Bana babo rena bao ba nago le dika tša Bokriste ba bohlokwa kudu ka phuthegong. Motho yo a lekalekanego o dira gore go dule go na le khutšo. Ge e ba o nyaka go tsebja o le yo a lekalekanego, theetša ge ba bangwe ba hlalosa kamoo ba bonago dilo ka gona. Ge e ba le le sebokeng, o ka thekga ditšhišinyo tšeo ba bangwe ba di neago ge e ba di sa thulane le melao ya motheo ya Beibele. Go se gapeletše gore dilo di dirwe ka tsela yeo wena di nyakago ka yona, go bontšha gore ga o dire boithatelo. O a tseba gore go bohlokwa gore o theetše batho ba bangwe. (Gen. 13:​8, 9; Die. 15:22) Ga o “ntwadumela” goba “sefelapelwana.” Seo se ra gore ga o na lenyatšo e bile ga o ngangišane le batho ba bangwe. Ka ge o phegelela khutšo, o ba wa mathomo wa go lokiša ditaba ge go na le mathata. (Jak. 3:​17, 18) Mantšu a gago a botho a ka dira gore le batho ba bangwe go akaretša le bao ba le ganetšago ba be bonolo.—Baa. 8:​1-3; Die. 25:15; Mat. 5:​23, 24. w24.11 23 ¶13

Le ge Jesu a hwile “gatee ya ba moka,” go sa na le dilo tšeo a re thušago ka tšona. (Baroma 6:10) O re thuša bjang? O re thuša ka dilo ka moka tšeo re di hlokago. Ke Kgoši ya rena, ke Moperisita yo a Phagamego ebile ke hlogo ya phuthego. (1 Bakor. 15:25; Baef. 5:23; Baheb. 2:17) O kgoboketša batlotšwa le ba lešaba le legolo gomme o tlo fetša mošomo woo pele masetlapelo a magolo a fela. (Mat. 25:32) O thuša le mohlanka yo a botegago le wa temogo gore a re nee dilo tšeo re di hlakago gore re kgone go ba le tumelo e tiilego go Jehofa. (Mat. 24:45) Ebile o sa tlo re direla dilo tše dintšhi ge a tla be a buša ka Mengwaga e Sekete. Jehofa o re neile Morwa wa gagwe gore a re thuše ka dilo ka moka tšeo re di hlokago. w25.01 24 ¶12

Ge Jehofa a re lebalela, o phumola melato ya rena sa ruri. Se se dira gore re kgone go ba bagwera ba babotse le yena. Jehofa o re lebalela ka gobane a re rata e sego ka gobane a gapeletšega. Re a thaba ka gobane Jehofa o lebalela ‘dibe tša rena.’ (Ps. 130:4; Baroma 4:8) Eupša e le gore Jehofa a re lebalele, re swanetše go dira selo se sengwe se bohlokwa. Jesu o boletše gore: “Ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.” (Mat. 6:​14, 15) Se se ra gore go bohlokwa gore re ekiše tsela yeo Jehofa a lebalelago ka yona. w25.02 13 ¶18-19

Nagana ka batho bao ba ilego ba fedišwa kua Sodoma le Gomora. Lota e lego monna wa go loka o be a dula Sodoma. Ga re tsebe ge e ba Lota a ile a bolela le bona ka moka ka Jehofa. Batho ba motseng woo e be e le ba kgopo, eupša na ba be ba tseba seo ba se dirago? Gopola gore banna ba motseng woo ba ile ba nyaka go kata baeng ba Lota. Beibele e re batho bao e be e le go tloga ka “mošemane go fihla ka mokgalabje.” (Gen. 19:4; 2 Pet. 2:7) Na re ka re Jehofa Modimo yo a nago le kwelobohloko a ka ba a ile a ahlola batho bao ka lehu le go se ba nee kholofelo ya tsogo? Jehofa o ile a botša Aborahama gore a ka se fediše motse woo ge o ka ba le batho ba lesome ba go loka. (Gen. 18:32) Batho bao ba be ba sa loka gomme Jehofa o ile a ba otla ka baka la dilo tšeo ba bego ba di dira. Na re ka bolela re kgodišegile gore ga go le o tee wa bona yo a tlago go tsošwa ka “tsogo . . . [ya] ba sa lokago?” Re ka se nape re re’alo! w24.05 2 ¶3; 3 ¶8

Ka ge maemo a ikonomi a fetoga batho ba bangwe ba ile ba lekega go amogela mošomo wo o bego o tlo dira gore ba hudugele kgole le malapa a bona eupša ba lemoga gore go dula kgole le malapa a bona ga se phetho e bohlale. Pele o ka amogela mošomo o itšego, ipotšiše ge eba o ka se šitiše wena le lapa la gago go hlankela Jehofa, o se ke wa no nagana feela ka tšhelete yeo o tlago go e dira. (Luka 14:28) Ipotšiše gore: ‘Go dula kgole le molekane wa ka go tlo kgoma bjang lenyalo la rena? Na ke tlo kgona go dula ke eya dibokeng, tšhemong le go fetša nako le bana bešo le dikgaetšedi?’ Ge eba o le motswadi, ipotšiše potšišo ye e bohlokwa: ‘Ge nka dula kgole le bana ba ka, na ke tlo kgona “go ba laya le go ba tlwaetša ka tsela yeo Jehofa a nyakago ka yona”?’ (Baef. 6:4) Pele o dira o diphetho, ipotšiše gore Jehofa o tlo ikwa bjang, go ena le go theetša bagwera le ba leloko bao ba sa phelego ka melao ya motheo ya Beibele. w25.03 29 ¶12

Mokriste yo a sego a gola moyeng a ka lahletšwa ke batho “bao ba forago ba bangwe,” a amogela “dithuto tša maaka” le go theetša bahlanogi. A ka ba le mona, a baka dikarogano, a kgopišega ka pela goba a palelwa ke go lebeletšana le diteko. (1 Cor. 3:3) Mangwalo a bapetša tsela yeo motho a golago ka yona moyeng le tsela yeo ngwana a golago ka yona. (Baef. 4:15) Ka ge ngwana a se na temogo o hloka go hlokomelwa. Ka mohlala, mma a ka re morwedi wa gagwe a sware letsogo la gagwe ge ba tshela seterata. Ge ngwana yoo a dutše a gola, mmagwe a ka thoma go mo dumelela gore a tshele seterata a nnoši eupša a mo lemoša gore a lebelele dikoloi pele a tshela tsela. Ngwana yoo ge šetše a gotše o tlo kgona go itšhireletša ge a tshela seterata. Ka mo go swanago, ge Mokriste yo a godilego a swanetše go dira phetho e itšego, o naganišiša ka melao ya motheo ya Beibele gore a kgone go bona kamoo Jehofa a ikwago ka gona ka taba yeo ke moka a latela tlhahlo ya gagwe. w24.04 3 ¶5-6

Ka mengwaga e mentšhi, Modimo o be a gwerana le dibopiwa tša moya feela tšeo di dulago mo a dulago gona. Ka morago o ile a oketša tente ya gagwe gomme a mema batho bao ba dulago lefaseng. Ba bangwe ba baeng bao e be e le Henoge, Noa, Aborahama le Jobo. Bahlanka bao ba botegago ba ile ba bitšwa bagwera ba Modimo, goba bao ba bego ba “sepela le Modimo wa nnete.” (Gen. 5:24; 6:9; Jobo 29:4; Jes. 41:8) Ke kgale Jehofa a mema bagwera ba gagwe gore e tle e be baeng tenteng ya gagwe. (Hesek. 37:​26, 27) Ka mohlala, boporofeteng bjo bja Hesekiele re ithuta gore Modimo o tloga a nyaka gore bahlanka ba gagwe ba botegago ba be le segwera sa kgauswi kudu le yena. O tshepiša go dira “kgwerano ya khutšo le bona.” Boporofeta bjo, bo bolela ka nakong ya ge bahlanka ba Jehofa ba tloditšwego le bao ba nago le kholofelo ya go tlo phela mo lefaseng ba le ka tlase ga tente ya seswantšhetšo ya Jehofa e le “mohlape o tee.” (Joh. 10:16) Seo se a direga gona bjale. w24.06 2 ¶2, 4; 3 ¶5

Bjalo ka bahlanka ba Jehofa re thekga Mmušo wa Modimo ka dipelo tša rena ka moka, eupša gantšhi go nyakega sebete gore re kgone go dira bjalo. (Mat. 6:33) Ka mohlala, mo lefaseng le le kgopo re hloka sebete gore re phele ka melao ya motheo ya Jehofa le gore re bolele ditaba tše dibotse tša Mmušo. Go nyakega sebete gore re se ke ra tšea karolo ditabeng tša dipolotiki lefaseng le leo le senyegago le go feta. (Joh. 18:36) Bahlanka ba bantšhi ba Jehofa ba ile ba ba le mathata a ditšhelete, ba bethwa goba ba golegwa ka baka la go gana go tšea karolo ditabeng tša dipolotiki goba go tsenela bošole. Go naganišiša ka batho bao ba ilego ba bontšha sebete le go botegela Jehofa le Mmušo wa gagwe go ka re thuša gore le rena re be le sebete. Kgoši ya rena Kriste Jesu o ile a gana go tšea karolo ditabeng tša dipolotiki tša lefase la Sathane nakong ya ge a be a le mo lefaseng. (Mat. 4:​8-11; Joh. 6:​14, 15) O be a dula a ithekga ka Jehofa gore a mo nee matla. w24.07 3 ¶4; 4 ¶7

Jehofa o dumeletše pego ye e nyamišago e ngwalwa ka Beibeleng gore e tle e re hole. E re thuša go kwešiša gore ke ka baka la’ng a hloile sebe. Se senya segwera sa rena le Jehofa e bile se dira gore re hwe. (Jes. 59:2) Sathane o hloile Jehofa le batho e bile o dirile gore mo lefaseng go be le sebe. Ka morago ga gore Adama le Efa ba dire sebe, Sathane o ile a nagana gore o sentše morero wa Jehofa. Eupša o be sa lemoge gore Jehofa o tloga a rata batho. Modimo ga se a ka a fetola morero wa gagwe ka bana ba Adama le Efa. Ka ge a rata batho, o ile a dira gore ba be le kholofelo. (Baroma 8:​20, 21) Jehofa o be a tseba gore ba bangwe ba bana ba Adama ba be ba tlo mo rata, ba nyaka le gore a ba thuše go lwantšhana le sebe. Ka ge e le Tatago bona le Mmopi wa bona, o be a tlo ba thuša gore ba se sa ba le sebe le gore ba dule e le bagwera ba gagwe. w24.08 3 ¶3-4

Bahlanka ba bantšhi ba Jehofa ba na le dilo tše dintšhi tšeo ba di dirago. Re a šoma e le gore re itlhokomele le go hlokomela malapa a rena. (1 Tim. 5:8) Bakriste ba bantšhi ba hlokomela ba ga bo bona bao ba babjago goba bao ba godilego. Le gona le rena re swanetše go itlhokomela e bile go hlokega nako e ntšhi gore re dire seo. Go oketša go maikarabelo a, re na le dikabelo tše dingwe ka phuthegong. Mošomo o bohlokwa kudu wo re nago le wona ke go bolela ditaba tše dibotse ka mafolofolo. Go bala Beibele ke se sengwe sa “dilo tšeo di lego bohlokwa kudu” go rena. Re swanetše go dira gore go tle pele bophelong bja rena. Ge psalme ya mathomo e bolela ka monna yo a thabilego e re: “[O] rata molao wa Jehofa kudu, gomme [o] bala molao wa gagwe le go naganišiša ka wona bošego le mosegare.” (Ps. 1:​1, 2) Se se bontšha gore re swanetše go ipha nako ya go bala Lentšu la Modimo. Nako e kaone ya go bala Beibele ke efe? Go ithekgile ka motho. Nako e kaone ke yeo e ka go thušago gore o kgone go bala ka mehla. w24.09 3 ¶5-6

Na Mokriste yo a godilego o hloka thušo ya batho ba bangwe? Ee. Batho bao ba godilego le bona ba ka hloka go kgopela thušo ka dinako tše dingwe. Motho yo a sa dutšego a gola moyeng a ka letela gore batho ba bangwe ba mmotše gore a dire’ng goba ba mo direle diphetho tšeo yena a swanetšego go itirela tšona. Ka lehlakoreng le lengwe Mokriste yo a godilego o kgona go lebelela tsela yeo ba bangwe bao ba nago le phihlelo ba dirago dilo ka gona gomme a ekiša mohlala wa bona eupša o gopola gore Jehofa o letetše gore yo mongwe le yo mongwe a rwale “morwalo wa gagwe.” Go swana le ge batho ba sa swane ka tsela yeo ba bopegilego ka yona, Bakriste bao ba godilego le bona ba a fapana ka dika tša moya tše bjalo ka bohlale, sebete, botho le kwelobohloko. Ka mo go swanago Bakriste ba babedi ba ka lebeletšana le boemo bjo bo swanago eupša ba dira diphetho tša go se swane tšeo di dumelelanago le mangwalo. Se se direga kudu ge go tliwa diphethong tšeo di ithekgilego ka letswalo la motho. Bakriste bao ba godilego moyeng ba ka se ahlole ba bangwe ka baka la ge diphetho tša bona di sa swane, go ena le moo ba lwela gore ba dule ba na le botee.—Baroma 14:10; 1 Bakor. 1:10. w24.04 4 ¶7-8

O ka dira’ng ge e ba o ikwa o se na mohola? O ka bala ditemana tša Beibele tšeo di go kgonthišetšago gore o bohlokwa go Jehofa, gomme o naganišiše ka tšona. Ge e ba o ile wa palelwa ke go fihlelela pakane e itšego, goba o nyamišwa ke gore ga o kgone go dira dilo tšeo batho ba bangwe ba di dirago, o se ke wa fela matla. Jehofa ga se a letela gore o dire dilo tšeo o ka se kgonego go di dira. (Ps. 103:​13, 14) Ge e ba o ile wa tlaišwa nakong e fetilego, o se ke wa ipona molato ka gobane ga se phošo ya gago! Dula o gopola gore Jehofa o tlo ahlola bao ba tlaišago ba bangwe gomme a thuša bao ba tlaišwago. (1 Pet. 3:12) Dula o gopola gore Jehofa a ka go diriša go thuša batho ba bangwe. O go neile tokelo ya gore o be mošomigotee le yena mošomong wa go bolela ditaba tša dibotse. (1 Bakor. 3:9) Dilo tšeo di diragetšego bophelong bja gago di ka ba di go neile sebaka sa gore o kgone go kwela ba bangwe bohloko le go tseba gore ba ikwa bjang. O ka kgona go ba thuša. w24.10 7-8 ¶6-7

Jehofa o na le taba le tsela yeo re swarwago ka yona. “O rata dilo tša go loka.” (Ps. 37:28) Jesu o re kgonthišetša gore Jehofa o tla “dira gore toka e dirwe . . . ka bjako” ka nako ya maleba. Go se kgale o tlo tloša dilo ka moka tšeo di re kwešago bohloko le tšeo di dirago gore re tlaišege. (Ps. 72:​1, 2) Re swanetše go letela nako yeo Jehofa a tlago go fediša mathata ao re nago le ona ka moka. (2 Pet. 3:13) Gona bjale o a re thuša ge re sa swarwe gabotse. O re ruta le gore re swanetše go itshwara bjang ge re sa swarwe gabotse. Tsela e nngwe yeo a dirilego seo ka yona, ke ka go romela Morwa wa gagwe yoo re ka ekišago mohlala wa gagwe. O diriša Beibele go re nea keletšo yeo e ka re thuša ge batho ba bangwe ba sa re sware gabotse. w24.11 2-3 ¶3-4

Go be bonagala go ka se kgonege gore Jesu a fepe lešaba ka ge go be go na le banna ba e ka bago ba 5 000. E bile ge go balwa basadi le bana, go ka direga gore batho bao ka moka e be e le ba 15 000. (Mat. 14:21) Andrea o ile a bolela gore: “Go na le mošemanyana yo a nago le dinkgwa tše hlano tša garase le dihlatswana tše pedi. Eupša tšeo ke’ng ge batho e le ba bantši gakaakaa?” (Joh. 6:9) Go be go tlwaelegile gore dinkgwa tša garase di jewa ke batho bao ba diilago ebile hlapi e nyenyane e ka no ba e be e tšhetšwe letswai le go omišwa. Dijo tšeo mošemane yo a bego a di swere e be e le tše di nyenyane kudu. Ka ge Jesu a be a nyaka go bontšha gore o rata batho, o ile a laela mašaba gore a dule ka dihlopha. (Mar. 6:​39, 40; Joh. 6:​11-13) Re bala gore Jesu o ile a rapelela dinkgwa tšeo le hlapi pele a di nea lešaba. Go be go swanelwa gore a leboge Modimo ka gobane ke yena a dirago gore dijo di be gona. Seo Jesu a se dirilego se re ruta gore re swanetše go leboga pele re eja. Jesu o ile a kgopela barutiwa ba gagwe gore ba nee batho dijo tšeo gomme ba ile ba ja, ba khora. w24.12 2-3 ¶3-4

Ge Jesu a be a le mo lefaseng, o ile a fa Tatagwe letago ka go bontšha batho gore Jehofa ke yena a mo fago matla a go dira mehlolo. (Mar. 5:​18-20) Le gona, Jesu o ile a nea Jehofa letago ka tsela yeo a bego a bolela ka yena le ka tsela yeo a bego a swara batho ka yona. Ka letšatši le lengwe Jesu o be a ruta Sinagogeng. Gare ga batho bao ba bego ba mo theeditše, go be go na le mosadi yo mongwe yo a bego a tshwenywa ke matemona ka mengwaga e 18. Matemona ao a be a dira gore mosadi yoo a se ke a kgona go ema gabotse. Ruri o be a na le mathata! Jesu o ile a mo kwela bohloko gomme a mmatamela ke moka a bolela le yena ka botho a re: “Wena mosadi, o lokolotšwe bofokoding bja gago.” Ke moka o ile a mmea matsogo gomme mosadi yoo a kgona go ema gabotse, “a tagafatša Modimo.” O be a thabile ka gobane Jehofa o be a mo thušitše gore a boele a phele gabotse. (Luka 13:​10-13) Mosadi yoo o be a na le mabaka a kwagalago a go fa Jehofa letago le rena re swanetše go dira seo se swanago. w25.01 2-3 ¶3-4

Rena ka noši re ka se kgone go dira gore re phethagale go swana le ge Adama le Efa ba be ba phethagetše mathomong. (Ps. 49:​7-9) Re ka se be le kholofelo ya go phela ka mo go sa felego goba go tsošwa ge e ba go se na yo a ka re thušago. Ge e le gabotse re tla be re swana le diphoofolo re se na kholofelo ya go tsoga gape. (Mmo. 3:19; 2 Pet. 2:12) Tatago rena yo lerato e lego Jehofa o re neile mpho yeo e patelago sekoloto sa sebe seo re se hweditšego go Adama. Jesu o boletše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Go oketša moo, mpho yeo Jehofa a re filego yona, e dira gore re kgone go ba le segwera sa kgauswi le yena. Re holwa ke mpho yeo Jehofa a re neilego yona ya go dira gore dibe tša rena di lebalelwe. w25.02 3 ¶3-6

Saulo o thušitšwe ke’ng gore a kolobetšwe? Saulo o ile a foufala ka morago ga gore Jesu yo a bego a le legodimong a bolele le yena. (Dit. 9:​3-9) O ile a fetša matšatši a mararo a ikona dijo ebile a naganišiša ka seo se sa tšwago go direga. Saulo o ile a kgodišega gore Jesu ke Mesia le gore balatedi ba gagwe ba bodumeding bja nnete. Go na le dilo tše dintšhi tšeo re ka ithutago tšona go Saulo. Saulo nkabe a ile a dumelela boikgogomošo goba go tšhaba batho go mo šitiša go kolobetšwa. Eupša ga se a ka a dira bjalo. Saulo o be a ikemišeditše go ba Mokriste le ge a be a tseba gore o tlo tlaišwa. (Dit. 9:​15, 16; 20:​22, 23) Ka morago ga gore a kolobetšwe, o ile a dula a ithekgile ka Jehofa gore a mo thuše go kgotlelela mathata. (2 Bakor. 4:​7-10) Ka morago ga gore o kolobetšwe gore o be yo mongwe wa Dihlatse tša Jehofa, o ka ba le mathata goba wa kopana le dilo tšeo di go lekago tumelo. Eupša kgodišega gore Modimo le Kriste ba tlo go thuša gore o kgone go kgotlelela le go dula o botega.—Bafil. 4:13. w25.03 4 8-9

Go bala Beibele e no ba mathomomayo. Eupša go nyakega gore re šome ka thata gore re holwe ke seo re se balago ka Lentšung la Modimo. Nagana ka papišo ye, go hlokega pula gore re be le meetse. Eupša ge eba pula e ka na kudu ka nakwana e nyenyane go tlo tlala meetse. Ge seo se ka direga, pula yeo ga e sa ba le mohola. Go nyakega nako gore meetse a nwelele le gore dimela di tle di kgone go mela. Ka mo go swanago le rena ga se ra swanela go bala Beibele ka lebelo, ka gobane seo se ka re šitiša go gopola le go diriša seo re se balago. (Jak. 1:24) Na ka dinako tše dingwe o fela o bala Beibele o kitima? O swanetše go dira’ng ge seo se direga? Fokotša lebelo. Iphe nako ya go naganišiša ka seo o se balago goba seo o se badilego. O ka bea nako e lekanego gore o kgone go nagana goba go naganišiša ka seo o ithutago sona. w24.09 4 ¶7-9

Ge ba hwetša tlhahlo, ba swanetše go e bala ka kelohloko ke moka ba e diriše kamoo ba ka kgonago ka gona. Ga ba no hwetša tlhahlo ya go nea dipolelo goba go rapela ge ba le dibokeng eupša ba hwetša le tlhahlo yeo e ka ba thušago go hlokomela dinku tša Kriste ka gona. Bagolo bao ba dirišago tlhahlo ya mokgatlo ba thuša bao ba ba hlokomelago gore ba ikwe ba bolokegile e bile ba ratwa. Ge bagolo ba re nea tlhahlo re swanetše go e latela ka go rata. Ge re dira bjalo, go tlo ba bonolo gore bao ba etelelago pele ba dire mošomo wa bona. Beibele e re kgothaletša gore re theetše le go ikokobeletša bao ba etelelago pele. (Baheb. 13:​7, 17) Seo se ka ba thata ka dinako tše dingwe. Ka baka la’ng? Ka gobane banna ba ga se ba phethagala. Eupša ge e ba re ka šetša kudu mafokodi a bona go e na le dika tša bona tše dibotse, re tla ba re thuša manaba a rena. Ke ka baka la’ng re re’alo? Re tla be re bontšha gore ga re bote mokgatlo wa Modimo. w24.04 10 ¶11-12

Na batho ka moka bao ba tlago go hlokofala nakong ya masetlapelo a magolo ba tlo fedišetšwa sa ruri ba se na kholofelo ya tsogo? Mangwalo a bolela ka mo go kwagalago gore batho bao ba lwantšhanago le Jehofa le madira a gagwe, ba tlo fedišwa ka Haramagedone gomme ba se tsošwe. (2 Bathes. 1:​6-10) Bjale go tlo direga’ng ka batho bao ba tlo hlokofalago ka baka la malwetši, dikotsi goba ba bolawa ke batho ba bangwe? (Mmo. 9:11; Sak. 14:13) Na ba bangwe ba batho ba ba ka ba gare ga “ba sa lokago” bao ba tlago go tsošwa lefaseng le leswa? (Dit. 24:15) Ga re tsebe. Eupša go na le dilo tšeo re di tsebago tšeo di tlago go direga nakong e tlago. Ka mohlala, nakong ya Haramagedone re a tseba gore batho ba tlo ahlolwa go ya le kamoo ba bego ba swara bana babo Kriste ka gona. (Mat. 25:40) Batho bao ba ahlotšwego e le dinku, e tlo ba bao ba bontšhitšego gore ba be ba thekga batlotšwa le Kriste.—Kut. 12:17. w24.05 10-11 ¶9-11

Beibele e re botša gore re phela “[dinakong] tše di hlobaetšago tšeo go lego thata go lebeletšana le tšona.” (2 Tim. 3:1) Go oketša go mathata ao batho ka moka ba lebeletšanago le ona mo tshepedišong ye ya dilo, bahlanka ba Jehofa ba lebeletšana le go ganetšwa le go tlaišwa. Ke’ng seo se re thušago go hlankela Jehofa le ge re na le mathata? Selo se segolo seo se re thušago, ke go gopola gore Jehofa ke “Modimo yo a phelago.” (Jer. 10:10; 2 Tim. 1:12) Jehofa ke Modimo wa kgonthe yo a re thušago ge re lebeletšane le mathata, e bile o dula a nyaka dibaka tša go re thuša. (2 Dikor. 16:9; Ps. 23:4) Go gopola gore ke Modimo yo a phelago go ka re thuša go lebeletšana le mathata ao re kopanago le ona. w24.06 20 ¶1-2

Re swanetše go tshepa mokgatlo wa Jehofa. Ge bana babo rena bao ba etelelago pele ba lemoga gore go na le phetogo e itšego yeo e swanetšego go dirwa, ba e dira kapelapela. Mohlomongwe phetogo yeo e ka ba go kaonefatša kamoo re bego re kwešiša selo se itšego ka gona goba e ka ba tsela yeo mokgatlo wa Modimo o bego o dira dilo ka yona. Ba dira se ka gobane ba nyaka go thabiša Jehofa. Ge ba dira diphetho ba diriša Beibele, e lego seo bahlanka ka moka ba Jehofa ba swanetšego go se dira. Moapostola Paulo o itše: “Dula o swere mohlala wa mantšu a phedišago.” (2 Tim. 1:13) Ge go bolelwa ka “mohlala wa mantšu a phedišago” go bolelwa ka ditherešo tšeo re di hwetšago ka Beibeleng. (Joh. 17:17) Dilo ka moka tšeo re di dumelago di ithekgile ka dithuto tšeo. Mokgatlo wa Jehofa o re rutile gore re kgomarele ditherešo tšeo. Ge re dira bjalo Jehofa o tlo re šegofatša. w24.07 11-12 ¶12-13

Ka ge moapostola Petro a ile a itshola gomme a lebalelwa, o be a ka kgona go ruta batho ba bangwe ka go itshola le go lebalelwa. Ka morago ga monyanya wa Pentekoste, Petro o ile a nea Bajuda bao e bego e se Bakriste polelo, a ba botša gore ba bolaile Mesia. O ile a re go bona: “Itsholeng le sokologe e le gore dibe tša lena di phumolwe, gore mehla ya tapologo e tle e etšwa sefahlegong sa Jehofa.” (Dit. 3:​14, 15, 17, 19) Petro o ile a ruta gore ge e ba motho a itshola, o tlogela go dira dilo tše mpe, ke moka a dira dilo tšeo di kgahlišago Modimo. O bontšhitše le gore Jehofa o lebalela motho ka mo go feletšego, gwa ba bjalo ka ge e ka motho yoo ga se a ka a dira sebe. Go a kgothatša go tseba gore Jehofa o ikemišeditše go re lebalela ge re itshola le ge re dirile dibe tše dikgolo. w24.08 12 ¶14

Ge re na le tumelo e tiilego e bile re tshepa gore e se kgale Jehofa o tlo fediša lefase le le lebe, re ka se nagane gore go ba le tšhelete goba dilo tše dintšhi go bohlokwa. Nakong ya masetlapelo a magolo, tšhelete e ka se be le mohola. Beibele e re: “Silifera ya bona ba tla e lahlela mekgotheng,” ka gobane “silifera ya bona goba gauta ya bona e ka se kgone go ba hlakodiša letšatšing la kgalefo ya Jehofa.” (Hesek. 7:19) Go e na le gore re kitimiše go dira tšhelete, re ka kgetha go phela bophelo bjo bonolo e le gore re kgone go hlankela Jehofa. Re swanetše go phema go tsena dikolotong goba le go ba le dilo tše dintšhi tšeo di ka hlokago nako ya rena gore re di hlokomele. Re swanetše go ba šedi gore re seke ra rata dilo tšeo re nago le tšona kudu. (Mat. 6:​19, 24) Ge bofelo bo dutše bo batamela, re swanetše go kgetha gore re tshepa Jehofa goba dilo tšeo re nago le tšona. w24.09 11 ¶13-14

Re ka kgona go tlogela mekgwa e mengwe yeo re bego re na le yona ka mo go feletšego. Eupša o ka hwetša mekgwanyana e mengwe e sa šaletše. Nagana ka seo se diragaletšego moapostola Petro. O ile a latola Jesu ka makga a mararo ka ge a be a tšhaba batho. (Mat. 26:​69-75) Go be go bonagala Petro a fentše bothata bjo ge a be a nea bohlatse bjo matla pele ga Sanhedrine. (Dit. 5:​27-29) Eupša mengwaga e itšego ka morago o ile a tlogela go ja le Bakriste bao e bego e se Bajuda, ka ge a be a boifa gore Bakriste bao e lego Bajuda ba be ba tlo mo lebelela bjang. (Bagal. 2:​11, 12) Bothata bja Petro bo be bo boile gape. Mohlomongwe bothata bjo bo be bo sa tloga ka mo go feletšego. Re ka ikhwetša re le boemong bja go swana le bja moapostola Petro. Eupša re ka kgona go lwantšhana le mekgwa yeo e felago e boaboa ka go latela keletšo ya Jesu yeo e re go “dulang le phakgame.” (Mat. 26:41) Le ge o ikwa okare o tiile, phema maemo ao a ka dirago gore o feleletše o dirile sebe .Tšwela pele o dira dilo tšeo di go thušitšego gore o atlege.—2 Pet. 3:14. w24.07 18-19 ¶17-19

Ga gona motho yo a ilego a thuša batho ba bangwe go feta Jesu. Ge a be a le mo lefaseng, o be a dira mehlolo go thuša batho ba bangwe. (Luka 9:​12-17) O re file mpho e kgolo kudu ka go re hwela. (Joh. 15:13) Le ka morago ga gore a tsošwe, o ile a tšwela pele a thuša batho. O ile a phethagatša seo a re tshepišitšego sona, ka go re kgopelela moya o mokgethwa go Jehofa gore o re thuše le go re kgothatša. (Joh. 14:​16, 17, 16:13) Jesu o diriša diboka go re thuša gore re kgone go dira batho barutiwa lefaseng ka moka. (Mat. 28:​18-20) Moapostola Paulo o ngwadile gore ge Jesu a eya legodimong o re file banna gore e be dimpho. (Baef. 4:​7, 8) Paulo o hlalositše gore Jesu o re file dimpho tšeo gore di hole phuthego ka ditsela tše dintšhi. (Baef. 1:​22, 23; 4:​11-13) Re a tseba gore banna ba ga se ba phethagala ba tlo fela ba dira diphošo. (Jak. 3:2) Eupša Jesu Kriste o ba kgethile gore ba re thuše. w24.10 18 ¶1-2

Dafida o ile a botša Solomone gore o be a tla atlega ge feela a ka dula a ekwa Jehofa Modimo. Ka maswabi, ka morago Solomone o ile a thoma go hlankela medimo e šele. Jehofa o ile a se sa thekga Solomone le go mo nea bohlale bjo bo bego bo mo thuša go etelela batho pele. (1 Dikg. 11:​9, 10; 12:4) Ke’ng seo re ithutago sona? Go kwa go dira gore re atlege. (Ps. 1:​1-3) Jehofa ga se a tshepiša go re nea dilo ka moka tšeo Solomone a bego a na le tšona. Eupša ge re ka kwa Modimo, o tlo re nea bohlale gomme ra kgona go dira diphetho tše dibotse. (Die. 2:​6, 7; Jak. 1:5) Melao ya gagwe ya motheo e ka re thuša ge re swanetše go kgetha mošomo, go kgetha ge e ba re tla tšwetša dithuto pele, boithabišo le tsela yeo re dirišago tšhelete ka yona. Bohlale bjo Jehofa a re neago bjona, bo tlo re thuša gore re se ke ra gobala. (Die. 2:​10, 11) Re tlo kgona go ba le bagwera ba ba botse. E bile Jehofa o re nea keletšo yeo e re thušago gore re kgone go ba le malapa a thabilego. w24.11 10-11 ¶11-12

Batswadi ba ka boledišana le bana ba bona ka seo Beibele e se rutago goba ka tumelo yeo ba nago le yona go Modimo. Ba ka boledišana le bana ba bona ge ba le di musiamong. Le ka bolela le bana ba lena ka dilo tšeo di diragetšego nakong e fetilego tšeo di bontšhago gore seo Beibele e se bolelago ke nnete. Mohlomongwe o ka ruta ngwana wa gago ka Leswika la Moaba. Leswika le le na le mengwaga e 3 000 ebile le ngwadile leina la Jehofa godimo ga lona. Le gona, Leswika le le ka Musiamong wo o bitšwago “Beibele le Leina la Modimo” wo o lego Ntlongkgolo ya Lefase ka Moka ya Dihlatse tša Jehofa yeo e lego kua Warwick, New York. Leswika la Moaba le bontšha gore Kgoši Mesha wa Moaba o ile a hlanogela Baisiraele. Seo se dumelelana le seo Beibele e se bolelago. (2 Dikg. 3:​4, 5) Ge bana ba gago ba bona gore seo Beibele e se bolelago ke nnete ebile se nepagetše, ba tlo ba le tumelo e tiilego. w24.12 14 ¶4; 15 ¶6