Josua 9:1-27
9 Eshi eehamba adishe odo da li kombinga yokouninginino womulonga waJordan+ da uda osho sha ningwa po, odo da li koshitukulwa shokeemhunda, muShefela, komunghulo wEfuta Linene*+ nosho yo popepi naLibanon, sha hala okutya, eehamba dOvaheti, dOvaamori, dOvakaanan, dOvaperesi, dOvahevi nodOvajebusi+
2 oda pangela omhangela di ka lwife Josua nOvaisrael.+
3 Ovakalimo vomuGibeon+ navo ova uda osho Josua a ningila Jeriko+ naAi.+
4 Ova konga ondunge, ndele tava tula oikulya momakutu a kulupa nove a londeka keendongi davo, pamwe nomakutu a kulupa omaviinyu, oo a pomboka nokwa hondjwa.
5 Ova li yo va djala eenghaku da kulupa da vandekwa, nova li va djala oikutu ya kulupa ya vandekwa. Omungome wavo aushe owa li yo wa kukuta notau yaumuka.
6 Opo nee ova ya kuJosua konhanda, oyo i li puGilgal,+ ndele tava ti kuye nokovalumenhu Ovaisrael: “Otwa dja koshitukulwa shokokule. Ninga ehangano nafye paife.”
7 Ashike ovalumenhu Ovaisrael ova tya kOvahevi:+ “Otashi dulika hamu di popepi nafye. Ohatu dulu ngahelipi okuninga ehangano nanye?”+
8 Ova nyamukula Josua va ti: “Fye ovapiya* voye.”
Opo nee Josua okwa tya kuvo: “Onye oolyelye, nomwa dja peni?”
9 Onghee ova tya kuye: “Ovapiya voye ova dja koshitukulwa shokokule+ omolwedina laJehova, Kalunga koye, osheshi otwa uda efimano laye, naashishe osho a ninga muEgipiti+
10 nosho yo ashishe osho a ningila eehamba mbali dOvaamori, odo da li hadi di kombinga ikwao* yomulonga waJordan, Sihon,+ ohamba yaHesbon, naOg,+ ohamba yaBasan, oo a li muAstarot.
11 Onghee ovakulunhu vetu nosho yo ovakalimo aveshe vomedu letu ove tu lombwela kutya: ‘Kufeni oikulya yomondjila, ndele tamu i mu ke va shakeneke. Va lombweleni kutya: “Ohatu ka ninga ovapiya veni;+ ningeni ehangano nafye paife.”’+
12 Omungome ou eshi twa li twe u longekida owa li mupyu mefiku olo twa dja komaumbo etu, opo tu uye oku kunye. Paife omu wete kutya owa kukuta notau yaumuka.+
13 Omakutu aa omaviinyu okwa li mape, eshi twe a dila, ndele paife okwa pomboka.+ Oikutu yetu neenghaku oya kulupa, molwaashi ondjila oya li ile neenghono.”
14 Opo nee ovalumenhu ovo ova kufa* oikulya yavo imwe, ashike inava pula Jehova+ kutya oshike ve na okuninga po.
15 Onghee Josua okwa panga ombili navo,+ nokwa ninga ehangano navo, opo va kale nomwenyo, naasho osho omalenga ongudu e va anena.+
16 Konima yomafiku atatu, eshi va ninga ehangano navo, ova uda kutya ohava di popepi, moshitukulwa shavo.
17 Mefiku etitatu, Ovaisrael ova dja mo, ndele tava i koilando yavo, oilando yavo oya li Gibeon,+ Kefira, Beerot naKiriat-jearim.+
18 Ashike Ovaisrael inave va ponokela, molwaashi omalenga ongudu okwe va anena kuJehova,+ Kalunga kaIsrael. Onghee ongudu aishe oya hovela okungongotela omalenga oo.
19 Opo nee omalenga aeshe okwa lombwela ongudu aishe taa ti: “Molwaashi otwe va anena kuJehova, Kalunga kaIsrael, inatu pitikwa tu va ponokele.
20 Ohatu ka ninga ngaha: Ohatu ke va efa va kale nomwenyo, opo tuha handukilwe omolweano olo twe va anena.”+
21 Omalenga okwa weda ko vali a ti: “Va efeni va kale nomwenyo, ashike otava ka ninga ovatyavi voikuni novateki vomeva ongudu aishe.” Eshi osho omalenga e va udanekela.
22 Josua okwe va ifana, ndele ta ti kuvo: “Omolwashike mwe tu kengelela, eshi mwa ti: ‘Otwa dja konhele i li kokule,’ ofimbo mwa dja popepi elela nafye?+
23 Okudja paife, omwa fingwa,+ otamu ka kala alushe ovapika vokutyava oikuni novokuteka omeva omeumbo laKalunga kange.”
24 Ova nyamukula Josua va ti: “Omolwaashi ovapiya voye ova li va lombwelwa sha yela nawa kutya Jehova, Kalunga koye, okwa li a lombwela Moses, omupiya waye, e mu pe edu alishe nokuhanauna po ovakalimo aveshe vamo moipafi yeni.+ Otwa li twa tila mu tu dipae,*+ nomolwaasho twa ninga ngaho.+
25 Paife otu li momake oye. Tu ningila keshe osho u wete kutya oshiwa nosha yuka.”
26 Osho osho e va ningila, okwe va xupifa momake Ovaisrael, noinave va dipaa.
27 Ashike mefiku olo, Josua okwe va tyavifa oikuni noku va tekifa omeva ongudu+ nosho yo oaltari yaJehova, ponhele opo Kalunga ta ka hoolola,+ nova kala tava ningi ngaho fiyo okunena.+
