Kutollo Yeo e Utolletšwego Johane 21:1-27
21 Ka bona legodimo le leswa le lefase le leswa+ ka gobane legodimo la pele le lefase la pele di be di se sa le gona,+ le lewatle+ ga le sa le gona.
2 Ka bona le motse o mokgethwa, e lego Jerusalema e Mpsha, o theoga o etšwa legodimong go Modimo+ o itokišitše go swana le monyadiwa yo a ikgabišeditšego monna wa gagwe.+
3 Ke moka, ka kwa lentšu leo le hlabošago le le tšwago setulong sa bogoši le re: “Bonang! Tente ya Modimo e bathong, o tla dula le bona gomme bona e tla ba batho ba gagwe. Le gona Modimo ka boyena o tla ba le bona.+
4 Modimo o tla phumola megokgo ka moka mahlong a bona.+ Go ka se sa ba le manyami, sello goba bohloko,+ le lehu le ka se hlwe le sa ba gona.+ Dilo tša pele di fetile.”
5 Yo a dutšego setulong sa bogoši+ a re: “Bonang! Dilo ka moka ke di dira gore e be tše diswa.”+ A bolela gape a re: “Ngwala mantšu a ka gobane a a tshepega ebile ke a nnete.”
6 Ke moka a re go nna: “Mantšu a a phethagetše! Ke nna Alfa le Omega,* mathomo le mafelelo.+ Yo mongwe le yo mongwe yo a nyorilwego ke tla mo fa meetse ao a tšwago sedibeng ao a fago bophelo. Ke tla mo fa ona mahala.+
7 Dilo tše di tla hwetšwa ke motho yo mongwe le yo mongwe yo a tlago go fenya lefase gomme nna ke tla ba Modimo wa gagwe, yena ya ba morwa wa ka.
8 Eupša mafšega, ba go hloka tumelo,+ bao ba dirago dilo tše di šišimišago, babolai,+ bao ba itshwarago gampe ka tša thobalano,*+ bao ba dirišanago le matemona, bao ba rapelago medimo ya diswantšho le batho ka moka bao ba bolelago maaka+ ba letetšwe ke go lahlelwa bodibeng bja mollo wo o fišago kudu.*+ Se se swantšhetša lehu la bobedi.”+
9 Yo mongwe wa barongwa ba šupago yo a bego a swere dibjana tše šupago tšeo di bego di tletše dikotlo tše šupago tša mafelelo,+ o ile a tla go nna a re: “Etla ke go bontšhe monyadiwa, yena mosadi wa Kwana.”+
10 Ka gona a nthwala a nkiša thabeng e kgolo e telele a diriša moya o mokgethwa. Ke moka a mpontšha motse o mokgethwa wa Jerusalema o theoga o etšwa legodimong go Modimo+
11 o na le letago la Modimo.+ Motse woo o be o phadima go swana le leswika le bohlokwa kudu, e lego leswika leo le bitšwago jasepere leo le phadimago go swana le galase.+
12 O be o ageleditšwe ka leboto le legolo kudu ebile o na le dikeiti tše 12. Keiting e nngwe le e nngwe go be go na le morongwa gomme dikeiting tšeo, go be go ngwadilwe maina a meloko e 12 ya barwa ba Isiraele.
13 Ka bohlabela go be go na le dikeiti tše tharo, ka leboa tše tharo, ka borwa tše tharo gomme ka bodikela le gona e le tše tharo.+
14 Leboto leo le bego le ageleditše motse, le be le agilwe godimo ga maswika a 12 ao go bego go dirilwe fantešeni ka ona. Maswikeng ao, go be go ngwadilwe maina a 12 a baapostola ba 12+ ba Kwana.
15 Yo a bego a bolela le nna, o be a swere lehlaka la gauta la go meta, e le gore a mete motse, dikeiti tša wona le leboto la wona.+
16 Motse woo o be o na le mahlakore a mane ao a lekanago. Botelele bja wona bo be bo lekana le bophara bja wona. Ge a meta leboto la motse woo ka lehlaka leo a bego a le swere, a hwetša e le dikhilomithara tše e ka bago tše 2 220.* Botelele bja wona, bophara bja wona le bophagamo bja wona di a lekana.
17 A meta leboto a hwetša e le dikubiti tše 144.* Tsela yeo a metilego ka yona, e be e swana tlwaa le yeo batho ba metago ka yona. O metile go ya ka kelo ya motho, yeo ka nako e swanago e lekanago le ya morongwa.
18 Leboto la wona le be le agilwe ka leswika leo le bitšwago jasepere+ gomme dilo ka moka tšeo di bego di le ka motseng woo di be di dirilwe ka gauta yeo e sego ya tswakwa le selo yeo e bontšhago tša ka gare go swana le galase.
19 Difantešeni tša leboto la motse woo, di be di kgabišitšwe ka mehuta ka moka ya maswika a bohlokwa. Fantešeni ya mathomo e be e kgabišitšwe ka leswika leo le bitšwago jasepere, ya bobedi e le safire, ya boraro e le khalesedone, ya bone e le emeralede,
20 ya bohlano e le saredonikisi, ya botshelela e le sarediase, ya bošupa e le kirisolite, ya boseswai e le berile, ya bosenyane e le topase, ya bolesome e le kirisoporase, ya bo-11 e le haisinthe gomme ya bo-12 e kgabišitšwe ka leswika leo le bitšwago amethisete.
21 Le gona, dikeiti tše 12 e be e le dipheta* tše 12. Keiti e nngwe le e nngwe e be e dirilwe ka pheta e tee. Seterata se segolo sa motse se be se dirilwe ka gauta yeo e sego ya tswakwa le selo yeo e bontšhago tša ka gare go swana le galase.
22 Ga se ka bona tempele motseng woo ka gobane Jehofa* Modimo Ramatlaohle+ ke tempele ya wona le Kwana ke tempele ya wona.
23 Motse woo o be o sa hloke seetša sa letšatši goba sa ngwedi ka gobane letago la Modimo le be le o bonegela+ gomme lebone la wona e be e le Kwana.+
24 Seetša sa wona se tla bonegela tsela yeo batho ba ditšhaba ba sepelago go yona+ gomme dikgoši tša lefase di tla tliša letago la tšona motseng woo.
25 Dikeiti tša wona di ka se tsoge di tswaletšwe ka gobane go tla dula e le mosegare gomme bošego bo ka se ke bja ba gona moo.+
26 Batho ba ditšhaba ba tla tagafatša motse woo ba ba ba o hlompha.+
27 Eupša selo le ge e le sefe seo se šilafetšego se ka se tsene go wona, le motho le ge e le ofe yo a dirago dilo tše di šišimišago ebile a bolela maaka a ka se tsene go wona.+ Go e na le moo, go tla tsena feela bao ba ngwadilwego pukung ya Kwana ya bophelo.+
Mengwalo ya tlase
^ Alfa ke tlhaka ya mathomo ya ditlhaka tša Segerika gomme Omega ke tlhaka ya mafelelo ya tšona.
^ Phetolelo ya lentšu ka lentšu e re, “letsheng le le tukago mollo le sebabole.”
^ Bona Tlhaloso ya Mantšu.
^ Phetolelo ya lentšu ka lentšu e re, “disetediamo tše 12 000.” Setediamo se be se lekana le dimithara tše 185. Bona Dit. B14.
^ Phetolelo ya lentšu ka lentšu e re, “diperela.”
