Oilonga yetu yomounyuni aushe ohai yambididwa unene nomayambidido ehalo liwa, oo haa yandjwa koohandimwe ovo ve li Eendombwedi daJehova. a Meenhele detu dokwoongala omu na oukefa vomayambidido, neenghedi vali dimwe di na sha nomayambidido odi li kepandja letu lomayambidido. Oku na eenghedi dihapu omo omunhu ta dulu okuhoolola okuyandja omayambidido oilonga yetu yomounyuni aushe, okufuta eefuto domoshitukulwa, ile aishe.

 Eendombwedi daJehova inadi teelelika di yandje oshitimulongo, ile di yandje omuvalu wonhumba kondadalunde, ile eepelesenda donhumba okudja moyuuyemo yado. (2 Ovakorinto 9:7) Ihatu umbu ongalo, noihatu pula vamwe oimaliwa, ngeenge tave uya pokwoongala kwetu, novakwatelikomesho vetu ihava pula ofuto yeninginifo, yomapako, peehango, ile poinima vali imwe i na sha nelongelokalunga. Ihatu ongele oimaliwa okupitila mokulandifa oikulya, ile moipindi, momaudano, pomauvalelo, momafiyafanepo okundobola, ile moinima imwe vali ya fa oyo, noihatu pula ovanhu va yandje omayambidido. Ouyelele waavo va yandja omayambidido ihau lombwelwa vamwe. (Mateus 6:2-4) Ko-website yetu nomoishangomwa yetu ihamu kala omashiivifo opaipindi.

 Eongalo keshe lEendombwedi daJehova ohali yandje olaporta komwedi keshe i na sha noimaliwa pokwoongala, oyo keshe umwe to dulu okuuda. Omavalulo eongalo keshe ohaa talululwa pandjikilile, opo kushilipalekwe kutya omayambidido otaa longifwa nawa. — 2 Ovakorinto 8:20, 21.

•   Oukefa vomayambidido: Oto dulu okutula omayambidido oimaliwa keemuma, ile otyeke, moukefa vomayambidido ovo ve li mOmalupale Ouhamba, mOmalupale Oyoongalele, ile peenhele dimwe opo hatu ongalele.

•   Okuyandja omayambidido paintaneta: Moilongo ihapu, oto dulu okulongifa epandja, “Tumina omayambidido kEendombwedi daJehova,” opo u yandje omayambidido to longifa okakalata ko-credit, ile ko-debit, ile ombaanga nosho yo eenghedi vali dimwe dopaelektronika. b Eendombwedi dimwe oda hoolola ‘okwoongela sha’ omwedi keshe, opo di yandje omayambidido tadi longifa imwe yomeenghedi odo. —1 Ovakorinto 16:2.

•   Okuninga eemhangela dokuyandja: Eenghedi dimwe dokuyandja omayambidido otadi pula okuninga eemhangela komesho yefimbo, ile omayele opaveta. Eemhangela da tya ngaho, otadi ku kwafele u mone omauwa e na sha nokufuta oifendela moshilongo sheni. Oohandimwe vahapu ova mona ouwa mokukala ve shii omilandu di na sha nokutuvikila oiniwe yavo, oyo tai dulu oku va kwafela, ofimbo ve li momwenyo, ile oyo tai dulu okupewa vamwe, ovo va hoolola, ngeenge va fi. Alikana kwatafana noshitaimbelewa shEendombwedi daJehova shomoshitukulwa sheni, opo u mone ouyelele wa wedwa po, ngeenge owa hala okuyandja omayambidido, oo a kwatela mo oinima tai shikula:

  •   omatuvikilo okombaanga

  •   omakwashilipaleko nomalongekido opendjela

  •   oiniwe ngaashi etungo, ile edu

  •   oipambuliko nomikuli odo wa ehelwa komahangano onhumba, ile kepangelo

  •   omatestamenti nomikanda dikwao dopaveta di na sha netukulo loikwamaliko (wills and trusts)

 Opo u mone ouyelele muhapu u na sha neenghedi dokuyandja omayambidido moshitukulwa sheni, tala kepandja “Tumina omayambidido kEendombwedi daJehova.”