Josua 3:1-17
-
Israel ta tauluka omulonga waJordan (1-17)
3 Josua okwa penduka ongula inene, ndele ta di mo muSittim+ pamwe nOvaisrael* aveshe nova ya kuJordan. Oko oko va kala oufiku aushe ofimbo inava tauluka omulonga.
2 Konima yomafiku atatu, ovaleli+ ova enda monhanda aishe,
3 ndele tava lombwele ovanhu tava ti: “Diva ashike ngeenge mwa mono oshikefa shehangano laJehova, Kalunga keni, sha humbatwa kovapristeri Ovalevi,+ omu na okudja mo meenhele deni mu shi shikule.
4 Ashike pokati keni nasho napa kale oshinano shomaludimbo 2 000 lwaapo,* inamu ehena popepi nasho, opo mu shiive ondjila oyo mu na okuya nayo, osheshi ondjila oyo inamu i enda nande onale.”
5 Josua okwa lombwela ovanhu ta ti: “Liyapuleni,+ osheshi mongula Jehova ota ka longa oikumwifilonga mokati keni.”+
6 Opo nee Josua okwa lombwela ovapristeri ta ti: “Kufeni oshikefa+ shehangano, ndele tamu tetekele ovanhu komesho.” Onghee ova kufa oshikefa shehangano nove va tetekela komesho.
7 Jehova okwa lombwela Josua a ti: “Nena eli ohandi hovele oku ku tumbaleka moipafi yOvaisrael aveshe,+ opo va shiive kutya ohandi ka kala pamwe naave,+ ngaashi ashike nda kala pamwe naMoses.+
8 Ou na okulombwela ovapristeri ovo va humbata oshikefa shehangano to ti: ‘Ngeenge omwa fiki pomunghulo womeva omulonga waJordan, omu na okukala mwa fikama pomulonga waJordan.’”+
9 Opo nee Josua okwa lombwela Ovaisrael ta ti: “Ileni oku, mu pwilikine keendjovo daJehova, Kalunga keni.”
10 Josua okwa ti: “Kungaho, otamu ka shiiva kutya Kalunga omunamwenyo oku li mokati keni,+ nonokutya ota ka taataa filufilu moipafi yeni Ovakaanan, Ovaheti, Ovahevi, Ovaperesi, Ovagirgas, Ovaamori nOvajebusi.+
11 Taleni! Oshikefa shehangano lOmwene wedu alishe otashi mu tetekele momulonga waJordan.
12 Kufeni paife ovalumenhu 12 momapata aIsrael, mepata keshe omulumenhu umwe,+
13 ndele diva ngeenge ovapristeri ovo va humbata Oshikefa shehangano laJehova, Omwene wedu alishe, ova lyata* eemhadi davo momeva omulonga waJordan, omeva omulonga oo taa kunguluka okudja pombada otaa ka kanghama, ndele taa kala ngaashi ondama.”*+
14 Eshi ovanhu va dja momatwali avo, ofimbo inava tauluka omulonga waJordan, ovapristeri ovo va humbata oshikefa+ shehangano ove va tetekela komesho.
15 Diva eshi ovapristeri ovo va humbata Oshikefa va fika pomulonga waJordan, ndele tava lyata eemhadi davo komunghulo womeva (omeva okomunghulo womulonga waJordan+ okwa kala haa kunguluka efimbo alishe leteyo),
16 omeva oo taa kunguluka okudja pombada okwa kanghama. Okwa yeluka pombada ngaashi ondama,* kokulekule kuAdam, oshilando osho shi li popepi naSaretan, ofimbo omeva oo taa kungulukile mefuta laAraba, Efuta lOmongwa,* a pwiinina po. Okwa kanghama, ndele ovanhu tava tauluka kombinga oyo ya ama kuJeriko.
17 Ovapristeri ovo va li va humbata oshikefa shehangano laJehova ova kala va fikama natango poukukutu+ mokati komulonga waJordan, nOvaisrael aveshe ova tauluka poukukutu,+ fiyo osheshi oshiwana ashishe sha mana okutauluka omulonga waJordan.
