Ebangedi ya Luka 3:1-38
3 Ka ngwaga wa bo-15 wa ge Tiberio Kesara a buša, Pontio Pilato e be e le mmuši wa Judea, Heroda*+ yena e le mmuši wa tikologo ya Galelia, Filipi morwarragwe e be e le mmuši wa tikologo ya naga ya Iturea le Terakoniti gomme Lisania e le mmuši wa tikologo ya Abilene.
2 Mehleng yeo, Annase e be e le yo mongwe wa baperisita ba bagolo gomme Kayafa+ e le moperisita yo a phagamego. Le gona Modimo o ile a bolela le Johane+ morwa wa Sakaria ge a be a le lešokeng.+
3 Ka gona, a ya tikologong ka moka ya Noka ya Jorodane, a ruta batho gore ba kolobetšwe go bontšha gore ba a itshola e le gore ba lebalelwe dibe tša bona.+
4 Dilo tše di diregile bjalo ka ge go ngwadilwe pukung ya moporofeta Jesaya gore: “Go na le motho yo a goeletšago a le lešokeng, o re: ‘Lokišang tsela ya Jehofa! Le dire gore ditsela tša gagwe di lekalekane.+
5 Meedi ka moka e tlatšwe ka mabu, dithaba le meboto di lekalekanywe. Ditsela tšeo di kgopamego di otlollwe gomme ditsela tšeo di sa lekalekanego di lekalekanywe.
6 Batho ka moka ba tla bona tsela yeo Modimo a phološago batho ka yona.’”+
7 Ka gona ge a bona mašaba a batho a etla gore a a kolobetše, o ile a re go ona: “Lena bana ba dinoga tša marabe,* ke mang yo a le lemošitšego gore le tšhabele bogale bja Modimo bjo bo tlago?+
8 Ka gona, thomang pele ka go dira mediro yeo e bontšhago gore le a itshola.* Le se ke la ipotša gore: ‘Tatago rena ke Aborahama.’ Ka gobane ke le botša gore Modimo a ka kgona go direla Aborahama bana ka maswika a.
9 Selepe se kgauswi le go rema mehlare go tloga medung. Ka gona mohlare o mongwe le o mongwe woo o sa enywego dienywa tše dibotse o tla rengwa gomme wa lahlelwa mollong.”+
10 Ke moka mašaba ao a thoma go mmotšiša a re: “Bjale, re dire eng?”
11 Ge a araba a re: “Motho yo a nago le diaparo tše pedi a a abelane le yo a se nago selo, le yo a nago le sa go ja a abelane le yoo a se nago sona.”+
12 Batho bao ba bego ba ntšhiša ba bangwe motšhelo le bona ba ile ba tla gore ba kolobetšwe,+ ke moka ba mmotšiša ba re: “Morutiši, re swanetše go dira eng?”
13 Yena a re go bona: “Le se ke la patediša batho motšhelo wo o fetago wo o beilwego.”*+
14 Le gona, bao e lego mašole ba be ba mmotšiša ba re: “Rena re swanetše go dira eng?” Yena a re go bona: “Le se ke la tshwenya motho goba la latofatša motho le ge e le ofe ka maaka,+ eupša le kgotsofalele seo le se fiwago.”
15 Bjale ge batho ba be ba letile Kriste, ka moka ga bona ba be ba ipotšiša ka Johane ba re: “Na mohlomongwe yo ke yena Kriste?”+
16 Johane a ba araba ka moka ga bona a re: “Nna ke le kolobetša ka meetse, eupša ka morago ga ka go tla yo a mphetago ka maatla, yo ke sa swanelegego go inama ka tlemolla marala a dieta* tša gagwe.+ Yena o tla le kolobetša ka moya o mokgethwa le ka mollo.+
17 Foroko yeo a ološago ka yona e ka seatleng sa gagwe gore a hlwekiše seboa* sa gagwe ka mo go feletšego, a be a kgobokeletše korong ya gagwe lefelong leo go bewago dilo go lona, eupša o tla fiša mooko mollong woo o ka se kego wa tingwa.”
18 Le gona o ile a kgothatša batho ka ditsela tše dintši gomme a tšwela pele a botša batho ditaba tše dibotse.
19 Eupša ka ge Johane a be a kgalemile Heroda, yoo e bego e le mmuši wa tikologo ya Galelia ka baka la dilo tše mpe tšeo a bego a di dirile le ka baka la ge a be a tšere Herodiase mosadi wa butiagwe,
20 Heroda o ile a dira selo se sengwe se sebe gape. O ile a tswalelela Johane kgolegong.+
21 Bjale ge batho ka moka ba be ba kolobetšwa, Jesu le yena o ile a kolobetšwa.+ Ge a dutše a rapela, legodimo le ile la bulega.+
22 Moya o mokgethwa woo o bego o bonagala okare ke leeba, o ile wa theogela go yena gomme gwa kwagala lentšu legodimong le re: “O Morwa wa ka yo ke mo ratago. Ke go amogetše.”+
23 Ge Jesu+ a be a thoma go ruta batho, o be a na le mengwaga e ka bago e 30.+ Batho ba be ba mo tseba e le morwawa Josefa,+yoo e bego e le morwa wa Heli.
24 Heli e be e le morwa wa Mathate,Mathate e be e le morwa wa Lefi,Lefi e be e le morwa wa Meleki,Meleki e be e le morwa wa Jannai,Jannai e be e le morwa wa Josefa,
25 Josefa e be e le morwa wa Mathatiase,Mathatiase e be e le morwa wa Amose,Amose e be e le morwa wa Nahume,Nahume e be e le morwa wa Esili,Esili e be e le morwa wa Nagai,
26 Nagai e be e le morwa wa Maathe,Maathe e be e le morwa wa Mathatiase,Mathatiase e be e le morwa wa Semeine,Semeine e be e le morwa wa Joseka,Joseka e be e le morwa wa Joda,
27 Joda e be e le morwa wa Joanane,Joanane e be e le morwa wa Resa,Resa e be e le morwa wa Serubabele,+Serubabele e be e le morwa wa Shealathiele,+Shealathiele e be e le morwa wa Neri,
28 Neri e be e le morwa wa Meleki,Meleki e be e le morwa wa Adi,Adi e be e le morwa wa Khosame,Khosame e be e le morwa wa Elmadama,Elmadama e be e le morwa wa Ere,
29 Ere e be e le morwa wa Jesu,Jesu e be e le morwa wa Eliesere,Eliesere e be e le morwa wa Jorima,Jorima e be e le morwa wa Mathate,Mathate e be e le morwa wa Lefi,
30 Lefi e be e le morwa wa Simeone,Simeone e be e le morwa wa Judase,Judase e be e le morwa wa Josefa,Josefa e be e le morwa wa Jonama,Jonama e be e le morwa wa Eliakima,
31 Eliakima e be e le morwa wa Melea,Melea e be e le morwa wa Menna,Menna e be e le morwa wa Mathata,Mathata e be e le morwa wa Nathane,+Nathane e be e le morwa wa Dafida,+
32 Dafida e be e le morwa wa Jese,+Jese e be e le morwa wa Obede,+Obede e be e le morwa wa Boase,+Boase e be e le morwa wa Salamone,+Salamone e be e le morwa wa Nahashone,+
33 Nahashone e be e le morwa wa Aminadaba,Aminadaba e be e le morwa wa Arani,Arani e be e le morwa wa Hetserone,Hetserone e be e le morwa wa Peretse,+Peretse e be e le morwa wa Juda,+
34 Juda e be e le morwa wa Jakobo,+Jakobo e be e le morwa wa Isaka,+Isaka e be e le morwa wa Aborahama,+Aborahama e be e le morwa wa Thera,+Thera e be e le morwa wa Nahoro,+
35 Nahoro e be e le morwa wa Seruge,+Seruge e be e le morwa wa Reu,+Reu e be e le morwa wa Pelege,+Pelege e be e le morwa wa Ebere,+Ebere e be e le morwa wa Shela,+
36 Shela e be e le morwa wa Kenane,Kenane e be e le morwa wa Arapagashadi,+Arapagashadi e be e le morwa wa Sheme,+Sheme e be e le morwa wa Noa,+Noa e be e le morwa wa Lamege,+
37 Lamege e be e le morwa wa Methusela,+Methusela e be e le morwa wa Henoge,Henoge e be e le morwa wa Jarede,+Jarede e be e le morwa wa Mahalalele,+Mahalalele e be e le morwa wa Kenane,+
38 Kenane e be e le morwa wa Enoshe,+Enoshe e be e le morwa wa Sethe,+Sethe e be e le morwa wa Adama,+Adama e be e le morwa wa Modimo.
Mengwalo ya Tlase
^ Ke gore, Heroda Antipase. Bona Tlhaloso ya Mantšu.
^ Phetolelo ya lentšu ka lentšu e re, “bana ba dinoga tša mpholo.”
^ Phetolelo ya lentšu ka lentšu e re, “tšweletšang dienywa tšeo di bontšhago gore le a itshola.”
^ Phetolelo ya lentšu ka lentšu e re, “Le se ke la nyaka motšhelo wo o fetago wo o beilwego.”
^ Phetolelo ya lentšu ka lentšu e re, “diramphašane.”
^ Bona Tlhaloso ya Mantšu.
