Kutollo Yeo e Utolletšwego Johane 8:1-13
8 Ge Kwana+ e tlemolla lehuto la bošupa,+ legodimong go ile gwa homola mo e ka bago ka metsotso e 30.
2 Ke moka ka bona barongwa ba šupago+ bao ba emago pele ga Modimo. Modimo o ile a fa barongwa ba diphalafala tše šupago.
3 Morongwa yo mongwe yo a bego a swere sebjana sa gauta sa diorelo o ile a fihla a ema aletareng.+ O ile a fiwa diorelo tše dintši+ gore a di fiše aletareng ya gauta+ yeo e bego e le pele ga setulo sa bogoši nakong ya ge bakgethwa ba be ba rapela.
4 Muši wa diorelo tšeo morongwa a bego a di fiša o ile wa rotogela go Modimo gotee le dithapelo+ tša bakgethwa.
5 Ka yona nako yeo morongwa a tšea sebjana sa diorelo, a se tlatša ka magala ao a tukago ao a tšwago aletareng a a lahlela lefaseng. Gwa kwagala medumo lefaufaung, gwa ba le magadima+ le tšhišinyego ya lefase. Ke moka ka kwa le mantšu.
6 Barongwa ba šupago bao ba swerego diphalafala+ ba itokišeletša go di letša.
7 Wa mathomo a letša phalafala ya gagwe. Gwa ba le sefako le mollo wo o tswakanego le madi gomme tša lahlelwa lefaseng.+ Ke moka go dikarolo tše tharo tša lefase, karolo e tee e ile ya swa. Go dikarolo tše tharo tša mehlare, karolo e tee e ile ya swa le dimela ka moka tše ditala tša swa.+
8 Morongwa wa bobedi o ile a letša phalafala ya gagwe. Selo se sengwe seo se tukago mollo se ile sa lahlelwa ka lewatleng, e be e le se segolo tše e kego ke thaba.+ Go dikarolo tše tharo tša lewatle karolo e tee e ile ya fetoga madi.+
9 Go dikarolo tše tharo tša diphedi tša ka lewatleng karolo e tee e ile ya hwa.+ Dikepe di ile tša arolwa ka dikarolo tše tharo gomme dikepe tša karolo e tee tša robega.
10 Morongwa wa boraro a letša phalafala ya gagwe. Naledi e kgolo yeo e phadimago go swana le lebone e ile ya wa e etšwa legodimong. E ile ya wela karolong e tee ya dikarolo tše tharo tša dinoka le didiba tša meetse.+
11 Leina la naledi yeo ke Lengana.* Go dikarolo tše tharo tša meetse karolo e tee e ile ya galaka go swana le lengana. Meetse ao a ile a bolaya batho ba bantši ka gobane a be a galaka.+
12 Morongwa wa bone a letša phalafala ya gagwe. Ke moka go dikarolo tše tharo tša letšatši karolo e tee e ile ya swifala,+ go dikarolo tše tharo tša ngwedi karolo e tee e ile ya swifala gomme go dikarolo tše tharo tša dinaledi karolo e tee e ile ya swifala.+ Seo se ile sa dira gore go dikarolo tše tharo tša mosegare, karolo e tee e hloke seetša le gore go dikarolo tše tharo tša bošego, karolo e tee le yona e hloke seetša.
13 Ka bona ntšhu e fofa gare ga legodimo ka ba ka e kwa e goeletša e re: “Bao ba dutšego lefaseng ba tlo welwa ke masetlapelo a magolo+ ka baka la modumo wo o dirwago ke diphalafala tšeo barongwa ba bararo ba lego kgauswi le go di letša.”+
Mengwalo ya Tlase
^ Lengana ke semela sa go galaka.
