu a etšwa tempeleng, yo mongwe wa barutiwa ba gagwe o ile a re go yena: “Morutiši, bona gore maswika a le meago ye di botse bjang!”+
2 Eupša Jesu a re go yena: “Na o a e bona meago ye e mebotse? Maswika a a lego mo a tlo wišwa, ebile ga go le le letee leo le tlago go tlogelwa le le godimo ga le lengwe le se la wišwa.”+
3 Ge Jesu a be a dutše Thabeng ya Mehlware a lebane le tempele, Petro, Johane, Jakobo le Andrea ba ile ba mmotšiša ka sephiring ba re:
4 “Re botše gore dilo tše di tlo direga neng, le gore re tlo bona ka eng gore dilo ka moka tšeo di diregago mo lefaseng di kgauswi le go fela?”+
5 Ka gona, Jesu a re go bona: “Le hlokomeleng gore go se be le motho yo a le forago.+
6 Ba bantši ba tla tla ba diriša leina la ka ba re: ‘Ke nna Kriste,’ gomme ba tla timetša ba bantši.
7 Le gona ge le ekwa ka dintwa mafelong a fapafapanego, le se ke la tšhoga. Dilo tše di swanetše go direga, eupša e tla be e se ya hlwa e e ba bofelo.+
8 “Ka gobane setšhaba se tla lwa le setšhaba se sengwe gomme mmušo wa lwa le mmušo o mongwe.+ Go tla ba le ditšhišinyego tša lefase lefelong le lengwe ka morago ga le lengwe ebile go tla ba le tlhaelelo ya dijo.+ Dilo tše ka moka e tla ba e le mathomo a dinako tšeo di kwešago bohloko kudu.+
9 “Lena itlhokomeleng. Batho ba tla le iša dikgorong tša tsheko.+ Le tla bethwa disinagogeng+ la ba la emišwa pele ga babuši le dikgoši ka baka la ka gomme seo se tla le fa sebaka sa gore le ba botše ka seo le se dumelago.+
10 Le gona ditaba tše dibotse di swanetše go bolelwa pele ditšhabeng ka moka.+
11 Ge ba le iša go balaodi ba mebušo, le se ke la tshwenyega ka gore le tlo reng. Eupša seo le tlago go se fiwa ka nako yeo, le bolele sona ka gobane go tla be go sa bolele lena eupša go bolela moya o mokgethwa.+
12 Go feta moo, motho o tla dira gore ngwanabo a bolawe. Tate le yena o tla dira gore ngwana wa gagwe a bolawe gomme bana ba tla fetogela batswadi ba bona gomme ba dira gore ba bolawe.+
13 Batho ka moka ba tla le hloya ka baka la leina la ka,+ eupša yo a kgotlelelago* go fihla mafelelong+ o tla phološwa.+
14 “Le ge go le bjalo, ge le bona selo seo se šišimišago seo se senyago+ se eme mo se sa swanelago go ema gona, (anke mmadi a diriše temogo), bao ba lego Judea ba thome go tšhabela dithabeng.+
15 Anke motho yo a lego ka godimo ga ntlo a se ke a fologa goba a tsena ka ntlong gore a tšee dilo tšeo di lego ka ntlong ya gagwe,
16 le gona anke motho yo a lego mašemong a se ke a boela morago e le ge a eya go tšea seaparo sa gagwe sa ka ntle.
17 Ruri basadi ba baimana le bao ba nyantšhago mehleng yeo, e tla ba ba madimabe!+
18 Dulang le rapela gore nakong ya ge le tšhaba e se ke ya ba e le marega,
19 ka gobane nako yeo e tla ba e le nako ya masetlapelo a magolo+ ao a sa kago a ba gona ga e sa le ge Modimo a bopa motho go fihla ka nako yeo ebile a ka se sa hlwa a e ba gona gape.+
20 Ge e le gabotse, ge nkabe Jehofa a se a fokotša matšatši ao, go be go ka se be le motho yo a ka phološwago, eupša Modimo o fokoditše matšatši ao e le gore bakgethwa ba phološwe.+
21 “Bjale, ge e ba motho yo mongwe a ka re go lena: ‘Bonang! Kriste šo,’ goba a re: ‘Kriste ke yola!’ Le se ke la tshepa.+
22 Ka gobane go tla ba le boKriste ba maaka+ le baporofeta ba maaka gomme ba tla dira mehlolo e mentši e le gore ge e ba go kgonega ba timetše bakgethwa ba Modimo.
23 Ka gona, lena hlokomelang.+ Ke le boditše dilo ka moka e sa le pele.
24 “Eupša mehleng yeo, ka morago ga masetlapelo, letšatši le tla swifala, gomme ngwedi wa se ntšhe seetša sa wona,+
25 ke moka dinaledi tša wa legodimong gomme dilo tše maatla tšeo di lego magodimong tša šišinywa.
26 Ke moka ba tla bona Morwa wa motho+ a etla ka maru a legodimo a na le maatla a magolo le letago.+
27 Ke moka o tla roma barongwa gomme ba kgoboketša bakgethwa ba gagwe go tšwa mahlakoreng a mane a lefase,* go tloga moo lefase le thomago gona go fihla moo legodimo le felelago gona.+
28 “Bjale ithuteng papišong ye ya mogo: Gateetee ge lekalana la wona le eba boleta gomme le hloga matlakala, le tseba gore selemo se batametše.+
29 Ka mo go swanago, ge le bona dilo tše di direga, le tsebe gore Morwa wa motho o kgauswi, ge e le gabotse o eme mejakong.+
30 Ruri ke le botša gore moloko wo o ka se hlokofale ka moka go fihla ge dilo tše ka moka di direga.+
31 Legodimo le lefase di tla fela,+ eupša mantšu a ka a tla dula a le gona.+
32 “Ge e le letšatši leo le iri, ga go yo a di tsebago. Barongwa bao ba lego legodimong le Morwa le bona ga ba di tsebe, eupša di tsebja ke Tate a nnoši.+
33 Dulang le lebeletše,+ dulang le phafogile, ka gobane ga le tsebe gore nako e beilwego e neng.+
34 Se se swana le motho yo a yago nageng ya kgole yo a tlogetšego ntlo ya gagwe gomme a fa bahlanka ba gagwe+ maikarabelo a gore ba šale ba e hlokometše. A fa yo mongwe le yo mongwe mošomo wa gagwe gomme a laela motho yoo a letago mojako gore a dule a phafogile.+
35 Ka gona, dulang le phafogile ka gobane ga le tsebe nako yeo Mong wa ntlo a tlago ka yona.+ Mohlomongwe a ka tla mantšiboa goba bošegogare goba e sa le mesong,+
36 e le gore ge a ka fihla le se la mo letela, a se ke a hwetša le sa robetše.+
37 Eupša seo ke le botšago sona ke se botša le batho ka moka ke re: Dulang le phafogile.”+
