Ebangedi ya Luka 4:1-44
4 Jesu o ile a tloga Nokeng ya Jorodane. Modimo o ile a mo fa moya o mokgethwa, gomme moya woo wa dira gore a ye lešokeng,+
2 ke moka a dula moo matšatši a 40. Ge a le moo, Diabolo o ile a mo leka.+ Le gona, nakong ya ge a be a le moo o be a sa je selo. Ka morago ga ge matšatši ao a fedile, o ile a kwa a swerwe ke tlala.
3 Ke moka Diabolo a re go yena: “Ge e ba o le morwa wa Modimo, botša leswika le gore le fetoge dijo.”*
4 Eupša Jesu a mo fetola a re: “Mangwalo a re ‘motho ga se a swanela go phela ka dijo feela.’”+
5 Ka gona, a mo iša godimo ga thaba ke moka a napa a mmontšha mebušo ka moka ya lefase kapelapela.+
6 Ke moka Diabolo a re: “Ke tla go fa maatla a go laola mebušo ye ka moka le mahumo a yona, ka gobane dilo tše ka moka ke tša ka,+ ebile ke di fa yo ke nyakago go mo fa tšona.
7 Ge o ka khunama wa nthapela, ke tla go fa dilo tše ka moka.”
8 Ke moka Jesu a re go yena: “Mangwalo a re: ‘O swanetše go rapela Jehofa* Modimo wa gago ebile o swanetše go hlankela yena a nnoši ka tsela e kgethwa.’”+
9 Ke moka a mo iša Jerusalema, a mo emiša karolong ya godimodimo ya tempele, gomme a re go yena: “Ge e ba o le morwa wa Modimo, itahlele fase,+
10 ka gobane Mangwalo a re: ‘Modimo o tla roma barongwa ba gagwe,’
11 gomme ‘ba tla go kuka ka diatla tša bona gore leoto la gago le se ke la kgopša ke leswika.’”+
12 Jesu a mo araba a re: “Mangwalo a re: ‘O se ke wa leka Jehofa Modimo wa gago.’”+
13 Ka gona, ge Diabolo a feditše go mo leka ka dilo tšeo ka moka, o ile a mo tlogela go fihlela a hwetša nako ya maleba ya go mo leka gape.+
14 Bjale Jesu o ile a boela Galelia+ a hlahlwa ke moya o mokgethwa.* Dilo ka moka tše dibotse tšeo a di dirilego, go ile gwa bolelwa ka tšona metsaneng ka moka ya moo.
15 Le gona, o ile a thoma go ruta disinagogeng tša bona gomme batho ka moka ba mo reta.
16 O ile a ya Natsaretha+ moo a bego a godišeditšwe gona. Ke moka ka letšatši la Sabatha, a tsena sinagogeng+ a ema gore a bale Mangwalo go ya le kamoo a bego a tlwaetše go dira ka gona.
17 Ka gona, a fiwa lengwalo la go phuthwa la moporofeta Jesaya, a le bula gomme a hwetša moo go ngwadilwego gore:
18 “Jehofa o mphile moya wa gagwe ka gobane o ntloleditše gore ke botše badiidi ditaba tše dibotse, o nthomile gore ke tsebiše bao ba thopilwego gore ba tla lokollwa le gore bao ba sa bonego ba tla bona, go lokolla bao ba gateletšwego,+
19 le go ba botša ka nako yeo Jehofa a tlago go ba šegofatša.”+
20 Ke moka a phutha lengwalo leo a le nea mohlokomedi gomme a dula fase. Batho ka moka bao ba bego ba le ka sinagogeng ba be ba mo tsepeletše.
21 Ke moka a thoma gore go bona: “Lehono lengwalo le leo le sa tšwago go le kwa le phethagetše.”+
22 Batho ka moka ba thoma go bolela dilo tše dibotse ka yena, ba ba ba makatšwa ke mantšu a mabose ao a bego a a bolela+ ebile ba be ba re: “Na yo ga se morwa wa Josefa?”+
23 Ge ba realo, a re go bona: “Ga go pelaelo gore le tla tsopola polelwana yeo e rego: ‘Ngaka ikalafe,’ gomme la e lebiša go nna la re: ‘Dilo tšeo re kwelego gore o di dirile Kaperenaume+ di dire le mo ga geno.’”
24 Ke moka a re: “Ruri ke le botša gore ga go moporofeta yo a amogelwago tikologong ya gabo.+
25 Ka mohlala, ntshepeng ge ke re: Mehleng ya Eliya, go be go na le bahlologadi ba bantši Isiraeleng, nakong yeo pula e feditšego mengwaga e meraro le dikgwedi tše tshela e sa ne, gomme nageng yeo ka moka go wele tlala e kgolo.+
26 Le ge go le bjalo, Modimo ga se a romela Eliya go yo mongwe wa bahlologadi bao ba bego ba le Isiraele, o ile a mo romela feela go mohlologadi wa Tsarepata nageng ya Sidone.+
27 Le gona, mehleng ya moporofeta Elisha go be go na le batho ba bantši bao ba bego ba na le bolwetši bja lephera kua Isiraele, eupša gare ga bona go ile gwa fodišwa Naamane wa Mosiria feela.”+
28 Bjale ge batho ka moka bao ba bego ba le sinagogeng ba ekwa dilo tše, ba ile ba galefa kudu,+
29 gomme ba emelela ba mo ntšhetša ka ntle ga motse kapelapela. Ke moka ba mo iša godimodimo ga thaba moo motse wa bona o bego o agilwe gona, e le gore ba mo kgoromeletše fase.
30 Eupša o ile a feta gare ga bona gomme a itshepelela.+
31 Ke moka a theogela Kaperenaume, e lego motse wa Galelia. O be a ba ruta ka Sabatha,+
32 gomme batho bao ba be ba makatšwa ke tsela yeo a bego a ruta ka yona,+ ka gobane o be a bolela bjalo ka motho yo a nago le maatla a go laola.
33 Bjale ka sinagogeng go be go na le monna yoo a bego a na le letemona. Monna yoo o be a goeletša a re:+
34 “Ao! O nyaka eng mo wena Jesu wa Monatsaretha?+ Na o tletše go re fediša? Ke tseba gabotse gore o mang, o Mokgethwa wa Modimo.”+
35 Eupša Jesu a kgalemela letemona leo a re: “Homola! gomme o tšwe go yena.” Ka gona, ka morago ga gore letemona leo le lahlele monna yoo fase gare ga bona, le ile la tšwa go yena le se la mo gobatša.
36 Ke moka batho ka moka ba makala, ba thoma go boledišana ba re: “Motho yo o bolela bjang? O bolela le matemona gore a tšwe go batho a diriša maatla a gagwe a bolaodi gomme matemona ao a a mo kwa.”
37 Ka gona, dilo tše dibotse tšeo Jesu a di dirilego di ile tša tlala naga ka moka.
38 Ge a tloga sinagogeng o ile a tsena ntlong ya Simone.* Ka nako yeo, mogwegadi wa Simone* o be a swerwe ke letadi* gomme ba kgopela Jesu gore a mo fodiše.+
39 Ka gona, a ya a ema kgauswi le yena gomme a napa a mo fodiša. Ke moka mogwegadi wa Simone a thoma go ba direla dijo.
40 Eupša ge letšatši le sobela, batho ka moka bao batho ba gabo bona ba bego ba lwala malwetši a go se swane, ba ile ba ba tliša go yena. O be a ba fodiša+ ka go bea yo mongwe le yo mongwe wa bona diatla.
41 Le gona, Jesu o ile a ntšha matemona bathong ba bantši. Matemona ao a be a goeletša a re: “O Morwa wa Modimo.”+ Eupša o be a a kgalemela a sa a dumelele gore a bolele,+ ka gobane a be a tseba gore ke yena Kriste.+
42 Eupša, ge go esa o ile a tloga moo gomme a ya lefelong leo a tlago go ba noši.+ Mašaba a ile a thoma go nyakana le yena gomme a fihla moo a bego a le gona ke moka a leka go mo thibela gore a se tloge go ona.
43 Eupša a re go mašaba ao: “Ke swanetše go bolela ditaba tše dibotse tša Mmušo wa Modimo le metseng e mengwe, ka gobane Modimo o nthometše gore ke dire sona se.”+
44 Ka gona, a tšama a ruta disinagogeng tša Judea.
