Ebangedi ya Mateo 2:1-23
2 Ka morago ga ge Jesu a belegwe Betlelehema+ ya Judea, nakong ya ge go buša Kgoši Heroda,*+ batho bao ba ithutetšego thuto ya dinaledi bao ba bego ba etšwa ka Bohlabela, ba ile ba tla Jerusalema,
2 ba re: “O kae ngwana yo a belegetšwego go tlo ba kgoši ya Bajuda?+ Ka gobane re bone naledi ge re be re le ka Bohlabela, bjale re tlile go mo khunamela.”
3 Ge Kgoši Heroda a ekwa seo a tenega, batho ka moka ba Jerusalema le bona ba tenega.
4 O ile a kgoboketša baperisita ba bagolo ka moka le ditsebi tša molao,* gomme a ba botšišiša gore Kriste* o be a tla belegelwa kae.
5 Ba re go yena: “O tlo belegelwa Betlelehema+ ya Judea, ka gobane moporofeta o ngwadile gore:
6 ‘Wena Betlelehema ya nageng ya Juda, ruri ga se wena motse wo o nyatšegago kudu gare ga babuši ba Juda! Ka gobane go wena go tla tšwa yo a bušago, yo a tlago go diša setšhaba sa ka sa Isiraele.’”+
7 Ke moka Heroda a bitša batho bao ba ithutetšego thuto ya dinaledi. O ile a ba biletša ka sephiring, a nyaka go kgonthišetša gore naledi yeo e tšweletše neng.
8 Ka morago a ba roma Betlelehema a re: “Eyang le yo nyaka ngwana yoo gabotse, gomme ge le mo hweditše, le boe le tle le mpotše e le gore le nna ke tle ke yo mo khunamela.”
9 Ka morago ga go kwa seo kgoši e bego e ba botša sona, ba ile ba sepela. Naledi yeo ba e bonego ge ba be ba le ka Bohlabela+ e ile ya ba eta pele go fihlela e ema ka godimo ga ntlo yeo ngwana yoo a bego a le go yona.
10 Ge ba bona naledi yeo ba ile ba thaba kudu.
11 Ge ba tsena ka ntlong ba hwetša ngwana yoo a na le Maria mmagwe, gomme ba khunamela ngwana yoo. Le gona ba ile ba bula mapokisi ao ba bego ba tlile le ona ba mo fa dimpho. Ba mo fa gauta, diorelo tše ditšhweu le senkgišabose sa mira.
12 Eupša ka ge Modimo a be a ba lemošitše torong+ gore ba se ke ba boela go Heroda, ba ile ba boela nageng ya gabo bona ka tsela e nngwe.
13 Ka morago ga ge ba tlogile, morongwa wa Jehofa* o ile a tšwelela go Josefa torong,+ a re: “Tsoga o tšee ngwana yo le mmagwe le tšhabele Egepeta gomme o dule moo go fihlela ke go botša gore o dire eng, ka gobane e se kgale Heroda o tlo tsomana le ngwana yo gore a mmolaye.”
14 Ka gona Josefa a tsoga a tšea ngwana yoo le mmagwe e le bošego gomme ba ya Egepeta.
15 O ile a dula moo go fihlela Heroda a hlokofala. Se se ile sa phethagatša seo Jehofa a se boletšego a diriša moporofeta wa gagwe, ge a be a re: “Ke ile ka bitša morwa wa ka kua Egepeta.”+
16 Ge Heroda a bona gore batho bao ba ithutetšego thuto ya dinaledi ba mo forile, o ile a galefa kudu. Ke moka a romela molaetša wa gore go bolawe bana ka moka ba bašemane ba mengwaga e mebedi le ya ka tlase ga moo ba kua Betlelehema le ditikologong tša yona ka moka. O ile a bala mengwaga yeo go ya le kamoo batho bao ba ithutetšego thuto ya dinaledi ba bego ba boletše ka gona.+
17 Ke moka gwa phethagala seo Modimo a se boletšego a diriša moporofeta Jeremia, ge a be a re:
18 “Go ile gwa kwagala sello sa motho yo a llago gabohloko kua Rama. Go be go lla Ragele+ a llela bana ba gagwe, ebile o be a sa nyake le go homotšwa ka gobane bana ba gagwe ga ba sa le gona.”+
19 Ka morago ga ge Heroda a hlokofetše, morongwa wa Jehofa o ile a tšwelela go Josefa torong+ kua Egepeta
20 a re: “Tsoga o tšee ngwana yoo le mmagwe gomme le ye nageng ya Isiraele, ka gobane bao ba bego ba nyaka go bolaya ngwana yoo ba hlokofetše.”
21 Ka gona, a tsoga a tšea ngwana yoo le mmagwe gomme ba boela nageng ya Isiraele.
22 Eupša ge a ekwa gore Arakelose, morwa wa Heroda, e be e le kgoši ya kua Judea go e na le gore kgoši e be Heroda tatagwe, o ile a tšhaba go ya moo. Le gona, ka ge Modimo a ile a mo lemoša torong+ o ile a ya tikologong ya Galelia.+
23 O ile a tla a dula motseng woo o bitšwago Natsaretha,+ e le gore go phethagale mantšu ao Modimo a a boletšego a diriša baporofeta ge a be a re: “O tla bitšwa Monatsaretha.”+
