Josombwa Penjo . . .

Ang’o momiyo Nyasaye ne Dwaro ni Ibrahim Ochiw Wuode kaka Misango?

▪ Kaluwore gi kaka ondik e bug Chakruok mayudore e Muma, Jehova Nyasaye ne onyiso Ibrahim ni ochiw wuode Isaka kaka misango. (Chakruok 22:2) Wachno chando chuny moko kuom jogo ma somo Muma. Carol, ma en profesa, wacho niya: “Kane ahango winjo wachno ka an nyathi, iya ne owang’ ahinya. Ne apenjora niya, ‘En Nyasaye manade manyalo nyiso ng’ato mondo otim gima kamano? ’ ” Kata obedo ni ji nyalo bedo gi paro ma kamago, ber keto weche moko e paro.

Mokwongo, ng’e gima Jehova ne ok otimo. Ne ok oyie ne Ibrahim mondo ochiw misangono kata obedo ni Ibrahim ne oikore timo kamano, kendo Nyasaye pok onyiso ng’ato mondo otim gima kamano kendo. Jehova dwaro ni mondo jogo duto malame moriwo nyaka nyithindo, osiki ka ngima​​—⁠gidag aming’a ka gimor.

Mar ariyo, Muma nyiso ni nitie gimoro makende ma ne omiyo Jehova onyiso Ibrahim mondo ochiw Isaka kaka misango. Nyasaye ne ong’eyo ni higini miche mang’eny bang’e, ne odhi yie mondo Yesu ma en Wuode, * othonwa. (Mathayo 20:28) Jehova ne dwaro ni wang’e kaka ne odhi chiwo gima duong’. Kotiyo gi Ibrahim, ne onyiso e yo ma wich ok nyal wilgo misango ma ne odhi chiwo kinde mabiro. E yo mane?

Par ane weche ma Jehova ne onyiso Ibrahim: “Kaw wuodi koro, wuodi ma miderma, en mihero, Isaka, kendo . . . chiwe kanyo ka misango miwang’o.” (Chakruok 22:2) Ne ni Jehova luongo Isaka ni wuowi ‘moher.’ Jehova ne ong’eyo kaka Isaka ne en wuowi ma Ibrahim ne ohero ahinya. Nyasaye bende ne ong’eyo kaka en owuon ne ohero Yesu, Wuode. Jehova ne ohero Yesu ahinya, momiyo oluongo Yesu nyadiriyo en owuon kowuok e polo ni “Wuoda mahero.”​​—⁠Mariko 1:​11; 9:7.

Ng’e bende ni Jehova ne okwayo Ibrahim e yo mang’won chiwo wuode maok ochune timo kamano. Jasomo moro mar weche Muma wacho niya kuom yo ma Nyasaye ne okwayogono, “RUOTH nong’eyo ni gima ne okwayono ne en gima duong’ ahinya.” Wang’eyo ni kwayono ne omiyo Ibrahim owinjo malit ahinya e chunye; to nyaka bed ni Jehova bende ne owinjo malit ahinya kane ong’iyo Wuode mohero kasandore nyaka tho. Onge kiawa ni mano ema ne en lit maduong’ie moloyo ma Jehova ne osegawinjoe kendo onge lit mabiro loyo mano.

Omiyo, kata obedo ni gima Jehova ne onyiso Ibrahim mondo otim nyalo chando chunywa, ber keto e paro ni Jehova ne ok oyie ne jaduong’ machon ma ne oluoro Nyasaye mondo ochiw misango ma kamano. Ne ogeng’o Ibrahim kik oyud lit maduong’ie moloyo manyalo yudo janyuol; ne oreso Isaka kik tho. Kata kamano, Jehova ne ok oreso “Wuode owuon, to nochiwe nikech waduto.” (Jo Rumi 8:​32) Ang’o momiyo Jehova owuon ne oyie yudo lit malich kamano? Ne otimo kamano “mondo wabed mangima.” (1 Johana 4:9) Donge mano nyisowa maler kaka Nyasaye oherowa ahinya! Donge mano jiwowa mondo wan bende wanyise hera? *

[Weche moler piny]