Kutollo Yeo e Utolletšwego Johane 5:1-14
5 Ka bona yo a dutšego setulong sa bogoši+ a swere lengwalo la go phuthwa ka letsogong la gagwe le letona. Lengwalo leo le be le ngwadilwe ka mahlakoreng a mabedi, le tlemilwe la tiišwa ka mahuto a šupago.
2 Ka bona morongwa yo a nago le maatla a goeletša ka lentšu la godimo a re: “Ke mang yo a swanelwago ke go bula lengwalo le la go phuthwa le go tlemolla mahuto a lona?”
3 Eupša legodimong, lefaseng le ka tlase ga lefase gwa se be le motho yo a kgonago go bula lengwalo leo goba go le bala.
4 Ke ile ka lla kudu ka gobane go be go se na yo a swanelwago ke go bula lengwalo leo goba go le bala.
5 Eupša yo mongwe wa bagolo a re go nna: “Tlogela go lla. Tau ya moloko wa Juda,+ e lego modu+ wa Dafida,+ e fentše.+ Ka gona, e swanelega go bula lengwalo la go phuthwa le go tlemolla mahuto a lona a šupago.”
6 Ke ile ka bona kwana+ yeo okarego e hlabilwe+ e eme gare ga setulo sa bogoši le gare ga dibopiwa tše di phelago tše nne le gare ga bagolo.+ Kwana yeo e be e na le manaka a šupago le mahlo a šupago. Mahlo ao a swantšhetša meoya e šupago ya Modimo+ yeo a e rometšego lefaseng ka moka.
7 Gateetee Kwana yeo ya batamela ya tšea lengwalo leo le lego ka letsogong le letona la Modimo yo a dutšego setulong sa bogoši.+
8 Ge Kwana yeo e tšere lengwalo, dibopiwa tše di phelago tše nne le bagolo ba 24+ ba ile ba khunama pele ga Kwana. Mogolo yo mongwe le yo mongwe o be a swere harepa le sebjana se senyenyane sa gauta seo se bego se tletše ka diorelo. (Diorelo di swantšhetša dithapelo tša bakgethwa.)+
9 Ba be ba opela kopelo e mpsha+ ba re: “O swanelwa ke go tšea lengwalo la go phuthwa le go tlemolla mahuto a lona, ka gobane o ile wa hlabja gomme ka madi a gago wa reka batho ba go tšwa melokong ka moka, malemeng ka moka, merafong ka moka le ditšhabeng ka moka+ gore ba tle ba hlankele Modimo.+
10 Le gona, o ba dirile gore e be dikgoši+ le baperisita ba Modimo wa rena,+ ebile ba tla buša+ lefase.”
11 Ka buša ka bona barongwa ba bantši ba dikologile setulo sa bogoši, dibopiwa tše di phelago le bagolo, ka ba ka kwa le lentšu la bona. Palo ya bona e be e le 10 000 ge e balwa ga 10 000* ebile e le ba diketekete.+
12 Ba be ba bolela ka lentšu le le hlabošago ba re: “Kwana yeo e bego e hlabilwe+ e swanelwa ke go ba le maatla a go laola, mahumo, bohlale, maatla, tlhompho, letago le go tumišwa.”+
13 Ka kwa dibopiwa ka moka tšeo di lego legodimong le lefaseng le ka tlase ga lefase+ le lewatleng le dilo ka moka tšeo di lego go tšona, di re: “Anke Kwana+ le yo a dutšego setulong sa bogoši+ ba tumišwe,+ ba hlomphiwe, ba hwetše letago le maatla go ya go ile.”+
14 Dibopiwa tše di phelago tše nne di be di re: “Amene!” Ke moka bagolo ba khunama ba rapela.
Mengwalo ya Tlase
^ Phetolelo ya lentšu ka lentšu e re, “e be e le dimiriate tša dimiriate.”
