Ebangedi ya Mateo 21:1-46
-
Jesu o tsena Jerusalema bjalo ka motho yo a fentšego (1-11)
-
Jesu o hlwekiša tempele (12-17)
-
Mogo o a rogwa (18-22)
-
Jesu o botšišwa gore o tšea kae maatla a go dira dilo (23-27)
-
Papišo ya barwa ba babedi (28-32)
-
Papišo ya balemi bao e lego babolai (33-46)
-
Leswika le bohlokwa leo le lego khoneng ya moago le a ganwa (42)
-
21 Ge ba fihlile kgauswi le Jerusalema, ba ile ba ema Bethefage Thabeng ya Mehlware, gomme Jesu a roma barutiwa ba gagwe ba babedi,+
2 a re go bona: “Eyang motsaneng wola o lego kua pele gomme ge le fihla le tla hwetša tonki yeo e bofilwego e na le tonkana ya yona. Le di bofolleng le di tliše go nna.
3 Ge e ba motho yo mongwe a ka le botšiša dipotšišo, le re: ‘Morena o a di hloka.’ Ge le realo o tla napa a le dumelela gore le di tšee.”
4 Ge e le gabotse, se se diregile e le gore go phethagale seo Modimo a se boletšego a diriša moporofeta yo mongwe yo a itšego:
5 “Botšang morwedi wa Tsione le re: ‘Bona! Kgoši ya gago e tla go wena+ e le boleta+ e nametše tonki, ee, e nametše tonkana, e lego ngwana wa tonki.’”+
6 Ke moka barutiwa bao ba sepela gomme ba dira seo Jesu a ba laetšego sona.+
7 Ba ile ba tliša tonki le tonkana ya yona, ba bea diaparo tša bona tša ka ntle godimo ga tšona ke moka Jesu a namela tonkana.+
8 Batho ba bantši bao ba bego ba le lešabeng, ba ile ba ala diaparo tša bona tša ka ntle tseleng,+ mola ba bangwe ba be ba rema makala mehlareng ba a ala tseleng.
9 Mašaba a batho ao a bego a mo etile pele le ao a bego a mo šetše morago, a be a dulela go goeletša a re: “Modimo, re rapela gore o šireletše Morwa wa Dafida!+ Go šegofaditšwe yo a tlago ka leina la Jehofa!*+ Re rapela gore o mo šireletše, wena yoo o lego magodimodimong!”+
10 Ke moka ge a tsena Jerusalema, go ile gwa tsoga mpherefere gomme batho ka moka ba re: “Ke mang motho yo?”
11 Mašaba a batho a dulela gore: “Ke moporofeta Jesu,+ wa go tšwa Natsaretha ya Galelia!”
12 Ke moka Jesu a tsena ka tempeleng a raka batho ka moka bao ba bego ba rekiša le go reka ka tempeleng, a menola ditafola tša batho ba go tšhentšhetša ba bangwe tšhelete le dipanka tša bao ba rekišago maeba.+
13 Ke moka a re go bona: “Mangwalo a re: ‘Ntlo ya ka e tla bitšwa ntlo ya thapelo,’+ eupša lena le e fetoša lewa la mahodu.”+
14 Le gona, difofu le batho bao ba hlotšago ba ile ba ya go yena tempeleng gomme a ba fodiša.
15 Baperisita ba bagolo le ditsebi tša molao ba galefa+ ge ba bona mehlolo yeo a e dirilego le ge ba bona bašemane bao ba bego ba goeletša ka tempeleng ba re: “Modimo, re rapela gore o šireletše Morwa wa Dafida!”+
16 Ke moka ba re go yena: “Na o a ba kwa gore ba reng?” Jesu a re go bona: “Ee. Na ga se la ka la bala gore: ‘O dirile gore bana le masea ba go tumiše?’”+
17 A ba tlogela a tšwela ka ntle ga motse, a ya Bethania gomme a robala moo bošegong bjoo.+
18 Ge a boela motseng e sa le mesong, o ile a kwa a swerwe ke tlala.+
19 A bona mogo woo o bego o le kgauswi le tsela, a ya go wona, eupša a hwetša o se na mago e le matlakala feela,+ gomme a re go wona: “O se sa enywa le ka mohla.”+ Ke moka mogo woo wa napa wa oma.
20 Ge barutiwa ba bona seo se diragetšego, ba ile ba makala gomme ba re: “Go tlile bjang gore mogo wo o ome kapelapela?”+
21 Jesu a ba araba a re: “Ruri ke re go lena, ge e ba le na le tumelo ebile le sa belaele, le tla dira se ke se dirilego mogo wo, le gona ge le ka re go thaba ye: ‘Tloga mo o wele ka lewatleng,’ go tlo ba bjalo.+
22 Dilo ka moka tšeo le di rapelelago le na le tumelo le tla di hwetša.”+
23 Ge a tsene ka tempeleng, baperisita ba bagolo le banna ba bagolo ba setšhaba ba tla go yena ge a be a ruta, ba re: “O tšea kae maatla a go dira dilo tše, gona ke mang yo a go dumeletšego go di dira?”+
24 Jesu a ba araba a re: “Le nna ke tla le botšiša selo se setee feela. Ge e ba le ka nkaraba, gona le nna ke tla le botša gore maatla a go dira dilo tše ke a tšea kae. A ba botšiša a re:
25 Johane Mokolobetši o be a romilwe ke mang gore a kolobetše batho? Na o be a romilwe ke Modimo goba ke batho?” Ba thoma go boledišana ba re: “Ge e ba re ka re, ‘o be a romilwe ke Modimo,’* o tla re go rena: ‘Gona ke ka baka la eng le be le sa mo dumele?’+
26 Eupša re tšhaba gore ge re ka re: ‘O be a romilwe ke batho,’ lešaba le tla re galefela ka gobane le tšea Johane e le moporofeta.”
27 Ka gona, ba re go Jesu: “Ga re tsebe.” Ke moka yena a re go bona: “Gona le nna nka se le botše gore ke tšea kae maatla a go dira dilo tše.
28 “Le nagana eng ka se? Monna yo mongwe o be a na le bana ba babedi. A ya go wa mathomo a re go yena: ‘Ngwanaka, lehono sepela o yo šoma mašemong a meterebe.’
29 Yena ge a mo araba a re: ‘Nka se ye,’ eupša ka morago a itshola a ya.
30 A ya go wa bobedi, a mmotša se se swanago. Yena ge a mo araba a re: ‘Ke tla ya Tate,’ eupša a se ye.
31 Mo go ba babedi ba, ke mang yo a dirilego seo tatagwe a mo kgopetšego sona?” Bona ba re: “Ke wa mathomo.” Ke moka Jesu a re go bona: “Ruri ke re go lena, batho ba go patediša motšhelo le ba go gweba ka mmele ba tla le tsenela pele Mmušong wa Modimo.
32 Ka gobane Johane o tlile mo go lena a le bontšha tsela e nepagetšego eupša ga se la ka la mo dumela. Batho ba go patediša motšhelo le ba go gweba ka mmele ba dumetše go yena,+ eupša lena le ge le bone se, ga se la ka la itshola ebile ga se la ka la dumela go yena.
33 “Theetšang papišo e nngwe še: Go be go na le monna yo mongwe yo a bego a na le naga ebile a na le mašemo a meterebe+ moo, a a ageleditše ka leboto gomme a epa segatelo sa diterebe* a ba a aga le tora moo.+ Ke moka a se fa balemi gore ba se hlokomele, a ya nageng ya kgole.+
34 Ge sehla sa dienywa se fihla, o ile a roma bahlanka ba gagwe go balemi gore ba ye ba tšee dienywa tša gagwe.
35 Eupša balemi ba ile ba swara bahlanka ba gagwe, ba itia mohlanka o tee, ba bolaya yo mongwe gomme yo mongwe ba mo kgatla ka maswika.+
36 Ke moka a roma bahlanka ba bangwe gape ba go feta bale ba pele ka palo, eupša ba ba dira ka mo go swanago.+
37 Mafelelong a romela morwa wa gagwe go bona, a re: ‘Ba tla hlompha morwa wa ka.’
38 Ge balemi bao ba bona morwa wa gagwe ba boledišana ba re: ‘Yo ke yena mojabohwa,+ etlang re mmolayeng re tšee bohwa bja gagwe!’
39 Ka gona ba mo swara ba mo lahlela ka ntle ga mašemo a meterebe gomme ba mmolaya.+
40 Bjale ge mong wa mašemo a meterebe a etla, balemi bao o tla ba dira eng?”
41 Ba re go yena: “O tla ba bolaya, ke moka a fa balemi ba bangwe mašemo ao gore ba a hlokomele, e lego bao ba tlago go mo fa dienywa ge di eba gona ka sehla sa tšona.”
42 Jesu a re go bona: “Na ga sa nka la bala ka Mangwalong gore: ‘Leswika leo baagi ba le gannego le fetogile leswika le bohlokwa leo le lego khoneng ya moago?+ Se se tšwa go Jehofa ebile se a kgahliša mahlong a rena.’+
43 Ke ka baka leo ke le botšago gore, Modimo o tla le tšeela Mmušo wa gagwe gomme a o nea batho bao ba dirago seo a se nyakago.
44 Le gona motho yo a welago godimo ga leswika le o tla pšhatlagana.+ Motho yo mongwe le yo mongwe yo a welwago ke leswika le, le tla mo pšhatlaganya.”+
45 Ge baperisita ba bagolo le Bafarasei ba kwele dipapišo tša Jesu, ba ile ba lemoga gore o be a bolela ka bona.+
46 Le ge ba be ba nyaka go mo swara, ba be ba boifa mašaba a batho ka gobane a be a mo tšea e le moporofeta.+
