Ebangedi ya Luka 7:1-50
7 Ka morago ga ge Jesu a boditše batho dilo tšeo a bego a nyaka go ba botša tšona, o ile a tsena Kaperenaume.
2 Ka nako yeo, go be go na le moetapele yo mongwe wa mašole yoo a bego a na le mohlanka. O be a rata mohlanka wa gagwe kudu. Mohlanka yoo o be a babja kudu ebile a le kgauswi le go hlokofala.+
3 Ge moetapele yoo wa mašole a ekwa ka Jesu, o ile a romela ba bangwe ba banna ba bagolo ba Bajuda go yena gore ba mo kgopele gore a tle a fodiše mohlanka wa gagwe.
4 Ke moka banna bao ba bagolo ba tla go Jesu, ba thoma go mo kgopela go tšwa pelong ba re: “Mo thuše hle, le yena o a swanelega gore o mo thuše,
5 ka gobane o a re rata ebile o re agetše sinagoge.”
6 Ke moka Jesu a sepela le bona. Eupša ge a le kgauswi le go fihla ntlong ya moetapele wa mašole, moetapele yoo o be a šetše a rometše bagwera ba gagwe gore ba botše Jesu ba re: “Mong wa ka, o se ke wa tshwenyega ka gobane ga ke swanelwe ke go go amogela ka ntlong ya ka.+
7 Ga se ka tla go wena ka gobane ke bone ke sa swanelege, eupša ke kgopela gore o ntšhe lentšu o le gona moo gomme o dire gore mohlanka wa ka a fole.
8 Ka gobane le nna ke a laolwa ebile ke na le mašole ao ke a laolago. Ge ke botša lešole le itšego ke re: ‘Eya kua!’ Le a ya, gomme ge ke botša le lengwe ke re: ‘Tlaa keno!’ Le a tla. Le gona ge ke botša mohlanka wa ka ke re: ‘Dira se!’ O a se dira.”
9 Ge Jesu a ekwa dilo tše, o ile a mo makalela gomme a boela go batho bao ba bego ba mo šetše morago a re: “Ke le botša gore: Le ka mohla ga sa nka ka hwetša motho wa go ba le tumelo ya go swana le ya monna yo mo Isiraele.”+
10 Ge batho bao ba bego ba romilwe ba boela ntlong ya molaodi wa mašole, ba ile ba hwetša mohlanka wa gagwe a fodile.+
11 Ka moragonyana ga gore dilo tšeo di direge, o ile a ya motseng woo o bitšwago Naini. O be a sepela le barutiwa ba gagwe le lešaba le legolo.
12 Ge a batamela kgauswi le keiti ya motse, a bona batho ba rwele mohu ba eya le yena ka ntle go yo mmoloka. Mohu yoo e be e le morwa yoo e bego e le ngwana a nnoši wa mmagwe+ ebile mmagwe e be e le mohlologadi. Go be go na le batho ba bantši kudu bao ba bego ba etšwa motseng bao ba bego ba sepela le mohlologadi yoo.
13 Ge Morena a mmona, o ile a mo kwela bohloko+ gomme a re go yena: “Tlogela go lla.”+
14 Ge a realo, a batamela a kgwatha bolao bjoo bo bego bo rwele mohu, gomme batho bao ba bego ba bo rwele ba ema pho! Ke moka a re: “Lesogana, ke re go wena, tsoga!”+
15 Ke moka lesogana leo le bego le hlokofetše la tsoga la dula fase gomme la thoma go bolela. Ka gona, Jesu a le tšea a le nea mmago lona.+
16 Bjale batho ka moka ba be ba tšhogile kudu gomme ba thoma go tumiša Modimo ba re: “Modimo o tšweleditše moporofeta yo mogolo gare ga rena.”+ Le gona, “Modimo o kwetše batho ba gagwe bohloko.”+
17 Dilo ka moka tšeo Jesu a di dirilego tša tlala Judea ka moka le nageng ka moka yeo e e dikologilego.
18 Bjale barutiwa ba Johane ba botša Johane dilo tšeo ka moka.+
19 Ka gona, Johane a bitša barutiwa ba gagwe ba babedi gomme a ba romela go Morena gore ba mmotšiše ba re: “Na ke wena re bego re go emetše,+ goba na go na le yo a sa tlago?”
20 Ge banna bao ba fihla go yena ba re: “Johane Mokolobetši o re romile gore re go botšiše re re: ‘Na ke wena yo re bego re go emetše, goba na go na le yo a sa tlago?’”
21 Ka nako yeo, o ile a fodiša batho ba bantši bao ba bego ba swerwe ke malwetši a go se swane,+ e ka ba a magolo goba a manyenyane, a raka matemona gomme a dira gore batho ba bantši bao ba bego ba foufetše ba bone.
22 Ke moka Jesu a re go bona: “Eyang le yo botša Johane ka dilo tšeo le di bonego le tšeo le di kwelego, le re: Batho bao ba bego ba foufetše, gona bjale ba a bona.+ Bagolofadi gona bjale ba kgona go sepela. Batho bao ba nago le lephera, gona bjale ba a fodišwa. Difoa gona bjale di a kwa.+ Bahu ba a tsošwa ebile badiidi ba botšwa ditaba tše dibotse.+
23 Go thaba yoo go se nago dilo tšeo di dirago gore a belaele ka baka la ka.”*+
24 Ge batho bao Johane a ba romilego ba sepetše, Jesu o ile a thoma go bolela le mašaba ka Johane a re: “Le be le ile go bona eng lešokeng? Na le be le ile go bona lehlaka leo le tšewatšewago ke phefo?+
25 Bjale le be le ile go bona eng? Na le be le ile go bona motho yo a aperego diaparo tša maemo?+ Ke ka baka la eng bao ba aperego diaparo tša maemo ebile ba phela bophelo bja manobonobo ba dula ka dintlong tša ka bogošing?
26 Gabotsebotse le be le ile go dira eng? Na le be le ile go bona moporofeta? Ee ke moporofeta, ke a le botša, motho yoo ebile o bohlokwa kudu go feta le baporofeta.+
27 Yo ke yena yo Mangwalo a bolelago ka yena gore: ‘Bona! Ke roma moromiwa wa ka gore a go ete pele, e lego yo a tlago go go lokišeletša tsela pele o etla.’+
28 Ruri ke le botša gore gare ga batho bao ba belegwego ke basadi ga se gwa ka gwa ba le wa go feta Johane ka bogolo, eupša motho yo a nago le maemo a tlasana Mmušong wa Modimo, ke yo mogolo go mo feta.”+
29 (Ge batho ka moka le bao ba patedišago motšhelo ba ekwa se, ba bolela gore Modimo o lokile, ka gobane ba be ba kolobeditšwe ke Johane.+
30 Eupša Bafarasei le barutiši ba Molao ba be ba se ba ikemišetša go dira seo Modimo a nyakago ba se dira,+ ka gobane ba be ba se ba kolobetšwa ke Johane.)
31 Jesu a oketša ka gore: “Bjale batho ba moloko wo ba swana le mang, gona nka ba swantšha le mang?+
32 Ba swana le bana bao ba dutšego mebarakeng bao ba goeletšanago ba re: ‘Re le leleditše naka gore le bine, eupša la se bine, ra lla gabohloko, eupša lena la se lle.’
33 Ka mo go swanago, Johane Mokolobetši o tlile a ikona dijo ebile a sa nwe beine,+ eupša lena la re: ‘O na le letemona.’
34 Morwa wa motho o tlile a ja dijo ebile a nwa beine, eupša lena la re: ‘Bonang motho wa sejagobe, yo a nwago beine ka mo go feteletšego, mogwera wa badiradibe le batho bao ba patedišago ba bangwe motšhelo!’+
35 Eupša motho o bontšha gore o bohlale ka dilo tšeo a di dirago.”*+
36 Bjale yo mongwe wa Bafarasei o ile a mo kgopela gore a tle a je le yena. Ka gona, a tsena ka ntlong ya Mofarasei yoo a dula tafoleng, a ja le yena.
37 Ka gona mosadi yoo a bego a tsebja e le modiradibe moo motseng a kwa gore Jesu o ja dijo ka ntlong ya Mofarasei, gomme a tla a swere lepotlelwana la alapasetere leo le bego le na le makhura ao a nkgago bose.+
38 Eitše ge mosadi yoo a khuname ka morago ga dinao tša Jesu a thoma go lla gomme a kolobiša dinao tša Jesu ka dikeledi tša gagwe, ke moka a phumola dikeledi tšeo ka meriri ya gagwe. Le gona, mosadi yoo o ile a dulela go khisa dinao tša Jesu ke moka a di tlotša ka makhura a monkgo o mobose.
39 Ge Mofarasei yoo a bego a mo memile a bona seo, pelong ya gagwe a re: “Ge nkabe motho yo e le moporofeta ka nnete, o be a tla tseba gore mosadi yo a mo swarago ke mang le gore ke motho wa mohuta mang, ebile o be a tla tseba gore mosadi yo ke modiradibe.”+
40 Eupša Jesu a re go Mofarasei yoo: “Simone, ke nyaka go go botša selo se sengwe.” Yena a re: “Morutiši, mpotše!”
41 A re: “Go be go na le banna ba babedi bao ba bego ba kolota moadimiši yo a itšego. Yo mongwe o be a mo kolota ditenariase* tše 500, mola yo mongwe a be a mo kolota tše 50.
42 Ge banna bao ba be ba se na seo ba ka mo patelago ka sona, o ile a ba lebalela ka bolokologi. Bjale o nagana gore ke ofe yo a tlago go rata moadimiši yoo kudu?”
43 Simone a mo araba a re: “Ke nagana gore ke yo a bego a mo kolota ditenariase tše dintši.” Ke moka Jesu a re go yena: “O opile kgomo lenaka.”
44 A napa a retologa a lebelela mosadi yoo gomme a re go Simone: “O a mmona mosadi yo? Ke tsene ka ntlong ya gago, wa se mphe meetse a go hlapa dinao tša ka. Eupša mosadi yo o hlapišitše dinao tša ka ka dikeledi tša gagwe gomme a di phumola ka meriri ya gagwe.
45 Ga se wa nkhisa, eupša mosadi yo o ile a dulela go khisa dinao tša ka ga e sa le go tloga ke tsene mo.
46 Ga se wa ntlotša hlogo ka makhura, eupša mosadi yo o tlotša dinao tša ka ka makhura a monkgo o mobose.
47 Ke go botša gore ka baka la se, go sa šetšwe gore dibe tša gagwe ke tše dintši* gakaakang, o di lebaletšwe,+ ka gobane o bontšhitše gore o nthata kudu. Eupša yo a lebaletšwego dibe tše sego kae, o no rata batho ganyenyane.”
48 Ka morago ga moo, Jesu a re go mosadi yoo: “Dibe tša gago di lebaletšwe.”+
49 Ke moka bao ba dutšego tafoleng le yena ba thoma go botšišana ba re: “Motho yo ke mang moo a bilego a kgona go lebalela dibe?”+
50 Eupša Jesu a re go mosadi yoo: “Tumelo ya gago e go phološitše,+ sepela ka khutšo.”
