“Omido da ka lupuka, katwa li tu shii ngeenge ohatu kala hatu palulwa pamhepo okupitila moikwaelektronika.” Mbela oto tu kumwe neendjovo odo? Oda li da popiwa moshipopiwa shetwomukumo, osho sha li sha yandjwa kuGeoffrey Jackson mOlaporta yOlutuwiliki yomo 2020 #6. Okwa twikila ko a ti: “Ndele mopaife otashi dulika hatu lipula kutya, ngeno ohatu shi endifa ngahelipi, ngeno kapa li pe na oilongifo, ngaashi o-JW Library? Jehova okwa kala te tu longekida mokweendela ko kwefimbo, omolweenghalo edi da nyaya komunhu.”

 Jehova okwa kala te tu longekida ngahelipi? Osha enda ngahelipi, opo ku ndulukwe o-JW Library, noshike sha pumbiwa, opo i kalekwe po noku i xwepopalekwa?

 MuMei 2013, Olutuwiliki ola li la pula oshikondo sho-MEPS Programming, osho shi li keembelewa da kula, shi nduluke po o-app oyo i na o-New World Translation ya pepalekwa. Paul Willies, oo ha longo noMEPS Programming, okwa ti: “Fiyo opopo, katwa li twa nduluka po nande onale o-mobile app ko-app stores. Ashike otwa li twa tota po ospana, eeprojeka dimwe tadi kalekwa manga, opo tu longe pamwe noikondo imwe, tu dute nokunduluka po o-app noshikalimo shasho. Otwa kala hatu ilikana luhapu, nokekwafo laJehova, o-app oya li ya pita pokwoongala kwokomudo konima yeemwedi nhano!”

 Eshongo limwe ola li li na sha nokuninga o-app i ninge o-library yo vene, ku na oishangomwa ihapu nomalaka mahapu. MuJanuali 2015, oishangomwa yetu oyo i li mOshiingilisha oya li tai dulu okumonika ko-app, nokonima yeemwedi hamano, ovanhu ova li tava dulu okutapa oishangomwa momalaka amwe omafele.

 Okudja opo, ovamwatate ova li va xwepopaleka o-app oyo meenghedi dihapu, va weda ko ouvidio, va ongela ponhele imwe oishangomwa noinima ikwao, oyo hai longifwa pokwoongala, nove shi ninga tashi shiiva, opo ovanhu va kale tava longifa Elongifwambo lokukonga omauyelele okudja mOmbiibeli.

 O-JW Library ohai longifwa koikwaelektronika eemiliyona 8 efiku keshe nohai longifwa omwedi keshe koikwaelektronika i dulife peemiliyona 15! Oshike sha pumbiwa, opo o-app i kale tai longo nawa koikwaelektronika oyo? Omumwatate Willies okwa ti: “O-mobile app ihai pu naanaa okulongwa. Ohatu twikile nokuweda ko oinima ipe noku i xwepopaleka i kale ipu okulongifwa. Molwaashi oikwaelektronika ohai pepalekwa luhapu, nafye otwa pumbwa okupepaleka o-app oyo, opo i kale tai endele pamwe noikwaelektronika oyo i li pefimbo. Otwa pumbwa yo okukaleka po nokupepaleka onghedi omo hai longo meni layo, molwaashi oishangomwa noinima oyo ya kwatwa momawi, oyo i li ko-JW Library, otai twikile nokuhapupala.” Okutala komalaka aeshe, paife ko-JW Library oku na oishangomwa 200 000 nosho yo oinima oyo ya kwatwa momawi nouvidio i dulife po 600 000.

 Otwa pumbwa oilongifo ihapu, opo tu twikile okukaleka po o-app oyo. Otwa pumbwa yo okufutila omikanda dihapu dokulongifa eeprograma dopaelektronika. Omukanda umwe ohau futilwa N$ 22 260.00 omudo keshe. Shikwao vali, o-MEPS Programming ohai longifa N$ 148 400.00 omudo keshe omolwoikwaelektronika oyo ya dja kovanduluki va yoolokafana, opo ku shilipalekwe kutya o-app yetu otai longo nawa keekombiyuta dipe, koutableta nosho yo keengodi.

 O-JW Library oye shi ningifa tashi shiiva, opo kuha longifwe vali oimaliwa ihapu mokunyanyangida, okutula kumwe oileshomwa noku i tuma. Pashihopaenenwa, diladila kokambo Konakona Omishangwa keshe efiku. Otwa li twa nyanyangida hanga eekopi eemiliyona 12 dokambo Konakona Omishangwa keshe efiku komo 2013. Ndele komo 2020, otwa li ashike twa nyanyangida oumbo eemiliyona nhano, nokuli nonande mounyuni aushe momuvalu wovaudifi omwa li wa wedwa ovaudifi vape ve dulife 700 000. Omolwashike pe na eyooloko melongifo loshimaliwa? Omolwaashi ovamwatate novamwameme vahapu ohava lesha omushangwa wefiku ko-JW Library. a

 O-JW Library ohai kwafele yo ovo have i longifa meenghedi dihapu. Geneviève, woCanada, okwa mona kutya o-app oye mu kwafela a kale ta konakona Ombiibeli pandjikilile. Okwa ti: “Okupopya oshili, ngeno onda li handi longifa omambo komudidi, ngeno kandi wete ngeenge ohandi kala handi lesha ongula keshe. Ashike o-app oye shi ningifa shipu, molwaashi ohandi kufa ashike okatableta kange nohandi kala ndi na ashishe osho nda pumbwa. Okukonakona Ombiibeli pandjikilile osha pameka eitavelo lange nosha kwafela nge ndi ehene popepi naJehova.”

 O-app oya kala ekwafo linene, unene tuu pefimbo lomukifi wekomba, o-COVID-19. Charlyn, wokoUnited States, okwa ti: “Omolwomukifi wokoCOVID-19, oo u li mounyuni aushe, inandi mona nande oshishangomwa shetu shipe sha nyanyangidwa oule womudo. Ndele o-JW Library oya kala tai tu pe osho twa pumbwa, opo tu kale tu na eitavelo la pama, nohandi pandula Jehova omolwefiloshisho olo lopahole.”

 Ovanhu vahapu ohava kala ve udite ngaashi Faye, wokoPhilippines. Okwa ti: “Ohandi longifa o-app oyo ya denga mbada, opo ndi kale popepi naJehova. Oyo handi longifa, ngeenge handi lesha ongula. Oyo handi pwilikinifa oinima oyo ya kwatwa momawi, eshi handi longo oilonga yange. Oyo handi longifa, ngeenge handi lilongekidile okwoongala. Oyo handi longifa, ngeenge handi lilongekidile ovakonakonimbiibeli vange. Oko handi tale ouvidio, ngeenge kandi na eshi handi ningi. Oko handi lesha oitukulwa, ile Ombiibeli, ngeenge ndi li momukweyo nda teelela. Ito i pewa luvali.”

 O-app oyo oi li yo oshilongifo sha denga mbada moukalele. Pashihopaenenwa, eshi omumwameme wokoCameroon a li ta udifa, okwa li a hala okulongifa omushangwa, oo wa longifilwe komumwameme umwe oivike ya tetekela. Ashike ka li te u dimbuluka. Okwa ti: “Lao linene, ohandi dimbuluka outumbulilo umwe oo wa popiwa mo. Onda patulula o-app, ndele handi i mOmbiibeli nokukonga outumbulilo oo. Diva, onda li nda mona omushangwa oo. Molwaashi ohandi longifa o-app, ohandi dulu okumona eevelishe dihapu, odo omafimbo amwe handi kala nda dimbwa.”

 Omayambidido eni ehalo liwa, oo hamu yandje tamu longifa eenghedi odo da yelifwa ko-donate.jw.org, okwe tu kwafela tu nduluke po, tu kaleke po nokuxwepopaleka o-JW Library, oyo hai longifa kovamwatate novamwameme mounyuni aushe. Otwa pandula unene komhepo yeni yokuyandja.

1. MuOktoba 2013, omwa pitifwa o-app oyo i na o-New World Translation ya pepalekwa

2. MuJanuali 2015, oishangomwa imwe yomOshiingilisha oya li tai dulu okumonika, mwa kwatelwa yomomalaka amwe mahapu

3. MuNovemba 2015, omwa li mwa wedwa omaluvala okudidilika

4. MuMei 2016, ouyelele wokwoongala owa hovela okukala we litulilwa

5. MuMei 2017, omwa li mwa wedwa onhele yokuninga omadidilikoshango

6. MuDesemba 2017, omwa li mwa wedwa o-Study Bible

7. MuMarsa 2019, ovanhu ova li va hovela okutapa oinima oyo ya kwatwa momawi, okutala ouvidio nopehe na okutapa nokulongifa Elongifwambo lokukonga omauyelele

8. MuJanuali 2021, okwa weda embo Nghee to dulu okuhafela onghalamwenyo fiyo alushe! olo la kwatakanifwa noinima ihapu