Ebangedi ya Luka 2:1-52
2 Bjale mehleng yeo Kesara Augustose o ile a ntšha taelo ya gore batho ba lefaseng ka moka ba ngwadišwe.
2 (Mo e be e le la mathomo batho ba ngwadišwa nakong ya ge Kirenio e be e le mmuši wa Siria.)
3 Batho ka moka ba ile ba ya go ngwadišwa, yo mongwe le yo mongwe a ya go ngwadišwa motseng wa gabo.
4 Josefa+ le yena a rotoga a etšwa Galelia, motseng wa Natsaretha, a ya Judea motseng wa Dafida wo o bitšwago Betlelehema+ ka ge e be e le wa leloko Dafida ebile e le wa lapa la gagwe.
5 O ile a ya gore a ngwadišwe le Maria, yo a bego a mo nyetše go etša ge a be a mo tshepišitše.+ Ka nako yeo Maria o be a le kgauswi le go belega.+
6 Ge ba be ba le moo, nako ya gore a belege e ile ya fihla.
7 O ile a belega morwa wa gagwe wa mathomo+ gomme a mo phuthela ka mašela, a mo robatša ka selong seo diphoofolo di jelago go sona+ ka gobane go be go se na phapoši yeo ba ka robalago go yona lefelong la baeng.
8 Le gona tikologong yeo go be go na le badiši bao ba bego ba dula ka ntle ga motse ba dišitše mehlape ya bona bošego.
9 Gateetee morongwa wa Jehofa a ema pele ga bona, seetša se se phadimago seo se tšwago go Jehofa sa phadima go ba dikologa gomme ba tšhoga kudu.
10 Eupša morongwa a re go bona: “Le se ke la tšhoga, ka gobane ke le tsebiša ditaba tše dibotse tšeo di tlago go dira gore batho ka moka ba thabe kudu.
11 Lehono le belegetšwe motho yo a tlago go le phološa+ motseng wa Dafida.+ Yena ke Kriste, Morena+ wa lena.
12 Se le tlago go bona ka sona se se: Le tla hwetša lesea le phuthetšwe ka mašela le robaditšwe ka selong seo diphoofolo di jelago go sona.”
13 Ka yona nako yeo, lešaba la madira a legodimo la tla la ba le morongwa yoo,+ la tumiša Modimo la re:
14 “Anke go tumišwe Modimo wa magodimodimong, lefaseng go be le khutšo bathong bao a ba amogelago.”
15 Ka gona ge barongwa ba boetše legodimong, badiši ba ile ba boledišana ba re: “A re yeng Betlelehema gona bjale re yo bona seo se diregilego seo Jehofa a re tsebišitšego sona.”
16 Ba ya moo kapelapela, ba hwetša Maria le Josefa gotee le lesea le robetše ka selong seo diphoofolo di jelago go sona.
17 Ge ba bona dilo tše, ba tsebatša molaetša woo ba o boditšwego mabapi le ngwana yoo.
18 Batho ka moka bao ba kwelego seo badiši ba ba boditšego sona ba ile ba makala kudu,
19 eupša Maria a bea dilo tše ka moka pelong ya gagwe, a naganišiša ka seo di se bolelago.+
20 Ke moka badiši ba boela morago, ba tumiša Modimo le go mo reta ka baka la dilo ka moka tšeo ba di bonego le tšeo ba di kwelego ka ge di be di le ka mokgwa woo ba di boditšwego ka gona.
21 Ka morago ga matšatši a seswai, ge e be e le nako ya gore a bolotšwe,+ ba ile ba mo rea leina ba re ke Jesu, e lego leina leo le boletšwego ke morongwa le pele ga ge Maria a ka ima.+
22 Ge nako ya monyanya wa go hlwekišwa e fihla, ba ile ba ya le yena Jerusalema ke moka ba mo tliša pele ga Jehofa go bontšha gore ngwana yoo ke wa gagwe. Ba ile ba dira bjalo ka ge Molao wa Moshe+ o be o laela gore ba dire ka tsela yeo,
23 bjalo ka ge go ngwadilwe Molaong wa Jehofa gore: “Mošemane yo mongwe le yo mongwe wa mathomo o swanetše go neelwa Jehofa.”+
24 Ba dira sehlabelo go ya ka seo se boletšwego Molaong wa Jehofa wo o rego: “Le swanetše go neela maeba a mabedi a nageng goba maebana a mabedi.”+
25 Jerusalema go be go na le monna yo mongwe yo a bego a bitšwa Simeone. Monna yo o be a lokile ebile a šoma ka thata go hlankela Modimo. Le gona o be a letetše nako ya ge Modimo a tlo homotša Baisiraele+ ebile moya o mokgethwa o be o mo hlahla.
26 Go feta moo, Modimo o be a mo utolletše a diriša moya o mokgethwa gore a ka se hwe pele a bona Kriste yo a romilwego ke Jehofa.
27 O ile a tla tempeleng a hlahlwa ke moya o mokgethwa, ge batswadi ba Jesu ba be ba tliša Jesu yoo e bego e sa le yo monyenyane tempeleng, e le gore ba latele mokgwa woo o tlwaetšwego woo go ngwadilwego ka wona Molaong mabapi le yena.+
28 O ile a mo kuka a tumiša Modimo a re:
29 “Bjale wena Mmuši Morena, nna mohlanka wa gago nka hwa ka khutšo+ go ya ka seo o se boletšego,
30 ka gobane ke bone motho yo a tlago go re phološa,+
31 yoo o mo rometšego e le gore batho ka moka ba tle ba mmone.+
32 Ke yena seetša+ seo se tlošago leswiswi leo le apareditšego batho ba ditšhaba+ ebile o bea batho ba gago ba Isiraele maemong a godimo.”
33 Tatagwe le mmagwe ba ile ba makala kudu ge ba ekwa dilo tšeo di bolelwago ka yena.
34 Le gona, Simeone o ile a ba šegofatša gomme a re go Maria mmago Jesu: “Ka baka la gagwe batho ba bantši Isiraele ba tla wa+ gomme ba bangwe ba tsoga.+ Le gona batho ba bantši ba tla bolela gampe ka yena+ le ge Modimo a tlo ba bontšha gore o a mo thekga,
35 e le gore go utollwe dilo tšeo batho ba bantši ba di naganago. Ge e le wena o tla kwa bohloko go swana le motho yo a hlabilwego ka sabola.”+
36 Go be go na le moporofeta wa mosadi e lego Anna, morwedi wa Fanuele, wa moloko wa Ashere. Mosadi yo o be a tšofetše, gomme o ile a dula le monna wa gagwe mengwaga e šupa fela ka morago ga gore ba nyalane.
37 Ka nako yeo e be e le mohlologadi ebile a na le mengwaga e 84. O be a dula a le tempeleng a hlankela Modimo bošego le mosegare, a ikona dijo ebile a rapela go tšwa pelong.
38 Ka yona nako yeo o ile a ba batamela gomme a thoma go leboga Modimo le go botša batho ka moka ka ngwana yoo, bona batho bao ba bego ba letetše gore Jerusalema e tle e phološwe.+
39 Ka morago ga gore ba fetše go dira dilo ka moka tšeo di bego di nyakwa ke Molao wa Jehofa,+ ba ile ba boela morago Galelia motseng wa gabo bona wa Natsaretha.+
40 Ngwana yoo o ile a tšwela pele a gola ebile a e ba le maatla, a ba le bohlale bjo bo oketšegilego gomme Modimo a tšwela pele a mo amogela.+
41 Bjale ngwaga o mongwe le o mongwe batswadi ba gagwe ba be ba eya Jerusalema go yo keteka monyanya wa Paseka.+
42 Ge Jesu a be a na le mengwaga e 12, yena le lapa la gabo ba ile ba rotogela Jerusalema go ya ka mokgwa woo ba bego ba tlwaetše go dira ka gona nakong ya monyanya.+
43 Ge monyanya o fedile gomme ba boela morago, Jesu yoo e bego e sa le mošemanyana o ile a šala Jerusalema batswadi ba gagwe ba se lemoge gore o šetše.
44 Ka ge ba be ba nagana gore o sehlopheng sa batho bao ba bego ba sepela le bona, ba ile ba sepela letšatši ka moka. Ka morago ba ile ba thoma go mo nyaka go ba leloko le go batho bao ba ba tlwaetšego.
45 Eupša ba ile ba se mo hwetše ke moka ba boela morago Jerusalema gomme ba mo nyaka le Jerusalema yela ka moka.
46 Bjale, ka morago ga matšatši a mararo ba ile ba mo hwetša ka tempeleng a dutše gare ga barutiši, a ba theeditše ebile a ba botšiša dipotšišo.
47 Eupša batho ka moka bao ba bego ba mo theeditše ba ile ba makatšwa ke kamoo a bego a kwešiša dilo ka gona le kamoo a bego a araba ka gona.+
48 Bjale ge batswadi ba gagwe ba mmona, ba šala ba ahlame, ke moka mmagwe a re go yena: “Ngwanaka, kganthe o re dirang? Gape ke kgale nna le tatago re go nyaka ka mahlo a makhwibidu.”
49 Eupša a re go bona: “Le be le nnyakela eng? Na le be le sa tsebe gore ke swanetše gore ke be ntlong ya Tate?”+
50 Eupša ba ile ba se kwešiše seo a bego a ba botša sona.
51 Ke moka a theoga le bona, ba boela Natsaretha gomme a tšwela pele a ba kwa.+ Ke moka mmagwe a bea dilo tše ka moka pelong ya gagwe.+
52 Ka gona Jesu a tšwela pele a gola ebile a eba bohlale ke moka a tšwela pele a kgahla Modimo le batho.
