Inda koshikalimo

Ombiibeli otai ti ngahelipi shi na sha nokufyuula ovanaudu?

Ombiibeli otai ti ngahelipi shi na sha nokufyuula ovanaudu?

Enyamukulo lopaMbiibeli

Ombiibeli inai popya kondadalude shi na sha nokufyuula ovanaudu. * Ashike osho yo ya popya shi na sha nomwenyo nosho yo efyo otashi tu kwafele tu kale tu na etaleko li li pandjele. Osha puka okudipaa, ashike kape na oshiteelelwa shokulelepeka onghalamwenyo yaao tu wete kutya oku li pokufya.

Ombiibeli oya popya kutya Kalunga oye Omushiti wetu noku li ‘ofifiya yomwenyo.’ (Epsalme 36:9; Oilonga 17:28) Omwenyo u na ondilo momesho aKalunga. Onghee hano, Kalunga oha tokola ovo hava dipaa vakwao ile have lidipaa vo vene. (Exodus 20:13;1 Johannes 3:15) Shikwao vali, otwa pumbwa okukala twa lungama opo tuha tule eemwenyo detu nosho yo davamwe moshiponga. (Deuteronomion 22:8) Kalunga okwa hala tu kale twa lenga oshali yomwenyo.

Ongahelipi ngeenge omunhu ota ehamenene?

Ombiibeli itai popile okudipaa omunhu nonande oku li mouyahame oo tau twala mefyo. Osho otashi kolekwa koshihopaenenwa shohamba yaIsrael, Saul. Eshi a li a ehamekwa molwoodi, okwa li a pula omuhumbati woiti yaye e mu dipae. (1 Samuel 31:3, 4) Omuhumbati woiti yaye okwa li e shi anya. Opa li omulumenhu umwe oo a li e uya kuDavid noku mu lombwela kutya oye a dipaa Saul. Molwaashi David okwa li e na etaleko la fa laKalunga moshinima osho, okwa li a tokola omulumenhu oo kutya oku na etimba lohonde. — 2 Samuel 1:6-16.

Mbela osha pumbiwa ngoo okulelepeka onghalamwenyo yomunaudu ngeenge kape na eteelelo?

Ombiibeli inai popya kutya otu na okulelepeka onghalamwenyo yomunhu oo e li pokufya. Ponhele yaasho, oya popya etaleko li li pandjele. Efyo omutondi wetu munenenene, shi li oidjemo youlunde wetu. (Ovaroma 5:12; 1 Ovakorinto 15:26) Nonande ihatu kala twa hala okufya, inatu pumbwa okukala twa tila molwaashi Kalunga okwa undaneka kutya ota ka nyumuna ovafi. (Johannes 6:39, 40) Omunhu oo a fimaneka omwenyo ita ka ongaonga okukonga ouhaku oo tau kwafa. Ashike osho itashi ti kutya otu na okukonga ouhaku oo tau lelepeke onghalamwenyo ngeenge tu li pokufya.

Mbela omunhu oo e likufa omwenyo ota dulu ngoo okudiminwa po?

Ahowe, Ombiibeli inai popya kutya okulikufa omwenyo oku li etimba olo itali dulu okudimwa po. Nonande okulikufa omwenyo oshi li enyono la kwata moiti, * Kalunga oha kala e shii eenghalo odo de linyengifa omunhu, ngaashi oupyakadi wopamadiladilo, ostresa, ile eenghalo di na sha noufyuululwakwatya odo tadi dulu okuningifa omunhu e lidipae. (Epsalme 103:13, 14) Jehova oha hekeleke ovo ve li meenghalo da tya ngaho okupitila mOmbiibeli. Shikwao vali, Ombiibeli oya popya kutya “otaku ka kala enyumuko lovayuki nolovalunde.” (Oilonga 24:15) Osho otashi ulike kutya ovo va ninga omapuko a kwata moiti, tashi dulika ve likufa omwenyo, navo ove na eteelelo loku ka nyumunwa.

^ okat. 1 O-Merriam-Webster Learner’s Dictionary oya fatulula oshitya “euthanasia” ile tu tye okufyuula ile okudipaa nonghenda kutya otashi ti “okudipaa omunhu oo ta vele neenghono ile a mona oshiponga, nelalakano lokuhakala ta mono oixuna.” Ngeenge ndokotola ta kwafele omunaudu e li kufe omwenyo, ohashi ifanwa “physician-assisted suicide.”

^ okat. 5 MOmbiibeli omwa tumbulwa vamwe ovo ve lidipaa nokava li va katuka metwokumwe nehalo laKalunga. — 2 Samuel 17:23; 1 Eehamba 16:18; Mateus 27:3-5.