Adiera e Wi Har–magedon
Adiera e Wi Har–magedon
‘Jochiende choko ruodhi duto mag piny ngima, kendo chunygo choko ruodhigo e ka miluongo gi dho Hibrania ni Har–Magedon.’—FWENY 16:14, 16.
HAR–MAGEDON en nying kamoro. Kata kamano, nenore ni ne ok en kamoro masie.
Ka en kamano, kare tiend nying “Har– Magedon” en ang’o? Ang’o momiyo kinde mang’eny itude gi masira moro, kaka lweny?
Ochokgi Kama Iluongo ni Har–Magedon
Wach ni Har–Magedon e dho-Hibrania tiende en “Got mar Megiddo.” Kata obedo ni onge got moro sie ma ne iluongo ni Megiddo, nitie dala miluongo kamano. Oyudore yo milambo kama piny Israel machon ne nitie. Lwenje mang’eny mag tieko ywaruok ne ogo kanyo. Mano ne omiyo, otud nying mar Megiddo gi lwenje. *
Kata kamano, gimomiyo Megiddo ong’ere ahinya ok en nikech lwenje ma ne oked kuno to gimomiyo ne oked lwenjego. Megiddo ne yudore e Piny Manosingi ma Jehova Nyasaye ne omiyo Jo-Israel. (Wuok 33:1; Joshua 12:7, 21) Jehova ne osingore ni obiro rito jogo kik monjgi, kendo ne otimo kamano. (Rapar mar Chik 6:18, 19) Kuom ranyisi, dala mar Megiddo ema Jehova ne oresoe Jo-Israel e lwet jolweny mag Ruoth Jabin ja-Kanan koda jatend jolwenyne miluongo ni Sisera.—Jobura 4:14-16.
Omiyo nying mar “Har–Magedon,” ochung’ ne wach moro maduong’. Otudore gi lweny me kind joteko ariyo.
Weche mokor e bug Fweny wuoyo kuom kinde mokayo machiegni ma Satan kaachiel gi jochiendene biro chwalo sirkande dhano mondo ochok jolwenjgi mondo gimonj oganda Nyasaye koda tijgi. Sama Nyasaye loyo jomonjgo e lweny, ji tara gi tara biro tho.—Fweny 19:11-18.
Ang’o manyalo miyo Nyasaye ma Muma wacho ni ‘opong’ gi kech, ma mirimbe ok bi piyo, man gi miwafu mogundho,’ oneg dhano mang’eny kamano? (Nehemia 9:17) Mondo wang’e gimomiyo Nyasaye kawo okang’ ma kamano, dwarore ni wayud dwoko mag penjo adekgi: (1) Ng’ano ma chako lwenyno? (2) Ang’o momiyo Nyasaye donjo e lwenyno? (3) Gikone, lwenyno biro kelo lokruok mage mosiko ne piny koda ne jogo modak e iye?
1. NG’ANO MA CHAKO LWENYNO?
Lweny mar Har–Magedon ok en okang’ ma Nyasaye kawo nikech gero. Kar mano, Nyasaye biro rito joma kare kuom joma dwaro tiekogi chuth. Jogero e lwenyni gin “ruodhi duto mag piny ngima,” ma gin jotend piny. Ang’o momiyo gimonjo joma kare? Nikech Satan biro chwalo sirkande koda jolweny mondo omonj jogo malamo Jehova Nyasaye.—Fweny 16:13, 14; 19:17, 18.
Kaluwore gi kaka e pinje moko ji okawo mapek ratiro mar wuoyo koda mar lamo e kindegi, paro ni sirkande nyalo monjo din moro amora kata temo tieko din moro chuth nyalo nenore ka gima ok nyalre. Kata kamano, monj ma kamago ne otimore e higini mag 1900 kendo gidhi nyime timore e kindegi. * Kata kamano, nitiere pogruok ariyo madongo e kind monj me kindego gi mar Har–Magedon. Mokwongo, monjno biro kwako piny ngima. Mar ariyo, okang’ ma Jehova Nyasaye biro kawo e kindeno biro bedo maduong’ moloyo mosekawo e kinde moro amora mokalo. (Yeremia 25:32, 33) Muma lero lwenyno ni en “lweny mar chieng’ maduong’no mar Nyasaye Manyalo Duto.”
2. ANG’O MOMIYO NYASAYE DONJO E LWENYNO?
Jehova chiko joma lame mondo obed joma ohero kuwe kendo mohero wasikgi. (Mika 4:1-3; Mathayo 5:43, 44; 26:52) Omiyo ok gibi kedo giwegi e bwo monj maduong’no. Ka Nyasaye ok okawo okang’ mar reso joge e kindego, ibiro tiekgi chuth. Kuom mano, wachno omulo nying Jehova Nyasaye. Kapo ni jomonjgo otieko oganda Nyasaye chuth, mano biro nyiso ni Jehova ok en jahera, ok ong’ad bura kare, kendo oonge teko. To mano ok nyal timore ngang’!—Zaburi 37:28, 29.
Nyasaye ok dwar ketho ng’ato ang’ata, omiyo ochiwo siem chon kuom gima obiro timo. (2 Petro 3:9) Kokalo kuom ranyisi manie Muma, oparonwa waduto kaka osekedo ne joge ka omonjgi. (2 Ruodhi 19:35) Muma bende nyisowa ni kinde mabiro ka Satan kaachiel gi joge motiyogo biro monjo oganda Nyasaye, Jehova biro kawo okang’ kendo mar kedo kodgi wang’ gi wang’. Wach Nyasaye ne osekoro chon ni Jehova biro tieko joma richo. (Ngeche 2:21, 22; 2 Jo Thessalonika 1:6-9) E kindeno, jomonjgo biro fwenyo maonge kiawa ni kare ne gitugo lweny gi Nyasaye Manyalo Duto.—Ezekiel 38:21-23.
3. GIKONE, LWENYNI BIRO KELO LOKRUOK MAGE MOSIKO NE PINY KODA NE JOGO MODAK E IYE?
Lweny mar Har–Magedon miyo ireso ngima dhano tara gi tara. Kuom adier, mano en chakruok mar kuwe e piny.—Fweny 21:3, 4.
Bug Fweny nyiso ni nitie “oganda mang’ongo” maok nyal kwan mabiro tony e lwenyno. (Fweny 7:9, 14) Ka Nyasaye tayogi, jogi biro konyo e loso piny obed Paradis mana kaka Jehova ne dwaro a chakruok.
Be wang’eyo kinde ma ibiro monjie oganda Nyasaye?
[Weche Moler Piny]
^ par. 6 Tudo kamoro gi lweny ok en gima nyien. Kuom ranyisi, Hiroshima tinde en nying ma itiyogo e luongo lweny mar nyuklia nikech dala mar Hiroshima e piny Japan ne oketh chuth gi bom mar atom.
^ par. 13 Ranyisi achiel ma ne sirkal otemoe tieko chuth din koda ogendini moko en Holocaust, ma en nek ma Jo-Nazi ne onegogo Jo-Yahudi koda joma moko. E kinde loch mar Jo-Soviet, dinde moko e piny U.S.S.R. bende ne odi ahinya. Ne sula mawacho ni “Watu Wanaopenda Amani Watetea Jina Lao Zuri” e Mnara wa Mlinzi mar Mei 1, 2011, mogo gi Joneno mag Jehova.
[Picha e Ite mar 6]
Jehova Nyasaye osekedo ne joge kinde mosekalo
[Picha e ite mar 7]
Jehova biro kedo ne joge kendo, e kinde lweny mar Har–Magedon
