Kutollo Yeo e Utolletšwego Johane 13:1-18
13 Drakone e ile ya ema santeng ya lewatle e sa šikinyege.
Ka bona sebata+ se rotoga se etšwa lewatleng+ se na le manaka a lesome le dihlogo tše šupago, manakeng a sona go be go na le mefapahlogo e lesome, eupša dihlogong tša sona go na le maina ao a rogago Modimo.*
2 Bjale sebata seo ke se bonego se be se swana le nkwe, eupša maoto* a sona a swana le a bere gomme molomo wa sona o swana le wa tau. Ke moka drakone+ ya fa sebata maatla a sona le setulo sa sona sa bogoši le maatla a magolo a go buša.+
3 Ka bona eka e nngwe ya dihlogo tša sona e gobetše kudu, eupša ntho yeo e nyakilego e se bolaya e ile ya fola,+ gomme batho lefaseng ka moka ba latela sebata ba maketše.
4 Ba rapela drakone ka gobane e file sebata maatla a go buša. Ke moka ba rapela sebata ba re: “Ke mang yo a swanago le sebata, gona ke mang yo a ka lwago le sona?”
5 Sebata seo sa fiwa maatla a go ikgantšha le a go bolela dilo tše mpe ka Modimo, sa ba sa fiwa le maatla a go itaola ka dikgwedi tše 42.+
6 Sa bula molomo wa sona sa roga Modimo,+ sa roga leina la gagwe, sa roga lefelo leo a dulago go lona, sa ba sa roga le bao ba dulago legodimong.+
7 Se ile sa dumelelwa go lwa le bakgethwa le go ba fenya,+ sa ba sa fiwa le maatla a go laola batho ba meloko ka moka, batho ba merafo ka moka, batho ba go bolela maleme ka moka le batho ba ditšhaba ka moka.
8 Batho ka moka bao ba dulago lefaseng ba tla se rapela. Go tloga ge lefase le eba gona, ga go na yo leina la gagwe le ilego la ngwalwa ka lengwalong la go phuthwa la bophelo+ la Kwana yeo e ilego ya bolawa.+
9 Anke yo a nago le tsebe a kwe.+
10 Ge e ba motho a swanetše go išwa bothopša, o tla išwa bothopša. Ge e ba motho a ka bolaya ka sabola,+ le yena o swanetše go bolawa ka yona. Ke ka baka leo bakgethwa+ ba swanetšego go kgotlelela+ le go ba le tumelo.+
11 Ke moka ka bona sebata se sengwe se rotoga se etšwa lefaseng. Se be se na le manaka a mabedi ao a swanago le a kwana. Se ile sa thoma go bolela go swana le drakone.+
12 Se diriša maatla ka moka a go laola a go swana le a sebata sa pele,+ sebata sa pele se se lebeletše. Se dira gore lefase le batho bao ba dulago go lona ba rapele sebata sa pele, seo ntho ya sona yeo e nyakilego e se bolaya e bego e fodile.+
13 Se dira mehlolo e megolo ebile se dira gore mollo o theogele lefaseng o etšwa legodimong batho ba lebeletše.
14 Se timetša bao ba dulago lefaseng ka baka la mehlolo yeo se bego se dumeletšwe go e dira pele ga sebata sa pele. Le gona se botša batho bao ba dulago lefaseng gore ba direle sebata sa pele seswantšho+ seo se bego se na le ntho ya sabola yeo e fodilego.+
15 Se ile sa dumelelwa gore se fe seswantšho sa sebata sa pele moya wa bophelo, e le gore seswantšho seo se kgone go bolela le go dira gore batho ka moka bao ba ganago go se rapela ba bolawe.
16 Se gapeletša batho ka moka gore ba swaiwe letsogong la bona le letona le diphatleng tša bona. E ka ba ba bagolo le ba banyenyane, bahumi le badiidi, le bao ba lokologilego le makgoba,+
17 le gore go se ke gwa ba le motho yoo a kgonago go reka goba go rekiša a se na leswao, e lego leina+ la sebata goba nomoro ya leina la sona.+
18 Anke yo a nago le temogo a balele palo ya sebata, ka gobane ke palo ya batho. Palo ya sebata seo ke 666.+ Motho yo a lego bohlale ke yena feela a tlago go kwešiša se.
