Kutollo Yeo e Utolletšwego Johane 3:1-22
3 “Ngwalela morongwa wa phuthego ya Sarede o re: Yo a nago le meoya e šupago ya Modimo+ le dinaledi tše šupago+ o re: ‘Ke tseba dilo tšeo o di dirago ebile ke tseba gore o bonagala eka o a phela, eupša o hwile.+
2 Dula o phakgame+ gomme o matlafatše dilo tšeo di lego kgauswi le go hwa, ka gobane ga o dire dilo ka moka tšeo Modimo wa ka a letetšego gore o di dire.
3 Ka gona tšwela pele o gopola kamoo o ilego wa amogela molaetša ka gona le go o kwa ka gona. O phele ka go dumelelana le wona gomme o itshole.+ Ruri ge e ba o ka se tsoge ke tla tla go wena go swana le lehodu+ ebile o ka se tsoge o tsebile gore ke tlo tla nako mang.+
4 “‘Le ge go le bjalo, o na le batho ba sego kae Sarede bao ba sa kago ba šilafatša diaparo tša bona,+ ebile ba tla sepela le nna ba apere diaparo tše ditšhweu,+ ka gobane ba a swanelega.
5 Yo a fenyago+ o tla apešwa diaparo tša ka ntle tše ditšhweu+ ebile nka se tsoge ke phumotše leina la gagwe pukung ya bophelo,+ eupša ke tla bolela pele ga Tate le pele ga barongwa ba gagwe gore ke tseba leina la gagwe.+
6 Anke yo a nago le tsebe a kwe seo moya o mokgethwa o se botšago diphuthego.’
7 “Ngwalela morongwa wa phuthego ya Filadelefia o re: Yo mokgethwa,+ yo a bolelago nnete,+ yena yo a nago le senotlelo sa Dafida,+ yo a rego ge a butše mabati gwa se be le yo a a tswalelago, gomme a re ge a a tswaletše, gwa se be le yo a a bulago, o re:
8 ‘Ke tseba dilo tšeo o di dirago. Ke butše lebati+ leo le lego ka pele ga gago leo go se nago motho yo a ka le tswalelago. Ke a tseba gore o ile wa kwa seo ke se boletšego wa ba wa botegela leina la ka le ge o se na maatla a mantši.
9 Bao ba bolelago maaka ba re ke bona Bajuda eupša e le sehlopha se se tšwago go Sathane,+ ke tla ba dira gore ba tle ba khuname pele ga dinao tša gago ka ba ka ba dira gore ba tsebe gore ke a go rata.
10 Ka ge o kgotleletše+ go swana le nna, ke tla go šireletša nakong+ ya ge batho ba mo lefaseng ka moka, ba hlahlobiwa go bona ge e ba ba dira se se lokilego.
11 Ke tla kapelapela.+ Swarelelang dilong tše dibotse tšeo le nago le tšona e le gore go se be le motho yo a le tšeelago mphapahlogo wa lena.+
12 “‘Yo a fenyago, ke tla mo dira philara tempeleng ya Modimo wa ka ebile a ka se tsoge a tšwile moo tempeleng le gatee. Le gona, phatleng ya motho yoo, ke tla ngwala leina la Modimo wa ka+ le leina la motse wa Modimo wa ka, e lego Jerusalema e Mpsha+ yeo e theogago e etšwa legodimong go Modimo wa ka, ka ba ka ngwala le leina la ka le leswa.+
13 Anke yo a nago le tsebe a kwe seo moya o mokgethwa o se botšago diphuthego.’
14 Ngwalela morongwa wa phuthego ya Laoditsea+ o re: Amene,+ e lego hlatse+ e botegago le ya nnete,+ yena yoo Modimo a mmopilego mathomong a tlholo ka moka,+ o re:
15 ‘Ke tseba dilo tšeo o di dirago. Ke a tseba gore ga o tonye ebile ga o fiše. Ke duma okare nkabe o tonya goba o fiša.
16 Bjale ka ge o le magareng, o sa fiše+ ebile o sa tonye,+ ke tlo go tshwa.
17 Ka gobane o ipotša gore: “Ke humile+ ebile ke na le mahumo a mantši, ga go na selo seo ke se hlokago.” Eupša ga o tsebe gore ga se wa thaba, o a šokiša, o modiidi, o foufetše ebile ga se wa apara selo.
18 Ke ka baka leo ke go eletšago gore o reke gauta yeo e hlwekišitšwego ka mollo mo go nna e le gore o tle o hume gomme o reke diaparo tše ditšhweu e le gore o apare gore ba bangwe ba se ke ba bona gore ga se wa apara selo ke moka wa šala o lewa ke dihlong,+ o be o reke le sehlare sa go tlotša mahlo a gago+ e le gore o kgone go bona.+
19 “‘Ke kgala batho bao ke ba ratago ka moka ebile ke a ba laya.+ Ka gona eba mafolofolo o be o itshole.+
20 Ke eme lebating ke a kokota. Ge e ba motho a ka kwa lentšu la ka gomme a bula lebati, ke tla tsena ka ntlong ya gagwe gomme nna le yena ra ja dijo tša mantšiboa re le gotee.
21 Yo a fenyago+ ke tla mo dumelela gore a dule le nna setulong sa ka sa bogoši,+ go no swana le ge le nna ke ile ka fenya gomme ka dula+ le Tate setulong sa gagwe sa bogoši.
22 Anke yo a nago le tsebe a kwe seo moya o mokgethwa o se botšago diphuthego.’”
