Jehova Oyawo Wengena

Kaka iwachonwa gi Patrice Oyeka

Chieng’ moro godhiambo ne awinjo redio, koyudo aseriyo kendo e mudho mandiwa. Ne an mwofu, ne awinjo winjo ka an kenda, kendo ne ang’ado mar tieko ngimana. Ne aruwo sum ma aolo e okombe kendo aketo e mesa. Ne adwaro luokora kae to arwakra maber kapok amadho sumno mondo atiek chandruogena duto. Ang’o momiyo ne adwaro tieko ngimana? To ang’o momiyo pod angima kendo anyalo lero gima ne otimore?

NE ONYUOLA tarik 2 Februar, 1958, e dala mar Kasaï Oriental, e piny Democratic Republic of the Congo. Wuonwa ne otho kane an jahigini ochiko, omiyo owadwa maduong’ ne opidha.

Bang’ tieko skul, ne ayudo tich e kambi mar rubber. Chieng’ moro gokinyi e higa mar 1989, kane andiko ripot e ofisa, ne apo mana ka an e mudho mandiwa. Mokwongo, ne aparo ni stima olal, kata kamano ne awinjo ka jenereta mor, to mano ne nyiso ni ne en gokinyi! Ne abuok malich fwenyo ni ne ok anyal neno gimoro amora, kata mana gik ma ne andiko ma ne nie nyima!

Sano sano, ne aluongo achiel kuom jogo ma ne tiyo e bwoya mondo otera ir laktar maduong’ kar thieth mar kambino. Laktarno nowacho ni dwarore ni otera ir lakteche molony mayudore e taon maduong’. Noyudo ni pien moro ei wang’a noyiech kendo ne dwarore ni ayud thieth mamalo, omiyo ne oora e dala maduong’ mar Kinshasa.

Kaka Weche ne Odhina Kinshasa

Kane an Kinshasa, ne adhi ir lakteche mag wang’ mopogore opogore, kata kamano, onge kata achiel kuomgi ma ne nyalo konya. Bang’ tieko ndalo 43 e osiptal, lakteche nowacho ni abiro chwe mwofu ngimana duto! Joodwa ne otera e dinde mopogore opogore mondo olemna, ne gidwaro ni achang e yor hono, to mano ne ok otimore.

Gikone, chunya ne oa e neno kendo. Ne chalo ka gima mudho ne oimo gimoro amora e ngimana. Ne alalo wengena, ne alalo tija, kendo chiega ne oringa modhi gi gik moko duto ma ne oyudo wan-go. Wiya ne kuot dhi bayo kata tudruok gi ji. Ne abet kar kenda kendo ne ajariyo mana e ot. Ne ajapogora gi ji kendo ne awinjo e chunya ni an ng’at manono chuth.

Ne atemo diriyo tieko ngimana. Kinde mar ariyo ma ne atemo timoe kamano ema alero e chak siganani. Nyathi matin ema noresa. Ne opo kopuko sumno piny sama ne aluokora. Gima ber en ni ne ok otemo madho sumno. Kata kamano, ne achwanyora ahinya kane ok anyal yudo okombeno. Bang’e ne anyiso joodwa gimomiyo ne amanyo okombeno koda gima ne adwaro timo.

Adwoko ne Nyasaye koda joodwa erokamano kuom konya. Chenrona mar tieko ngimana ne okethore.

 Yudo Mor e Ngima Kendo

Chieng’ Jumapil moro e higa mar 1992 koyudo abudho e dala ka amadho ndawa, Joneno ariyo mag Jehova ne obiro e dalawa ka gin e tijgi mar lendo ot ka ot. Nikech ne gifwenyo ni an mwofu, ne gisomona Isaiah 35:​5, mawacho niya: ‘Eka wang’ mwofni noyepi, kendo it jo ma itgi odinore noyawre.’ Winjo wechego ne omora nyowuoyo! Mopogore gi gik ma ne asebedo ka awinjo e kanise ma ne asedhiye, Joneno ne ok osingona chang e yor hono. Kar mano, ne gipuonja ni abiro neno kendo e piny manyien ma Nyasaye osingo, to mano biro nyalore mana ka ang’eyo Nyasaye. (Johana 17:3) Kanyo gi kanyo, ne achako puonjora Muma gi Joneno ka watiyo gi buk miluongo ni Unaweza Kuishi Milele Katika Paradiso Duniani. Bende ne achako dhi e chokruoge duto mag Jokristo e Od Romo ma ne ni e alworawa kendo ne achako timo lokruok e ngimana. Ne aweyo madho ndawa.

Kata kamano, bedona mwofu ne miyo ok atim dongruok e winjruokna gi Nyasaye. Omiyo ne adhi e skund mwofni mondo apuonjra somo koda ndiko Braille. Mano ne omiyo anyalo tiegora ne tij lendo e Od Romo. Matin, ne achako lendo gi kanyakla e alworawa. Ne achako bedo gi mor e ngimana kendo. Ne adhi nyime timo dongruok kendo ne achiwo ngimana ne Jehova. Ne obatisa tarik 7 Mei, 1994.

Kaka ne amedo hero Jehova kendo hero ji, e kaka ne amedo nyago gombo mar lendo kuom thuolona duto. Chakre Desemba 1, 1995, asebedo ka atiyo kaka painia mapile, ma en ng’at malendo kuom thuolone duto. Bende asebedo gi thuolo makende mar bedo jaduong’-kanyakla chakre Februar 2004. Seche moko igwela mondo agol twege e kanyakla mamoko e alworawa. Gwethgi duto kelona mor mogundho kendo miyo abedo gadier ni onge ng’ol moro amora manyalo monowa chopo gombo marwa mar tiyo ne Jehova Nyasaye.

Jehova Omiya “Wang’a”

Mana kaka ne asewacho motelo, chiega ne oringa nikech ne abedo mwofu. Kata kamano, aseyudo gweth moro makende kuom Jehova. E yo makende, ne omiya wenge mondo anen. Anny Mavambu, ne oyie bedo chiega kata obedo ni ang’ol, kendo osebedo wang’a. Kinde duto wadhi kaachiel kode lendo kendo ojasomona weche mag twak mondo andikgi e Braille. Osebedona gweth makende nikech en be olendo kuom thuolone duto. Nikech en, aseneno adiera mag weche mayudore e bug Ngeche 19:14 mawacho niya: “Dala gi mwandu e ma weg nyithindo lamonigi; to wuon ot moterore mos oa kuom Jehova.”

Jehova bende osegwedhowa gi nyithindo ariyo​​—⁠nyako gi wuowi. Agombo neno kaka gichal e Paradis! Gweth machielo en ni owadwa maduong’ ma ne omiyowa ot mwadakie, ne orwako adiera mag Muma mi obatise! Waduto wan e kanyakla achiel.

Kata obedo ni ang’ol, gombo ma an-go e chunya en tiyo momedore ne Nyasaye nikech osegwedha ahinya. (Malaki 3:​10) Pile pile alemo ka akwayo mondo Pinyruodhe obi mondo otiek chandruoge duto e piny. Nyaka ne ang’e Jehova, anyalo wacho gadier niya: ‘Hap Jehova​​—⁠ema kelo mwandu; kendo Jehova ok mi ji mwandu makelo parruok.’​​—⁠Ngeche 10:⁠22.

[Piche e ite mar 15]

Agolo twak mar Muma; ka an-gi jooda koda owadwa