Ebangedi ya Luka 13:1-35
-
Go itshola goba go fedišwa (1-5)
-
Papišo ya mogo wo o sa enywego (6-9)
-
Mosadi yo a golofetšego o fodišwa ka Sabatha (10-17)
-
Papišo ya thoro ya mosetata le komelo (18-21)
-
Go nyakega maiteko go tsena ka mojako o mosesane (22-30)
-
“Phukubje yeo” go thwego ke Heroda (31-33)
-
Jesu o llela Jerusalema (34, 35)
13 Ka nako yeo Jesu o ile a botšwa gore go be go na le Bagalelia bao Pilato a ilego a hlakanya madi a bona le dihlabelo tša bona.
2 Ge a ba araba a re: “Na le nagana gore Bagalelia bao ba hwile ka gobane e le badiradibe ba babe kudu go feta Bagalelia ba bangwe ka moka?
3 Ga go bjalo, ebile ke le botša gore ge e ba le sa itshole le lena ka moka le tla fedišwa.+
4 Goba na le nagana gore batho ba 18 bao ba ilego ba welwa ke tora kua Siloama gomme ya ba bolaya, ba be ba na le molato o mogolo kudu go feta batho ba ka moka bao ba dulago Jerusalema?
5 Ga go bjalo, ebile ke le botša gore ge e ba le sa itshole le lena ka moka le tla fedišwa go swana le bona.”
6 Ke moka a ba botša papišo a re: “Go be go na le monna yo mongwe yo a bego a bjetše mogo mašemong a gagwe a meterebe. Ka letšatši le lengwe o ile a tla a nyaka mago gomme a se a hwetše.+
7 Ke moka a re go motho yo a bego a šoma mašemong ao a diterebe: ‘Ke na le mengwaga e meraro ke etla ke nyaka mago mohlareng wo eupša ke sa hwetše selo. Bjale o reme ka gobane o no gola eupša ga o enywe.’
8 Ge a mo araba a re: ‘Mong wa ka, o tlogele ngwaganyana o mongwe go fihlela ke epa go o dikologa gomme ke tšhela manyora.
9 Ge e ba o ka enywa nakong e tlago, gona o ka tšwela pele o le gona eupša ge e ba o sa enywe, gona o tla o rema.’”+
10 Bjale o be a ruta go e nngwe ya disinagoge ka Sabatha.
11 Ke moka mosadi yo mongwe yo a bego a na le letemona leo le dirilego gore a fetše mengwaga e 18 a babja o be a le moo. Bolwetši bjoo bo be bo dira gore a kobege gomme a se ke a kgona go ema thwii!
12 Ge Jesu a bona mosadi yoo, a re go yena: “Kgaetšedi ya ka, ke go fodiša bolwetši bja gago.”+
13 Ke moka Jesu a bea diatla tša gagwe godimo ga mosadi yoo, mosadi yoo a napa a otlologa a thoma go tumiša Modimo.
14 Eupša moetapele wa sinagoge a galefa ka gobane Jesu o be a fodišitše motho ka Sabatha, ke moka a re go batho bao ba bego ba le moo: “Go na le matšatši a tshelelago ao mošomo o swanetšego go dirwa ka ona,+ ka gona etlang ka matšatši ao gore le tle le fodišwe, e sego ka letšatši la Sabatha.”+
15 Le ge go le bjalo, Morena ge a mo araba a re: “Baikaketši ke lena!+ Na go na le yo a ka se kego a tlemolla poo ya gagwe goba tonki ya gagwe, a e iša go nwa meetse a re ke Sabatha?+
16 Mosadi yo ke morwedi wa Aborahama ebile Sathane o mo dirile gore a fetše mengwaga e 18 a babja. Na ga se a swanela go fodišwa ka letšatši la Sabatha?”
17 Ge a se na go realo, bao ba bego ba mo ganetša ka moka ba ile ba thoma go hlabja ke dihlong, eupša ge batho ka moka ba bona dilo tše dibotse tšeo a di dirilego ba ile ba thaba kudu.+
18 Ka gona, a tšwela pele a re: “Mmušo wa Modimo o swana le eng, gona nka o swantšha le eng?
19 O swana le thoro ya mohlare wa mosetata yeo motho yo mongwe a ilego a e bjala serapeng sa gagwe, thoro yeo e ile ya mela, ya gola ya ba mohlare. Ke moka dinonyana tša tla tša aga dihlaga makaleng a wona.”+
20 A boeletša gape a re: “Mmušo wa Modimo nka o swantšha le eng?
21 O swana le komelo yeo mosadi a e tšerego a e hlakanya le folouru ya dikhilokgerama tše 10 gomme a e duba go fihlela folouru yeo e dubilwego e kokomoga.”+
22 Ge a dutše a le leetong la gagwe la go ya Jerusalema, o be a tloga motseng o mongwe a eya go o mongwe, le go tloga motsaneng o mongwe go ya go o mongwe a ruta batho.
23 Bjale monna yo mongwe o ile a re: “Morena, na ke nnete gore go tlo phološwa batho ba sego kae feela?” Ge Jesu a araba a re:
24 “Šomang ka thata gore le tsene ka mojako o mosesane,+ ka gobane ke le botša gore ba bantši ba tla nyaka go tsena eupša ba ka se kgone.
25 Bjale ge mong wa ntlo a tsoga gomme a notlela lebati, le tla ema ka ntle la kokota la re: ‘Morena, re bulele.’+ Eupša yena ge a le araba o tla re: ‘Ga ke tsebe gore le tšwa kae?’
26 Ke moka le tlo thoma la re: ‘Re be re eja ebile re enwa pele ga gago, ebile o be o re ruta diterateng tša gabo rena tše dikgolo.’+
27 Eupša yena o tla re go lena: ‘Ga ke le tsebe. Tlogang mo go nna, lena bao le dirago dilo tše di sa lokago!’
28 Ge le bona Aborahama, Isaka, Jakobo le baporofeta ba bangwe ba le Mmušong wa Modimo, eupša lena le lahletšwe ka ntle, le tla lla la ba la lomantšha meno le le moo.+
29 Le gona batho ba tla tla ba etšwa ka bohlabela le ka bodikela, gotee le ka leboa le ka borwa gomme ba tla dula tafoleng Mmušong wa Modimo.
30 Go na le bao e lego ba mafelelo bao e tlago go ba ba pele gomme gwa ba le bao e lego ba pele bao e tlago go ba ba mafelelo.”+
31 Ka yona nako yeo ba bangwe ba Bafarasei ba ile ba tla go yena ba re: “Tloga mo, ka gobane Heroda o nyaka go go bolaya.”
32 Ke moka a re go bona: “Sepelang le yo botša phukubje yeo le re: ‘Ke raka matemona ebile ke fodiša batho lehono le gosasa, gomme ka letšatši la boraro ke tla be ke feditše.’
33 Le ge go le bjalo, ke swanetše go dira modiro wa ka lehono, gosasa le ka letšatši la boraro, ka gobane moporofeta ga se a swanelwa go bolaelwa ka ntle ga Jerusalema.+
34 Hee lena batho ba Jerusalema! Hee lena batho ba Jerusalema! Lena babolai ba baporofeta le bao ba kgatlago ka maswika batho bao ba rometšwego go lena.+ Ke gantši ke nyaka go kgoboketša bana ba lena go swana le kgogo ge e kgoboketša matswiana a yona ka tlase ga diphego tša yona. Eupša lena ga se la ka la nyaka!+
35 Tempele ya lena e lahlilwe gomme ya tlogelelwa lena.+ Ruri ke le botša gore le ka se sa hlwa le sa mpona go fihlela le re: ‘Go šegofaditšwe yo a tlago ka leina la Jehofa!’”*+
