Ebangedi ya Mateo 13:1-58

  • DIPAPIŠO TŠA MABAPI LE MMUŠO (1-52)

    • Mobjadi (1-9)

    • Lebaka la gore Jesu a diriše dipapišo (10-17)

    • Tlhaloso ya papišo ya mobjadi (18-23)

    • Korong le sekoro (24-30)

    • Thoro ya mosetata le komelo (31-33)

    • Go dirišwa ga dipapišo go phethagatša boporofeta (34, 35)

    • Tlhaloso ya papišo ya korong le sekoro (36-43)

    • Letlotlo leo le utilwego le pheta e botse (44-46)

    • Nnete ya go rea dihlapi (47-50)

    • Dilo tše mpsha le tša kgale tše di bolokilwego matlotlong (51, 52)

  • Jesu o tšeelwa fase tikologong ya gabo (53-58)

13  Letšatšing leo Jesu o ile a tloga ka ntlong, ke moka a ya a dula kgauswi le lewatle. 2  Mašaba a mantši a ile a mo kgobokanela, moo Jesu a ilego a ba a namela sekepe a dula fase. Mašaba ao a be a eme santeng ya kgauswi le lewatle.+ 3  Ke moka a a botša dilo tše dintši a diriša dipapišo,+ a re: “Mobjadi o ile a tšwa a yo bjala peu.+ 4  Ge a dutše a bjala, peu e nngwe e ile ya wela kgauswi le tsela gomme dinonyana tša tla tša e ja tša e fetša.+ 5  E nngwe e ile ya wela lekgwareng moo go bego go se na mobu o montši, gateetee e ile ya mela ka ge mmu o be o sa iše fase.+ 6  Eupša ge letšatši le hlaba, dimela tšeo di ile tša swa, tša omelela ka baka la ge di be di se na medu. 7  E nngwe e ile ya wela meetlweng gomme meetlwa ya gola ya khupetša dimela tšeo di bego di tšweletše.+ 8  E nngwe e ile ya wela mobung o mobotse gomme ya thoma go tšweletša dienywa tše dintši go feta tša peu yeo e bjetšwego. E nngwe ya tšweletša go feta ga 100, e nngwe ga 60 gomme e nngwe ga 30.+ 9  Anke yo a nago le tsebe a kwe.”+ 10  Ka gona, barutiwa ba tla go yena ba re: “Ke ka baka la eng o bolela le batho ba o diriša dipapišo?”+ 11  A ba araba a re: “Modimo o le dumeletše gore le kgone go kwešiša diphiri tše kgethwa+ tša Mmušo wa magodimo, eupša batho ba ga se a ba dumelela. 12  Mang le mang yo a nago le selo, o tla fiwa dilo tše dintši gomme tša oketšega, eupša mang le mang yo a se nago selo, gaešita le seo a nago le sona o tla se tšeelwa.+ 13  Ke ka baka leo ke bolelago le bona ke diriša dipapišo, ka gobane le ge ba lebelela ga ba bone, le ge ba theetša ga ba kwe, ebile ga ba kwešiše.+ 14  Boporofeta bja Jesaya bo phethagala go bona. Boporofeta bjoo bo re: ‘Go kwa le tla kwa eupša le ka se kwešiše, le tla lebelela eupša le ka se bone.+ 15  Ka gobane dipelo tša batho ba di retetše, ba kwele ka ditsebe tša bona eupša ba se arabele. Ba tswaletše mahlo gore ba se sa bona selo, ba ba ba thiba ditsebe gore ba se kwe selo. Ka baka la seo ga ba kgone go kwešiša seo ba swanetšego go se dira, gomme ga ba sokologe e le gore nna ke ba fodiše.’+ 16  “Go thaba lena ka ge le bona dilo tše ebile le di kwa.+ 17  Ruri ke re go lena, baporofeta ba bantši le batho ba go loka ba be ba dumile go bona dilo tše le di bonago eupša ga se ba di bona,+ ebile ba be ba dumile go kwa dilo tšeo le di kwago eupša ga se ba di kwa. 18  “Bjale theetšang tlhaloso ya papišo ya mobjadi.+ 19   Peu yeo e bjetšwego kgauswi le tsela ke motho yo a kwago molaetša wa Mmušo wa Modimo eupša a se o kwešiše, ke moka yo mobe+ a tla gomme a tumola seo se bjetšwego pelong ya motho yoo.+ 20   Peu yeo e bjetšwego lekgwareng, yona ke motho yo a kwago molaetša wa Mmušo wa Modimo, a o amogela gateetee ka lethabo.+ 21  Eupša molaetša woo ga o tseme medu pelong ya gagwe. O o dumela ka nakwana, eupša ka morago ga ge go tsogile masetlapelo goba tlaišego ka baka la molaetša woo, o kgopša gateetee. 22   Peu yeo e bjetšwego meetlweng yona ke motho yo a kwago molaetša wa Mmušo, eupša dipelaelo tša bophelo lefaseng le*+ gotee le tshepišo ya maaka ya gore mahumo a a šireletša, tša khupetša molaetša woo gomme peu yeo ya se enywe dienywa.+ 23   Peu yeo e bjetšwego mobung o mobotse yona ke batho bao ba kwago molaetša wa Mmušo wa Modimo gomme ba o kwešiša, ke moka ba thoma go tšweletša dienywa tše dintši kudu go feta tša peu yeo e bjetšwego. Yo a tšweletša ga 100, yola a tšweletša ga 60, gomme yo mongwe a tšweletša ga 30.”+ 24  A ba anegela papišo e nngwe a re: “Mmušo wa magodimo o ka swantšhwa le motho yo a bjetšego peu e botse mašemong a gagwe. 25  Ge batho ba be ba robetše, lenaba la gagwe le ile la tla gomme la bjala sekoro* gare ga korong ke moka la tloga. 26  Ge korong yeo e gotše gomme e thoma go tšweletša dienywa, sekoro seo le sona se ile sa thoma go bonagala gore ke sekoro. 27  Ke moka bahlanka ba mong wa ntlo ba tla go yena ba re: ‘Mong wa rena, na ga se wa bjala peu e botse mašemong a gago? Bjale sekoro se se tšwa kae?’ 28  A re go bona: ‘Sekoro se se bjetšwe ke lenaba la ka.’+ Ke moka bahlanka bao ba re go yena: ‘Na o nyaka gore re yo se tumola?’ 29  A re go bona: ‘Aowa, ke tšhaba gore mohlomongwe le ka re ge le tumola sekoro la tumola le korong. 30  Di leseng di gole gotee go fihlela nakong ya puno, gomme ka nako yeo ke tla botša babuni ka re: Thomang pele ka go tumola sekoro, ke moka le se tleme dingata gore le ye le se fiše. Ka morago le bune korong le e iše ka ntlong ya ka yeo ke bolokelago dilo ka go yona.’”+ 31  A ba anegela papišo e nngwe a re: “Mmušo wa magodimo o swana le thoro ya mohlare wa mosetata yeo motho yo mongwe a ilego a e bjala mašemong a gagwe.+ 32  Ge e le gabotse, ke peu e nyenyane kudu go dipeu ka moka, eupša ge peu yeo e metše e feta merogo ka moka ka bogolo, gomme ya swana le mohlare woo dinonyana di dulago makaleng a wona.” 33  A ba botša papišo e nngwe a re: “Mmušo wa magodimo o swana le komelo yeo mosadi a e tšerego a e hlakanya le folouru ya dikhilokgerama tše 10, gomme a e duba go fihlela ge folouru yeo e dubilwego e kokomoga.”+ 34  Jesu o boditše mašaba dilo tše ka moka a diriša dipapišo. Ge e le gabotse, o be a sa bolele le bona ka ntle le go diriša dipapišo,+ 35  e le gore go phethagale seo Modimo a se boletšego a diriša moporofeta yo a ilego a re: “Ke tla bolela ke diriša dipapišo, ke tla tsebatša dilo tšeo e sa lego di utwa ge lefase le thoma go ba gona.”+ 36  Ka morago ga ge a phatlaladitše mašaba, o ile a ya ka ntlong. Ke moka barutiwa ba gagwe ba tla go yena ba re: “Re hlalosetše papišo ya sekoro sa mašemong.” 37  A re go bona: “Mobjadi wa peu e botse o swantšhetša Morwa wa motho. 38  Mašemo a swantšhetša lefase.+ Ge e le peu e botse yona e swantšhetša barwa ba Mmušo, eupša sekoro se swantšhetša barwa ba yo mobe,+ 39  gomme lenaba leo le se bjetšego le swantšhetša Diabolo. Nako ya puno e swantšhetša nako ya ge bofelo bja lefase bo le kgauswi, gomme babuni ba swantšhetša barongwa. 40  Ka baka leo, go no swana le ge sekoro se ile sa tumolwa gomme sa fišwa ka mollo, karolong ya mafelelo ya mehla ya bofelo* le gona go tla ba bjalo.+ 41  Morwa wa motho o tla romela barongwa ba gagwe, gomme ba tla tloša dilo ka moka tšeo di dirago gore batho ba dire sebe, ba tloša le batho ba go hloka molao Mmušong wa gagwe, 42  gomme ba ba lahlela sebešong sa mollo wo o tukago.+ Ba tla lla ba le moo ba ba ba lomantšha meno. 43  Ka nako yeo baloki ba tla phadima bjalo ka letšatši+ ba le Mmušong wa Tatago bona. Anke yo a nago le tsebe a kwe. 44  “Mmušo wa magodimo o swana le letlotlo leo le utilwego mašemong, leo monna yo mongwe a ilego a le hwetša gomme a le uta gape. Le gona, ka ge a be a thabile o ile a rekiša dilo ka moka tšeo a bego a na le tšona ke moka a reka mašemo ao.+ 45  “Le gona Mmušo wa magodimo o swana le rakgwebo, yo a nyakago dipheta tše dibotse.* 46  Ge a hweditše pheta e tee ya theko e kgolo, o ile a tloga gomme a rekiša dilo ka moka tšeo a bego a na le tšona kapelapela, ke moka a e reka.+ 47  “Le gona Mmušo wa magodimo o swana le nnete ya go rea dihlapi, yeo e theošeditšwego ka lewatleng gomme ya olela dihlapi tša mehuta ka moka. 48  Ge e tletše ba e gogela santeng ya kgauswi le lewatle, ke moka ba dula fase ba kgetha dihlapi tše dibotse+ ba di tsenya ka dibjaneng, eupša tša go se jewe+ ba di lahla. 49  Go tlo ba bjalo le karolong ya mafelelo ya mehla ya bofelo. Barongwa ba tla tšwa gomme ba hlaola batho ba babe go batho ba go loka, 50  ke moka ba ba lahlela sebešong sa mollo o tukago. Ba tla lla ba ba ba lomantšha meno* ba le moo. 51  Ka gona Jesu a ba botšiša a re: “Na le kwešišitše dilo tše ka moka?” Ba re go yena: “Ee.” 52  Ke moka a re go bona: “Ge e ba go le bjalo, morutiši yo mongwe le yo mongwe yo a rutilwego ka Mmušo wa magodimo o swana le mong wa ntlo yo a ntšhago dilo tše diswa le tša kgale lefelong leo a boloketšego matlotlo a gagwe go lona.” 53  Bjale ge Jesu a feditše go ba botša ka dipapišo tše ka moka a tloga moo. 54  Ge a boetše tikologong ya gabo,+ o ile a thoma go ruta batho sinagogeng ya bona, moo ba ilego ba makala gomme ba re: “Motho yo o tšere kae bohlale bjo le maatla a go dira mehlolo ye?+ 55  Na yo ga se yena morwa wa mmetli?+ Na mmagwe ga se Maria? Le gona na banababo ga se Jakobo, Josefa, Simone le Judase?+ 56  Le gona, na dikgaetšedi tša gagwe ka moka ga di dule le rena mo? Bjale dilo tše ka moka o di tšere kae?”+ 57  Ka gona ba kgopišega ka baka la seo a se boletšego.+ Eupša Jesu a re go bona: “Batho ba dula ba tšeela moporofeta godimo, eupša batho ba tikologong ya gabo le ba lapeng la gabo ba mo tšeela fase.”+ 58  Ga se a ka a dira mehlolo e mentši moo ka baka la ge batho ba moo ba be ba hloka tumelo.

Mengwalo ya Tlase

^ Goba, “tshepedišong ye ya dilo.” Bona Tlhaloso ya Mantšu.
^ Goba, “bjala ngwang goba mefoka.” Mo go bolelwa ka ngwang wo o swanago le korong woo o nago le mpholo.
^ Goba, “mafelelong a tshepedišo ya dilo.” Bona Tlhaloso ya Mantšu.
^ Phetolelo ya lentšu ka lentšu e re, “Diperela tše dibotse.” Diperela ke maswikana a bohlokwa.
^ Goba, “ba tsikitlanya meno.”

Ditshwanelo tša go tšweletša kgatišo ye