Ebangedi ya Luka 21:1-38
21 Bjale ge Jesu a lebelela, o ile a bona bahumi ba lahlela meneelo ya bona ka mapokising.+
2 Ke moka a bona mohlologadi wa modiidi a lahlela ditšheletiana tše pedi* tša tšhipi tša theko e nyenyane kudu,+
3 gomme a re: “Ruri ke le botša gore mohlologadi yo wa modiidi o neetše go feta batho ka moka,+
4 ka gobane ka moka ga bona ba ntšhitše go tšwa mahumong a bona eupša mohlologadi yo, le ge a diila o neetše ka tšhelete ka moka yeo a bego a iphediša ka yona.”+
5 Ka morago, ge batho ba bangwe ba be ba bolela ka tempele, ba bolela kamoo e kgabišitšwego gabotse ka gona ka maswika a mabotse le ka dilo tšeo di neetšwego,+
6 Jesu o ile a re: “Go tla tla matšatši ao dilo ka moka tšeo le di bonago mo, di tlago go wišwa ebile ga go le leswika le le letee leo le tlago go tlogelwa mo le le godimo ga le lengwe le se la wišwa.”+
7 Ke moka ba mmotšiša, ba re: “Morutiši, dilo tše di tlo direga neng, gona re tlo bona ka eng gore dilo tše di kgauswi le go direga?”+
8 Yena a re: “Le hlokomeleng gore go se be le motho yo a le forago,+ ka gobane ba bantši ba tla tla ba diriša leina la ka ba re: ‘Ke nna Kriste,’ ebile ba re ‘Nako ya gore boporofeta bo phethagale e kgauswi.’ Le se ke la ba šala morago.+
9 Go oketša moo, ge le ekwa ka dintwa le ka ditaba tša gore batho ba bangwe ba dira gore ba bangwe ba gateletšege, le se ke la tšhoga, ka gobane dilo tše di swanetše go direga pele. Eupša bofelo bo ka se tle ka yona nako yeo.”+
10 Ke moka a re go bona: “Setšhaba se tla lwa le setšhaba se sengwe+ gomme mmušo wa lwa le mmušo o mongwe.+
11 Go tla ba le ditšhišinyego tše dikgolo tša lefase ebile go tla ba le tlhaelelo ya dijo le leuba la malwetši lefelong le lengwe ka morago ga le lengwe.+ Batho ba tla bona dilo tšeo di tšhošago ebile ba tla bona dipontšho tše di tšhošago go tšwa legodimong.
12 “Eupša pele ga ge dilo tše ka moka di ka direga, batho ba tla le swara ba le tlaiša,+ ba le iša disinagogeng gore le ahlolwe ba ba ba le iša le dikgolegong. Le tla išwa pele ga dikgoši le babuši ka baka la leina la ka.+
13 Ge le le moo, le tla kgona go ba botša ka nna.
14 Ka baka leo, ka dipelong tša lena le se ke la phetha ka gore nakong e tlago le tlo itwela bjang ebile le se ke la dulela go nagana kamoo le tlago go ikemela,+
15 ka gobane ke tla le botša seo le swanetšego go se bolela ka ba ka le fa le bohlale bjoo baganetši ba lena ka moka ba kopane ba ka se kgonego go bo ganetša goba go bo ngangiša.+
16 Go oketša moo, gaešita le batswadi ba lena, banababo lena, ba leloko la lena le bagwera ba lena, ba tla le rekiša ebile ba tla bolaya ba bangwe ba lena.+
17 Le gona batho ka moka ba tla le hloya ka baka la leina la ka.+
18 Le ge go le bjalo, ga go moriri woo o tlago go wa dihlogong tša lena.+
19 Ge le ka kgotlelela go fihla mafelelong, le tla phološa maphelo a lena.+
20 “Eupša ge le bona Jerusalema e dikologilwe ke mašole ao a hlomilego ditente,+ gona le tsebe gore e kgauswi le go fedišwa.+
21 Ke moka bao ba lego Judea ba thome go tšhabela dithabeng,+ bao ba lego gare ga Jerusalema ba tšwe go yona gomme bao ba lego dinagamagaeng ba se ke ba tsena go yona,
22 ka gobane matšatšing ao, Modimo o tlo otla batho e le gore dilo tšeo di ngwadilwego ka Mangwalong di phethagale.
23 Ruri basadi ba baimana le bao ba nyantšhago mehleng yeo, e tla ba ba madimabe+ ka gobane go tla ba le masetlapelo a magolo kudu nageng ye, ebile Modimo o tla otla batho ba moo.
24 Le gona ba tla bolawa ka sabola gomme ba išwa bothopša ditšhabeng ka moka+ gomme Jerusalema e tla gatakelwa ke ditšhaba go fihlela nako yeo ditšhaba di dumeletšwego ka yona e fela.+
25 “Go oketša moo, go tla ba le dipontšho letšatšing, ngweding le dinaleding+ gomme mo lefaseng batho ba ditšhaba ba tla gakanega kudu ka ge ba sa tsebe gore ba dire eng ka baka la go duma ga lewatle leo le galefilego.
26 Batho ba tla idibala ka baka la go tšhoga le ka baka la go tshwenyega ka dilo tšeo di tlago go diragalela batho bao ba dulago mo lefaseng ka gobane dilo tše maatla tšeo di lego magodimong di tlo šišinywa.
27 Ke moka ba tla bona Morwa wa motho+ a etla ka leru a na le maatla a magolo le letago.+
28 Eupša ge dilo tše di thoma go direga, le tie maatla gomme le be le sebete ka gobane nako ya gore le phološwe e a batamela.”
29 Ke moka a ba botša papišo a re: “Naganang ka mogo le mehlare e mengwe ka moka.+
30 Ge e hloga, le a tseba gore selemo se batametše.
31 Ka mo go swanago, ge le bona dilo tše di direga, le tsebe gore Mmušo wa Modimo o kgauswi.
32 Ruri ke le botša gore moloko wo o ka se hlokofale ka moka go fihla ge dilo tše ka moka di direga.+
33 Legodimo le lefase di tla fela, eupša mantšu a ka a tla dula a le gona.+
34 “Ka gona hlokomelang gore go ja kudu, go nwa kudu+ le go tshwenyega ka dilo tšeo le di hlokago,+ ga go senye tsela e botse yeo le naganago ka yona,* go sego bjalo letšatši leo le tla le fihlela le se la nagana
35 tše e kego ke molaba+ ka gobane le tla tlela bohle bao ba dulago lefaseng.
36 Ka gona, dulang le phafogile+ ka dinako ka moka gomme le rapele*+ Modimo ka pelo ka moka e le gore le tle le kgone go phologa dilo tše ka moka tšeo di swanetšego go direga le gore le tle le kgone go ema pele ga Morwa wa motho.”+
37 Ka gona, mosegare o be a ruta ka tempeleng, eupša bošego o be a etšwa a eya go dula thabeng yeo e bitšwago Thaba ya Mehlware.
38 Le gona batho ka moka ba be ba etla go yena e sa le mesong gore ba mo kwe ge a ruta.
