KULAMAMILIYONI amaKhristu angananziyo iKhisimusi. Kambe ayazisola yini ngokwenza njalo? Ayakhutheka yini? Abantwababo ke? Babona bencitshwa ubunandi yini? Zwana ukuthi oFakazi bakaJehova endaweni ezitshiyeneyo zomhlaba bathini ngendaba le.

Ukukhumbula uJesu Khristu: “Ngingakabi nguFakazi kaJehova ngangihamba gqo etshetshi. Nxa ngangihambile kwakuyabe kuyiKhisimusi loba i-Easter. Lanxa ngangihamba, ngangingacabangi ngitsho ngoJesu Khristu. Khathesi angisananzi iKhisimusi kodwa kabili ngeviki ngiyahamba emhlanganweni webandla futhi sengitshela labanye ukuthi iBhayibhili lithini ngoJesu.”—U-EVE, OSE-AUSTRALIA.

Intokozo ebakhona nxa usipha: “Ngiyathaba kakhulu nxa umuntu engangipha isipho ngingalindelanga. Ngiyazithanda izipho ezibuya ngingacabangeli. Ngiyakuthanda ukwenzela abanye amakhadi lokudweba imifanekiso ngoba kwenza bathabe futhi lami kwenza ngithokoze.”—UREUBEN, OSENORTHERN IRELAND.

Ukunceda abaswelayo: “Siyakukholisa ukuphekela abantu abagulayo. Kwesinye isikhathi siyabaphathela amaluba lamakhekhe loba isipho nje esizabenza bathabe. Siyakukholisa lokho ngoba abantu abagulayo sibavakatshela loba yisiphi isikhathi somnyaka.”—U-EMILY, OSE-AUSTRALIA.

Imuli iyamanyana: “Nxa imuli yethu ihlangana ndawonye abantwana babazazi zonke izihlobo zabo abantu bezikholisela. Asimeleli isikhathi esisodwa phakathi lomnyaka ukuthi sibuthane siyimuli futhi bonke emulini bayakwazi ukuthi siyabavakatshela ngoba siyabathanda.”—UWENDY, OSECAYMAN ISLANDS.

Ukuthula: “NgeKhisimusi abantu bayabe belezinto ezinengi okumele bazenze okokuthi ngabalutshwane kakhulu abacabanga ngokuthula. Sengifundile ukuthi iBhayibhili lisithembisa ukuthi sizahlala kuhle esikhathi esizayo. Ngiyazwisisa ukuthi abantwabami bazakholisa emhlabeni omutsha.”—USANDRA, OSESPAIN.