Dwoko ma Muma chiwo

 Bang’ chueyo dichwo gi dhako mokwongo, Nyasaye noriwogi e kend. Nochako kend ma en riwruok makende e kind dichwo gi dhako, kendo ma ne dhi miyo gidag e ngima maber kaachiel gi nyithindgi.​—Chakruok 1:27, 28; 2:18.

 Nyasaye dwaro ni joma okendore odag gi mor. (Ngeche 5:18) E Muma, Nyasaye omiyowa chike kod puonj ma nyalo konyo joma okendore mondo gidag e ngima maber.

E sulani

• Nyasaye dwaro ni kend obed nade?

• To nade pogo dak kata ketho kend chuth?

• Be ochuno ni kend oluwre gi chik sirkal e ka Nyasaye oyie kode?

• Gin migepe kod ting’ mage ma Muma omiyo chwo gi mon?

• Be Nyasaye oketo chik ni dichwo gi dhako nyaka bed gi nyithindo?

• Ere kaka Muma nyalo konyo kend mara?

• Ndiko ma wuoyo e wi kend

Nyasaye dwaro ni kend obed nade?

 A chakruok, dwach Nyasaye ne en ni kend obed e kind dichwo achiel gi dhako achiel. (Chakruok 2:24) Nyasaye ok oyie gi doho, ok oyie gi kend e kind chwo gi chwo kata mon gi mon, bende, ok oyie ne dichwo gi dhako ma ok okendore dak kanyachiel. (1 Jo-Korintho 6:9; 1 Jo-Thesalonika 4:3) Yesu nopuonjo jolupne mondo oluw chik ma ne Nyasaye oketo e wi kend a chakruok.​—Mariko 10:6-8.

 Nyasaye nochano ni kend obed gima siko. Sama dichwo gi dhako kendore, gisingorega ni gibiro dak kanyachiel kendo siko kamano kuom kinde duto mag ngimagi. Nyasaye dwaro ni gimakre gi singono.​—Mariko 10:9.

To nade pogo dak kata ketho kend chuth?

 Nitie kinde ma nyalo chuno dichwo kata dhako dhi timo gimoro mochuno ka en kende, kuom ranyisi, dhi e wuoth moro mopore. Kata kamano, Muma kwedo pogo dak sama chandruoge oneno e kend. Kar mano, ojiwo joma okendore mondo olos weche ma kelo tungni e kend margi.​—1 Jo-Korintho 7:10.

 Terruok kende e ma Muma wacho ni nyalo miyo oketh kend chuth. (Mathayo 19:9) E wi mano, ka dichwo kata dhako oyiero mar pogo dak kata ketho kend ne wach machielo mopogore gi terruok, Muma ok oyiene chako kisera gi ng’at machielo, kata donjo e kend gi ng’at machielo.​—Mathayo 5:32; 1 Jo-Korintho 7:11.

Be ochuno ni kend oluwre gi chik sirkal e ka Nyasaye oyie kode?

 Nyasaye dwaro ni Jokristo oluw chike ma sirkal oketo mag kend. (Tito 3:1) Sama dichwo gi dhako okendore kaluwore gi chik sirkal, gimiyo joloch luor kendo ginyiso ni ging’eyo ni Nyasaye dwaro ni kend obed riwruok ma siko. a

Gin migepe kod ting’ mage ma Muma omiyo chwo gi mon?

•   Ting’ ma gin go giduto. Chwo gi mon onego oherre kendo gimire luor. (Jo-Efeso 5:33) Ng’ato ka ng’ato manie kend onego one ni ochopo dwaro mag nindruok mag nyawadgi e yor hera, kendo ok onego gidonj e timbe mag terruok. (1 Jo-Korintho 7:3; Jo-Hibrania 13:4) Ka gin gi nyithindo, giduto gin gi ting’ mar ritogi.​—Ngeche 6:20.

   Muma ok ler e yo matut kaka joma okendore onego otim tije mag andika kata tije mag ot. Ginyalo timo yiero margi giwegi ka luwore gi gima biro konyogi kaka joot.

•   Migawo mar dichwo . Muma wacho ni “dichwo en wi chiege.” (Jo-Efeso 5:23) En e ma en gi ting’ mar tayo joode kendo timo yiero ma biro kelo ber ne chiege kod nyithinde.

   Onego otem mondo joode oyud gige ringruok, giwinj ni odewgi, kendo okonygi e weche Nyasaye. (1 Timotheo 5:8) Onyiso ni ogeno nyalo kod kido mabeyo ma chiege nigo kuom tiyo kode machiegni kendo winjo pache ka pok otimo yiero. (Ngeche 31:11, 28) Muma wacho ni dichwo onego ochop migepe momiye e yor hera.​—Jo-Kolosai 3:19.

•   Migawo mar dhako Muma wacho ni ‘dhako onego omi chwore luor matut.’ (Jo-Efeso 5:33) Nyasaye bedoga mamor sama dhako ochiwo luor ne migawo ma Nyasaye omiyo chwore.

   Dhako en jakony, kendo okonyoga chwore timo yiero mabeyo ka oriwe lwedo nikech en e wich. (Chakruok 2:18) Muma pako dhako ma chopo migepe ma en-go e kend.​—Ngeche 31:10.

Be Nyasaye oketo chik ni dichwo gi dhako nyaka bed gi nyithindo?

 Ooyo. E kinde mokalo, Nyasaye nonyiso moko kuom jotichne ni ginyuol nyithindo. (Chakruok 1:28; 9:1) Kata kamano, Jokristo ok nie bwo chikno. Yesu ne ok ochiko Jopuonjrene ni nyaka gibed gi nyithindo. Kata mana jolupne mokwongo ne ok owacho ni joma okendore nyaka nyuol nyithindo. Joma okendore nyalo yiero gin giwegi ka be gibiro nyuolo nyithindo kata ooyo.

Ere kaka Muma nyalo konyo kend mara?

 Muma oting’o puonj ma nyalo konyo joma dwaro kendore mondo gichak kend margi e yo makare. Puonjgo nyalo konyo joma okendore mondo gilo chandruoge kata pek ma ginyalo romogo e kend.

 Puonj mag Muma nyalo konyo joma okendore mondo . . .

•   gibed gi hera madier.​—1 Jo-Korintho 13:4-7; Jo-Kolosai 3:14.

•   gilo pogruok ma nyalo betie e kend.​—1 Jo-Korintho 10:24.

•   gibed joma chiko itgi maber.​—Jakobo 1:19.

•   ginyisre luor.​—Jo-Rumi 12:10.

•   giwere richo.​—1 Petro 4:8.

•   gimakre kendo gisik kanyachiel.​—Mariko 10:9.

•   gihore mos.​—Jo-Efeso 4:2, 3.

•   gitim gik moko kamoro achiel.​—Eklesiastes 4:9.

•   giteg singruok margi.​—Wer Mamit Moloyo 8:7.