Sengiwuzwisisa Umthetho KaNkulunkulu Omayelana Legazi
Udokotela Uyasixoxela Indaba Yakhe
NGANGIMI phambi kweqembu labodokotela ngifinqa okutholakeleyo ngemva kokuhlolwa kwesidumbu. Ngathi: “Esikunanzeleleyo yikuthi okuyikho okumbuleleyo yikufa kwama-red cells awegazi lokwehluleka ukusebenza kuhle kwezinso okubangelwe yikufakwa igazi elinengi.” Umuntu owayebhubhile wayelemvukuzane.
Omunye udokotela owayelesikhundla esedlula esami wasukuma wakhuluma ezondile wathi, “Utsho ukuthi simfake igazi elingayisilo?” Ngamphendula ngathi, “Ayisikho engikutshoyo.” Ngabatshengisa amapikitsha ayetshengisa izinso zomufi, ngasengisithi: “Siyazibonela ukuthi ukufa kwama-red cells amanengi yikho okubangele ukwehluleka kokusebenza kuhle kwezinso.” a Izinto zaba nzima, kwathunqa uthuli kuphikiswana futhi ngangisesaba. Lanxa mina ngangingudokotela osesemutsha yena ephezulu khonale angizange ngesabe ukukhuluma iqiniso linjalo.
Ngesikhathi kusenzakala konke lokhu ngangingakabi nguFakazi kaJehova. Ngazalwa ngo-1943 eSendai, idolobho elisenyakatho eJapan. Ubaba wayengudokotela yikho lami ngakhetha ukufundela ukuba ngudokotela. Ngomnyaka wami wesibili ngisesikolo ngo-1970 ngatshada lentombi okuthiwa nguMasuko.
Ukuba Ngudokotela
UMasuko wayesebenza ukuze ancedise ngezindleko njengoba mina ngangisesesikolo. Ngangikukholisa engangikufunda esikolo. Ngangisala ngibambe owangaphansi ngibona indlela umzimba womuntu obunjwe ngayo. Kodwa kwakungakaze kufike engqondweni yami ukucabanga ngokuthi kuloMdali. Ngangizitshela ukuthi ukuchwayisisa ngezempilakahle kuzangenza ngikwazi ukuthi ngiphilelani. Ngathi sengingudokotela ngakhetha ukuthi ngifunde okunengi ngemikhuhlane etshiyeneyo ukuthi injani, ibangelwa kuyini lokuthi iphetha ngani.
Ngathi sengihlole izidumbu ezinengi zabantu ababulawa yimvukuzane ngaqalisa ukuthandabuza ukuthi ukufakwa igazi kuyanceda. Abantu abahlutshwa yimvukuzane bangaba legazi elilutshwana futhi baphele amandla. Indlela abelatshwa ngayo ingenza uhlupho lolu lube lukhulu yikho odokotela bajayele ukubatshela ukuthi bafakwe igazi. Kodwa ngananzelela ukuthi ukufakwa igazi kungabangela ukuthi imvukuzane imemetheke. Lamuhla odokotela abanengi sebekwazi ukuthi ukufaka igazi emuntwini olemvukuzane kubangela ukuthi aphele amandla kakhulu, okungenza lokuthi imvukuzane ebesithule iphinde ivuke njalo kuba nzima ukuthi umuntu lo asile. b
Ngo-1975 kwenzakala indaba engiyilandise ekuqaliseni. Udokotela owayetshinga wayeyisikhwicamfundo esihlola ngemikhuhlane yegazi futhi nguye owayeselapha isigulane esabhubhayo. Yikho wazonda wabila esizwa ngisithi ukufakwa igazi yikho okubangele ukuthi isigulane sife. Lanxa kunjalo ngaqhubeka lengxoxo yami njalo laye wacina ehlise umoya.
Ukugula Lokufa Kuzaphela
Ngalesosikhathi umkami wavakatshelwa ngomunye ugogo owayenguFakazi kaJehova. Ugogo lo wasebenzisa ibala elithi “Jehova” ngesikhathi exoxa laye futhi umkami wasembuza ukuthi ukhuluma ngobani. Wamphendula wathi, “UJehova libizo likaNkulunkulu weqiniso.” UMasuko wayevele ekuthanda ukubala iBhayibhili kusukela esesemncane kodwa iBhayibhili ayelisebenzisa lalisithi “NKOSI” esikhundleni sebizo likaNkulunkulu. Khathesi wayesefunde ukuthi uNkulunkulu ulebizo.
UMasuko wahle waqalisa ukufunda iBhayibhili logogo lo onguFakazi. Ngathi ngifika endlini ngivela emsebenzini kwakungabo-1 ekuseni, umkami wangithabela engitshela ukuthi iBhayibhili lithi ukugula lokufa kuzaphela du! Ngathi kuye, “Kungaba yinto enhle sibili leyo.” Waseqhubeka wathi, “Njengoba umhlaba omutsha ususeduze, angifuni ukuthi udlalise isikhathi sakho.” Ngacabanga ukuthi uthi ngiyekele ukuba ngudokotela yikho ngazonda futhi lokhu kwenza saxabana.
Umkami kazange ayekele ukungixoxela ngoJehova. Wayethandaza kuJehova emcela ukuthi amncedise athole imibhalo ezangisiza njalo wayengitshengisa amavesi lawo. Ivesi eyangithinta kakhulu umTshumayeli 2:22, 23 othi: ‘Umuntu uzuzani ngawo wonke umsebenzi wakhe onzima kanye lesifiso sakhe esimfuqa ukuthi asebenze nzima ngaphansi kwelanga? Ebusuku inhliziyo yakhe ayiphumuli. Lalokhu akuncedi ngalutho.’ Yikho kanye engangikwenza, ngangisebenza ubusuku lemini kodwa ngangingathokozi ngitsho.
Ngelinye ilanga kungeSonto ekuseni ngo-July 1975, umkami wayesehambile emhlanganweni eWolu yoMbuso yaboFakazi bakaJehova, ngasengicabanga ukuthi ngimlandele. Umkami wamangala engibona futhi oFakazi bangamukela ngazo zombili. Kusukela mhlalokho ngasengihamba maviki wonke ngeSonto. Phose ngemva kwenyanga, omunye ubaba onguFakazi waqalisa ukufunda lami iBhayibhili. Umkami wabhabhathizwa ngemva kwenyanga ezintathu eqalise ukufunda laboFakazi bakaJehova.
Ukwamukela Okutshiwo NguNkulunkulu Ngegazi
Ngafunda ukuthi iBhayibhili lithi amaKhristu ‘axwaye igazi.’ (ImiSebenzi 15:28, 29; UGenesisi 9:4) Njengoba ngasengivele ngithandabuza ukuthi ukufakwa igazi kuyanceda, akuzange kungithwalise nzima ukwamukela okutshiwo nguNkulunkulu ngegazi. c Ngacabanga ngathi, ‘Nxa kuyikuthi kuloMdali futhi kuyikho lokho akutshoyo kutsho ukuthi kuqondile.’
Ngafunda lokuthi okwenza abantu bagule futhi bafe yisono esasithatha ku-Adamu. (KwabaseRoma 5:12) Ngalesosikhathi ngangichwayisisa ngokuqina lokuncipha kwemithambo yegazi. Nxa abantu bekhula imithambo yegazi iyaqina futhi inciphe okubangela imikhuhlane etshiyeneyo njengomkhuhlane wenhliziyo, wezinso kanye leminye imikhuhlane ephambanisa ukuhamba kwegazi engqondweni. Konke lokhu kwenza sizwisise ukuthi imikhuhlane le ivela esonweni esilaso emzimbeni. Ngemva kokunanzelela lokhu, intshiseko yami ngezokwelapha yaqalisa ukuncipha. Phela nguJehova uNkulunkulu kuphela ongaqeda ukugula lokufa.
NgoMarch 1976, ngilenyanga ezingu-7 ngiqalise ukufunda iBhayibhili ngayekela izifundo zami zokuchwayisisa eyunivesithi. Ngangisesaba ukuthi mhlawumbe angisoze ngiwuthole umsebenzi wokuba ngudokotela kodwa ngawuthola kwesinye isibhedlela. Ngabhabhathizwa ngoMay 1976. Ngabona ukuthi indlela engcono engingasebenzisa ngayo impilo yami yikuba senkonzweni yesikhathi sonke kumbe ukuba liphayona. Yikho ngacina ngiqalise ukuphayona ngoJuly 1977.
Ukulwela Lokhu Okutshiwo NguNkulunkulu Ngegazi
NgoNovember 1979, mina lomkami sathuthela ebandleni elalilabamemezeli abalutshwana okuthiwa yiChiba Prefecture. Ngathola umsebenzi esibhedlela esasikhonapho futhi ngangingasebenzi wonke amalanga. Ngelanga lami lokuqala emsebenzini ngabuthanelwa liqembu labodokotela. Babelokhu bengibuza besithi, “Njengoba unguFakazi kaJehova uzakwenzani nxa kungabuya isigulane okumele sifakwe igazi?”
Ngabachasisela ngenhlonipho ukuthi ngizalandela lokho okutshiwo nguNkulunkulu ngegazi. Ngabatshela ukuthi kulezinye indlela zokwelapha kungasetshenziswa igazi lokuthi ngizakwenza konke okusemandleni ami ukuthi ngimelaphe. Phose ngemva kwehora elilodwa udokotela owayelesikhundla esiphezulu wathi, “Ngiyazwisisa. Kodwa nxa kungabuya isigulane esifuna ukufakwa igazi sizasikhangela thina.” Indoda le yayisaziwa ngokuthi ilukhuni kodwa ngemva kwengxoxo le ngasebenza layo kuhle futhi yayihlala ikuhlonipha engikukholwayo.
Ubunzima Ngenxa Yalokho Esikukholwayo
Ngesikhathi siseChiba, kwakusakhiwa igatsha leJapan laboFakazi bakaJehova e-Ebina. Mina lomkami sasihamba kanye ngeviki ukuze siyenakekela impilakahle yabazalwane ababencedisa ukwakha isakhiwo leso esibizwa kuthiwa yiBhetheli. Ngemva kwenyanga ezilutshwana sanxuswa ukuthi sizosebenza wonke amalanga eBhetheli ese-Ebina. NgoMarch 1981 saqalisa ukuhlala esakhiweni esasivele sihlala abazalwane abedlula 500 ababencedisa ukwakha. Ekuseni ngangiklina izambuzi lalapho okugezela khona ababencedisa ukwakha besekusithi emini ngihlole abagulayo.
Omunye owayegula ngudadewethu okuthiwa ngu-Ilma Iszlaub owe-Australia owabuya eJapan ngo-1949 engumnali. Wayekhathazwa ngumkhuhlane wemvukuzane okuthiwa yi-leukemia futhi odokotela babemtshele ukuthi usalelwe zinyanga ezilutshwana ephila. U-Ilma wayala ukuthi afakwe igazi ukuze angezelele impilo yakhe njalo wakhetha ukuthi ahlale eBhetheli kuze kube lilanga azakufa ngalo. Ngaleziyana nsuku kwakungakabi lemithi eyenza ukuthi igazi libe linengi enjenge-erythropoietin. Kwezinye izikhathi igazi lakhe lalisehla libe ku-3 kumbe 4 gremu, khona kumele libe ku-12 kusiya ku-15. Kodwa ngenza konke okusemandleni ami ukuthi ngimelaphe. Udadewethu u-Ilma waqhubeka elokholo oluqinileyo kuNkulunkulu waze wabhubha ngoJanuary 1988, ngemva kweminyaka engaba ngu-7.
Banengi abafowethu labodadewethu ababencedisa egatsheni leJapan laboFakazi bakaJehova okwakumele ba-opharethwe. Siyababonga kakhulu odokotela ababevuma ukuba-opharetha bengafakwanga igazi. Izikhathi ezinengi babengicela ukuthi lami ngibe khona nxa be-opharetha futhi kwesinye isikhathi ngangincedisa. Ngiyababonga odokotela labo ababetshengisa ukuthi bayahlonipha lokho esikholwayo mayelana legazi. Ukusebenza labo kunginike amathuba amanengi okuthi ngibaxoxele lokho engikukholwayo. Omunye wabo usanda kuba nguFakazi.
Okuhle yikuthi abanye abantu labo sebencedakele ngenxa yokuthi odokotela besebefunde ukwelapha oFakazi bakaJehova kungasetshengiswanga igazi. Ukwelatshwa kungasetshenziswa igazi sekutshengise ukuthi kuyanceda kakhulu ukuthi abantu bangafakwa igazi. Khathesi sesikwazi ukuthi nxa umuntu enga-opharethwa engafakwanga igazi uyaphangisa ukululama futhi kuyanciphisa lenhlupho ezingaba khona.
Ukuqhubeka Ngifunda KuDokotela Omkhulu Kulabo Bonke
Ngiyazama ukuthi ngibe ngilokhe ngifunda ngendlela ezintsha zokwelapha ezibakhona lezinsuku. Lanxa kunjalo ngiyaqhubeka futhi ngifunda ngoJehova uDokotela omkhulu kulabo bonke. Kaboni kuphela okungaphandle komuntu kodwa ubona lokusenhliziyweni. (1 USamuyeli 16:7) Lami ngiyazama ukwelapha isigulane ngasinye, ngingagxilanga emkhuhlaneni waso kuphela kodwa ngisincedise lakokunye. Lokhu kwenza ngizinakekele kuhle izigulane zami.
Ngilokhu ngiseBhetheli futhi kuyangithokozisa ukuncedisa abanye ukuthi bafunde ngoJehova langomthetho wakhe omayelana legazi. Ngithandazela ukuthi uDokotela Omkhulu uJehova uNkulunkulu masinyane nje aqede du konke ukugula lokufa.—Ilandiswa nguYasushi Aizawa.
[Amabala angaphantsi]
a Elinye ibhuku elithi Modern Blood Banking and Transfusion Practices elabhalwa ngudokotela uDenise M. Harmening, lithi: ‘Umuntu owake wazithwala kumbe wafakwa igazi kumbe esinye isitho somzimba somunye umuntu, ngokuhamba kwesikhathi angaba lohlupho olukhulu olungabangela ukufa kwama-red cells nxa esefakwa igazi. Ezimeni ezinjalo, nxa igazi lakhe lingahlolwa engakafakwa igazi ngeke litshengise ukuthi kungaba lohlupho lolo ngokuhamba kwesikhathi.’ Elinye ibhuku elichasisa ngegazi elithi Dailey’s Notes on Blood lithi, ‘ukufa kwama-red cells kuyenzakala lanxa umuntu eyabe efakwe igazi elincane elingahambelani laye. Nxa izinso sezingasasebenzi, igazi ngeke lihluzwe futhi lokhu kungabangela ukuthi isigulane sigule kakhulu.’
b I-Journal of Clinical Oncology ka-August 1988, yabika yathi: “Izigulane ezifakwa igazi nxa seziza-opharethwa zisengozini enkulu yokuthi izinto azisoze zihambe kuhle ukwedlula ezingazange zifakwe igazi.”
c Ukuze ufunde okunengi ngalokho iBhayibhili elikufundisayo ngegazi, bala ibhukwana laboFakazi bakaJehova elithi Igazi Lingakusindisa Kanjani Ukuphila Kwakho?
[Amabala asekhasini]
“Ngabatshela ukuthi kulezinye indlela zokwelapha kungasetshenziswa igazi lokuthi ngizakwenza konke okusemandleni ami ukuthi ngimelaphe”
[Amabala asekhasini]
“Ukwelatshwa kungasetshenziswa igazi sekutshengise ukuthi kuyanceda kakhulu ukuthi abantu bangafakwa igazi”
[Imifanekiso esekhasini]
Phezulu: Ngisenza inkulumo
Kwesokudla: Ngilomkami uMasuko