Ebangedi ya Mateo 4:1-25
4 Moya wa Modimo o ile wa dira gore Jesu a ye lešokeng, ge a le moo Diabolo+ o ile a mo leka.+
2 Ka morago ga ge a ikonne dijo ka matšatši a 40 le mašego a 40, o ile a kwa a swerwe ke tlala.
3 Ke moka Moleki yoo+ a tla go yena a re: “Ge e ba o le morwa wa Modimo, botša maswika a gore a fetoge dijo.”*
4 Eupša a mo araba a re: “Mangwalo a re: ‘Motho ga se a swanela go phela ka dijo feela, eupša o swanetše go phela le ka lentšu le lengwe le le lengwe leo le tšwago molomong wa Jehofa.’”*+
5 Ke moka Diabolo a mo iša motseng o mokgethwa,+ a mo emiša karolong ya godimodimo ya tempele,+
6 gomme a re go yena: “Ge e ba o le morwa wa Modimo, itahlele fase ka gobane Mangwalo a re: ‘Modimo o tla roma barongwa ba gagwe gomme ba tla go kuka ka diatla tša bona gore leoto la gago le se ke la kgopša ke leswika.’”+
7 Jesu a re go yena: “Le gona Mangwalo a re: ‘O se ke wa leka Jehofa Modimo wa gago.’”+
8 Diabolo a mo tšea gape a ya le yena thabeng e telele ka mo go sa tlwaelegago, a mmontšha mebušo ka moka ya lefase le mahumo a yona.+
9 A re go yena: “Ke tla go nea dilo tše ka moka ge o ka khunama wa nthapela gatee feela.”
10 Ke moka Jesu a re go yena: “Tloga Sathane! Ka gobane Mangwalo a re: ‘O swanetše go rapela Jehofa Modimo wa gago+ ebile o swanetše go hlankela yena a nnoši ka tsela e kgethwa.’”+
11 Ke moka Diabolo a mo tlogela+ gomme barongwa ba tla ba matlafatša Jesu.+
12 Bjale ge Jesu a ekwa gore Johane o golegilwe,+ o ile a ya Galelia.+
13 Ka morago ga gore a tloge Natsaretha, o ile a ya a dula Kaperenaume+ kgauswi le lewatle tikologong ya Sebulone le ya Nafutali,
14 e le gore go tle go phethagale seo Modimo a se boletšego a diriša moporofeta Jesaya, yo a itšego:
15 “Wena Galelia ya ditšhaba, naga ya Sebulone le wena naga ya Nafutali, lena le lego tseleng yeo e yago lewatleng ka bodikela bja Noka ya Jorodane,
16 batho bao ba dutšego leswiswing ba bone seetša se segolo, gomme bao ba dutšego tikologong yeo e aparetšwego ke moriti wa lehu, ba hlabetšwe+ ke seetša.”+
17 Go tloga ka nako yeo go ya pele, Jesu o ile a thoma go ruta batho a re: “Itsholeng, ka gobane Mmušo wa magodimo o batametše.”+
18 Ge a dutše a sepela kgauswi le Lewatle la Galelia, o ile a bona bana ba motho, e lego Simone yo a bitšwago Petro+ le Andrea. Ba be ba lahlela nnete ya go rea dihlapi ka lewatleng, ka gobane e be e le barei ba dihlapi.+
19 A re go bona: “Ntšhaleng morago, ke tla le dira barei ba batho.”+
20 Ka yona nako yeo, ba tlogela dinnete tša bona ba mo šala morago.+
21 Ge a tloga moo, o ile a bona Jakobo le Johane bao le bona e bego e le bana ba motho.+ E be e le barwa ba Tsebedeo. Ba be ba le ka sekepeng le tatago bona ba lokiša dinnete tša bona, gomme Jesu a ba bitša.+
22 Ba napa ba tlogela sekepe, ba tlogela le tatago bona ba mo šala morago.
23 Ke moka Jesu a sepela le Galelia ka moka ga yona,+ a ruta disinagogeng+ a bolela ditaba tše dibotse tša Mmušo wa Modimo ebile a fodiša mehuta ka moka ya malwetši.+
24 Dilo tšeo a bego a di dira di ile tša tlala Siria ka moka, ke moka ba mo tlišetša batho ka moka bao ba bego ba na le malwetši a go fapafapana, bao ba bego ba ekwa bohloko,+ bao ba bego ba na le matemona,+ bolwetši bja go wa+ le bagolofadi gomme a ba fodiša ka moka.
25 Ka baka leo, mašaba a magolo ao a tšwago Galelia, Dekapoli,* Jerusalema, Judea le go tšwa ka mošola wa Noka ya Jorodane, a ile a mo latela.
Mengwalo ya Tlase
^ Phetolelo ya lentšu ka lentšu e re, “a fetoge senkgwa goba borotho.”
^ Bona Tlhaloso ya Mantšu.
