Beto Lemfuka na Kwikama Yonso na Kiyeka ya Nzambi

“Yehowa kele Zuzi na beto, Yehowa kele Muntu ya kepesaka beto bansiku, Yehowa kele Ntotila na beto.”​—YEZAYA 33:22, NW.

1. Inki mambu kusalaka nde Izraele ya ntama kuswaswana ti makanda yankaka?

 DIKANDA ya Izraele kubutukaka na mvu 1513 ya N.T.B. Na ntangu yina, yo vandaka ve ti ntu-mbanza, bwala, to nkutu ntotila mosi ya kemonana. Bantu na yo kuvandaka ntete bampika. Kansi, dikanda yai ya mpa kuvandaka dyaka ya kuswaswana na mutindu yankaka. Yehowa Nzambi kuvandaka Zuzi, Mupesi ya Nsiku, mpi Mfumu na yo ya kukonda kumonana. (Kubasika 19:5, 6; Yezaya 33:22) Ata dikanda yankaka ve lendaka kutuba mutindu yina!

2. Inki ngyufula beto fwete kudiyula na yina metala mutindu Izraele vandaka ya kuyidika, mpi sambu na nki mvutu na ngyufula yai kele mfunu sambu na beto?

² Sambu Yehowa kele Nzambi ya ndonga, mpi Nzambi ya ngemba, beto lenda tuba nde konso dikanda yina yandi yalaka vandaka ya kuyidika mbote. (1 Korinto 14:33) Yo vandaka kibeni mutindu yina na Izraele. Kansi nki mutindu Nzambi yina ya kemonikaka ve lendaka kutwadisa organizasio mosi ya kemonikaka na ntoto? Yo kele mbote nde beto tadila mutindu Yehowa kuyalaka dikanda yai ya ntama. Beto tatadila mingimingi nki mutindu mambu yina yandi vandaka kusala Izraele kemonisa mfunu ya kulemfuka na kwikama yonso na kiyeka ya Nzambi.

Mutindu Bo Vandaka Kuyala Izraele ya Ntama

3. Inki bangidika ya mfunu Yehowa kusalaka sambu na kutwadisa bantu na yandi?

³ Ata Yehowa kuvandaka Ntotila ya kukonda kumonana ya Izraele, yandi tulaka bantu ya kwikama yina vandaka mimonisi na yandi na ntoto. Yandi pesaka bamfumu ya dikanda, bamfumu ya banzo, ti bambuta-bantu mukumba ya kulongisila mpi ya kusambisa bantu. (Kubasika 18:25, 26; Kulonga 1:15) Kansi, beto lenda yindula ve nde bantu yai ya kuvandaka na mikumba lendaka kukuka na kusambisa bantu na luswasukusu mpi mayele ya kufwana kukonda lutwadisu ya Nzambi. Bo vandaka ve bantu ya kukuka, mpi bo lendaka ve kumona mambu yina vandaka na ntima ya bantu yina bo vandaka kusambila na bo. Ata mpidina, bazuzi yina vandaka kuwa Nzambi boma lendaka kupesa bampangi na bo bandongisila ya mfunu sambu yo vandaka kukatuka na Nsiku ya Yehowa.​—Kulonga 19:15; Nkunga 119:97-100.

4. Yo lombaka nde bazuzi ya kwikama ya Izraele kubuya bangindu ya nki mutindu, mpi sambu na inki?

⁴ Kansi, katula kuzaba Nsiku, yo vandaka kulomba nde zuzi kuzaba mambu yankaka mingi. Sambu bo vandaka bantu ya kukonda kukuka, yo lombaka nde bambuta-bantu kusala ngolo sambu na kukatula konso ngindu yina ya mbi, bonso bwimi, kupona-pona, mpi nzala ya bima, ya lenda kubebisa mutindu na bo ya kuzenga makambu. Moize kuzabisaka bo nde: “Beno fweti zenga makambu kiteso mosi, ata ya mbuta ata ya leki, ata ya mvwama ata ya nsukami; beno lenda kotila muntu ve. Beno lenda tina muntu boma mpi ve, sambu Nzambi muntu ta songaka beno mutindu beno fweti zenga makambu.” Ya kyeleka, bazuzi ya Izraele vandaka kuzenga makambu sambu na Nzambi. Bo vandaka na mukumba mosi ya mbote kibeni!​—Kulonga 1:16, 17.

5. Katula bazuzi, inki bangidika yankaka Yehowa kusalaka sambu na kulungisa bampusa ya bantu na yandi?

⁵ Yehowa kusalaka bangidika yankaka sambu na kulungisa bampusa ya kimpeve ya bantu na yandi. Ata na ntwala bo kuma na Ntoto ya Lusilu, yandi lombaka bo na kutunga tenta, yina kuvandaka nto ya lusambu ya kyeleka. Yandi tulaka mpi banganga-Nzambi sambu na kulonga Nsiku, kupesa bimenga ya bambisi, mpi kuyoka ndumbu na suka ti na nkokila. Nzambi tulaka Aroni, mbuta ya Moize, nganga-Nzambi ya nene ya ntete  ya Izraele mpi yandi pesaka bana ya Aroni mukumba ya kusadisa tata na bo na bisalu na yandi.​—Kubasika 28:1; Kutanga 3:10; 2 Bansangu 13:10, 11.

6, 7. (a) Inki kuwakana kuvandaka na kati ya banganga-Nzambi ti Balevi yina kuvandaka ve banganga-Nzambi? (b) Inki dilongi beto lenda baka na mutindu Balevi vandaka kusala bisalu ya mitindu mingi? (Kolosai 3:23)

⁶ Kulungisa bampusa ya kimpeve ya bamilio ya bantu kuvandaka kisalu mosi ya nene, mpi ntalu ya banganga-Nzambi kuvandaka fyoti kibeni. Yo yina Nzambi kuyidikaka nde bantu yankaka ya dikanda ya Levi kusadisa bo. Yehowa kuzabisaka Moize nde: “Na kati ya bantu ya Israele nge ta pesa bantu ya dikanda ya Levi na maboko ya Aroni ti bana na yandi sambu na kutalaka Nzo-Nzambi.”​—Kutanga 3:9, 39.

⁷ Balevi vandaka kudibongisa mbote. Bo vandaka ya kudikabisa na mabuta tatu, bantu ya Gershoni, bantu ya Kehati, mpi bantu ya Merari, konso bantu kuvandaka ti kisalu na bo. (Kutanga 3:14-17, 23-37) Bisalu yankaka lendaka kumonana nde yo lutaka yankaka na mfunu, kansi yonso kuvandaka mfunu. Kisalu ya Balevi ya Kehati kulombaka nde bo vanda penepene ti sanduku ya kuwakana ya santu mpi bisadilu ya tenta. Kansi, Mulevi yonso kuvandaka na mikumba ya kitoko, yandi vanda muntu ya kikanda ya Kehati to ve. (Kutanga 1:51, 53) Yo kele mawa na kumona nde bantu mingi vandaka kusepela ve na kisalu na bo. Olie na kulemfuka na kwikama yonso na kiyeka ya Nzambi, kyese na bo kumanaka mpi bo yedisaka lulendo, nzala ya kimfumu, ti kimpala. Mulevi mosi na zina ya Kore kuvandaka na kati ya bantu yai.

“Na Zulu na Yo Beno Ke Lomba Diaka Kisalu ya Kinganga-Nzambi?”

8. (a) Kore kuvandaka nani? (b) Inki lendaka kuvanda na kisina ya mambu yina kupusaka Kore na kuyantika kutadila banganga-Nzambi na meso ya kinsuni?

⁸ Kore kuvandaka ve mfumu ya bantu ya Levi, yandi vandaka mpi ve mfumu ya mabuta ya Kehati. (Kutanga 3:30, 32) Kansi, yandi vandaka mfumu yina bantu ya Izraele vandaka kuzitisa. Yo fwete vanda nde kisalu ya Kore kusalaka nde bo yikana mingi ti Aroni mpi ti bana na yandi. (Kutanga 4:18, 19) Sambu yandi vandaka kumona bifu ya mbi ya bantu yai, Kore lendaka kuyindula mutindu yai: ‘Banganga-Nzambi yai kele kibeni na bifu mingi ya mbi, kansi yo kelomba nde mono zitisa bo! Ntama mingi ve Aroni kusalaka mwana-ngombe ya wolo. Kusambila mwana-ngombe yina kusalaka nde bantu na beto kusambila biteki. Ntangu yai Aroni, mpangi ya Moize kesala kisalu ya kinganga-Nzambi! Bantu yai keponaka kaka bampangi na bo! Ebuna nki beto lenda tuba sambu na bana ya Aroni, Nadabi ti Abihu? Ya kyeleka, Yehowa kufwaka bo sambu bo monisaka kukonda bulemfu ya ngolo na kisalu na bo!’ a (Kubasika 32:1-5; Levi 10:1, 2) Ata bangindu ya Kore vandaka ya nki mutindu, yo kele pwelele nde yandi yantikaka kumona kinganga-Nzambi na meso ya kimuntu. Yo yina kupusaka yandi na kukolama na Moize ti Aroni mpi, nsukansuka, na Yehowa.​—1 Samuele 15:23; Yakobo 1:14, 15.

9, 10. Inki mutindu Kore ti bankolami yina kulandaka yandi kufundaka Moize, mpi nki mambu ya bo zabaka zolaka kusadisa bo na kukonda kusala mutindu yina?

 ⁹ Sambu yandi vandaka muntu ya nene, yo vandaka ve mpasi sambu Kore kubenda bantu yankaka yina kuvandaka ti bangindu bonso yandi. Yandi, Datani ti Abirami, bo zwaka bantu 250 yina kundimaka ngindu na yandi, bo yonso kuvandaka bamfumu ya kibuka. Bo yonso kwendaka kutubila Moize ti Aroni nde: “Beto yonso kele bantu ya Israele, bantu ya Nzambi; Mfumu Nzambi ke vandaka na beto yonso. Ebuna sambu na nki beno ke kudimona nde beno me luta bantu yankaka ya Mfumu Nzambi na mfunu?”​—Kutanga 16:1-3.

¹⁰ Mambu yina bantu yai ya kukolamaka kuzabaka zolaka kusadisa bo na kukonda kutula ntembe na kiyeka ya Moize. Sambu ntama mingi ve, Aroni ti Miriami kusalaka dyambu ya mutindu mosi. Ya kyeleka, bo vandaka ti bangindu kaka bonso yina ya Kore! Na Kutanga 12:1, 2 bo yulaka nde: “Keti Mfumu Nzambi tubaka na Moize mpamba? Keti yandi tubaka mpi ve na beto?” Yehowa vandaka kuwa bo. Yandi songaka Moize, Aroni, ti Miriami na kukwenda na kyelo ya tenta ya lukutakanu sambu Yandi monisa bo ntwadisi yina yandi meponaka. Na nima, Yehowa kutubaka pwelele nde: “Kana na kati na beno ke na profete, mono Mfumu Nzambi ke kwisaka kudisonga na yandi na bidimbu, mono ke tubilaka yandi na bandosi. Kansi yo kele mpidina ve ntangu mono ke tubilaka muntu na mono Moize; yandi muntu ya mono ke tulaka ntima na kutalaka bantu na mono Israele.” Na nima ya kutuba mpidina, Yehowa kupesaka Miriami maladi ya lepre sambu na mwa ntangu fyoti.​—Kutanga 12:4-7, 10.

11. Inki mutindu Moize kunwanaka ti dikambu ya Kore?

¹¹ Kore ti bantu yonso yina kulandaka yandi vandaka kuzaba mambu yai. Nzambi lendaka ve kulolula kukolama na bo. Ata mpidina, Moize kuyindulaka ti bo na kukanga ntima yonso. Yandi syamisaka bo na kumonisa ntonda sambu na mikumba na bo. Yandi tubaka nde: “Keti yo kele kima ya fioti yo yina Nzambi ya Israele solaka beno na kati ya bantu ya Israele sambu na kutelama na meso na yandi?” Ve, yo vandaka ve “kima ya fioti”! Balevi vandaka na mikumba ya nene. Inki dyaka bo vandaka kuzola? Bangogo ya Moize kuyikaka kumonisaka bangindu ya ntima na bo: “Ebuna na zulu na yo beno ke lomba diaka kisalu ya kinganga-Nzambi?” b (Kutanga 12:3; 16:9, 10) Kansi, inki Yehowa kusalaka sambu na kukolama yai na kiyeka ya Nzambi?

Zuzi ya Izraele Kezenga Makambu

12. Inki zolaka kusala nde bantu ya Izraele kulanda na kuvanda na bangwisana ya mbote ti Nzambi?

¹² Ntangu Yehowa kupesaka Nsiku na Izraele, yandi songaka bantu nde kana bo lemfuka, bo takuma “bantu ya santu” (NW) mpi dikanda yai zolaka kubikala kaka ya santu kana bo zitisaka ngidika ya Yehowa. (Kubasika 19:5, 6) Ntangu yai, sambu na kukolama yai ya kubasikaka, ntangu kulungaka sambu Zuzi ya Izraele mpi Mupesi ya Nsiku kuzenga makambu! Moize kuzabisaka Kore nde: “Mbasi nge ti bantu na nge nkama zole makumi tanu (250) beno kwisa kutelama na meso ya Mfumu Nzambi. Aroni mpi ta vanda kuna. Konso muntu fweti baka nzungu na yandi ya ndumbu ti  kutula yo ndumbu, ebuna yandi kwisa kunata yo na ntwala ya Mfumu Nzambi.”​—Kutanga 16:16, 17.

13. (a) Sambu na nki beto lenda tuba nde kima kupusaka bankolami na kuyoka ndumbu na ntwala ya Yehowa kele lulendo? (b) Inki mutindu Yehowa kuzengaka makambu ya bankolami?

¹³ Nsiku ya Nzambi vandaka kutuba nde kaka banganga-Nzambi bantu fwete yoka ndumbu. Dibanza ya kuyoka ndumbu na ntwala ya Yehowa ya bo pesaka na Balevi yina kuvandaka ve banganga-Nzambi zolaka kupusa bankolami yango na kuyindula. (Kubasika 30:7; Kutanga 4:16) Kore ti bantu na yandi kuyindulaka ve! Na kilumbu yina kulandaka “Kore songaka bantu yonso ya Israele na kwisa kutelama na ntwala ya Moize ti Aroni kuna na munoko ya Nzo-Nzambi.” Disolo yango kezabisa beto nde: “Mfumu Nzambi tubaka na Moize ti Aroni nde: ‘Nge ti Aroni beno katuka na kati ya bantu yai, mono ke fwa bo sesepi yai.’” Kansi Moize ti Aroni kubondilaka Nzambi na kutanina bantu. Yehowa kuwaka kisambu na bo. Kansi Kore ti bantu na yandi, “nkama zole makumi tanu bayina vandaka kwisa kupesa bima ya mananasi, Mfumu Nzambi tindaka tiya, yo yokaka bo.”​—Kutanga 16:19-22, 35. c

14. Sambu na nki Yehowa kubakilaka kimvuka ya Izraele desizio ya ngolo?

¹⁴ Dyambu ya kuyituka kele nde bantu ya Izraele yina kumonaka mambu ya Yehowa kusalaka bankolami kubakaka ve dilongi. “Na kilumbu ya kulanda bantu yonso ya Israele bokutilaka Moize ti Aroni nde: ‘Beno me fwa bantu ya Mfumu Nzambi!’” Bantu ya Izraele kukotilaka bankolami! Nsukansuka, Yehowa kukangaka dyaka ve ntima. Ntangu yai, ata muntu mosi ve, yo vanda Moize to Aroni, lendaka kubondila yandi na kulolula bantu. Yehowa kutindilaka bankolami yai maladi, “Ntalu ya bantu yina kufwaka vandaka mile kumi na iya nkama nsambwadi (14 700), kukonda kutanga bantu yina kufwaka ntangu Kore salaka mubulu.”​—Kutanga 17:6-14.

15. (a) Inki bikuma zolaka kusadisa bantu ya Izraele na kundima kukonda mpasi kiyeka ya Moize ti Aroni? (b) Disolo yai melonga nge nki sambu na Yehowa?

¹⁵ Bantu yai kufwaka na buzoba na bo kibeni. Yo zolaka kuvanda mbote kana bo sadilaka mayele na bo sambu na kuyindula. Bo zolaka kudiyula bangyufula bonso yai: ‘Banani kutulaka luzingu na bo na kigonsa na ntwala ya Farao? Banani kulombaka nde bantu ya Izraele kukatuka na kimpika? Nani muntu bo bingaka na Ngumba ya Orebi sambu na kusolula ti wanzyo ya Nzambi ntangu bantu ya Izraele kukatukaka na kimpika?’ Ya kyeleka, disolo ya Moize ti Aroni kupesaka banzikisa ya kwikama na bo na Yehowa mpi zola na bo sambu na bantu. (Kubasika 10:28; 19:24; 24:12-15) Yehowa vandaka ve na kyese na kufwa bankolami. Kansi, ntangu yandi vandaka kumona nde bantu kelanda kaka na kukolama, yandi vandaka kubaka lukanu ya ngolo. (Ezekiele 33:11) Mambu yai yonso kele mfunu mingi sambu na beto bubu yai. Sambu na inki?

Kubakisa Nzila Yina Yehowa Kesadilaka Bubu Yai

16. (a) Inki kidimbu zolaka kundimisa Bayuda ya mvu-nkama ya ntete nde Yezu vandaka mumonisi ya Yehowa? (b) Sambu na nki Yehowa kuyingisaka kinganga-Nzambi ya Balevi, mpi yandi yingisaka yo na nki kima?

¹⁶ Bubu yai, kele ti “dikanda” ya mpa yina Yehowa kele Zuzi, Mupesi ya Nsiku, mpi Ntotila yina kemonikaka ve. (Matayo 21:43) “Dikanda” yango kubutukaka na mvu-nkama ya ntete ya T.B. Na ntangu yina tempelo ya kitoko ya Yeruzalemi kuyingaka tenta yina vandaka na bilumbu ya Moize, kisika yina Balevi vandaka kusala bisalu.  (Luka 1:5, 8, 9) Kansi, na mvu 29 ya T.B., tempelo yankaka, ya kimpeve, kubutukaka, Yezu Kristu muntu vandaka Nganga-Nzambi na yo ya Nene. (Baebreo 9:9, 11) Dyambu ya metala kiyeka ya Nzambi kubasikaka dyaka. Yehowa zolaka kusadila nani sambu na kutwadisa “dikanda” yai ya mpa? Yezu kumonisaka nde yandi vandaka kibeni ya kwikama na Nzambi. Yandi zolaka bantu. Yandi salaka mpi bidimbu mingi ya kuyituka. Kansi, bonso bankaka na bo ya lulendo, bantu mingi ya dikanda ya Levi buyaka na kundima Yezu. (Matayo 26:63-68; Bisalu 4:5, 6, 18; 5:17) Nsukansuka, Yehowa kuyingisaka kinganga-Nzambi ya Balevi ti kima yankaka ya luswaswanu​—kinganga-Nzambi ya kimfumu. Kinganga-Nzambi ya kimfumu yai kele tii bubu yai.

17. (a) Inki kimvuka kesalaka kinganga-Nzambi ya kimfumu bubu yai? (b) Inki mutindu Yehowa kesadilaka kinganga-Nzambi ya kimfumu?

¹⁷ Bubu yai kinganga-Nzambi yai ya kimfumu mesalama na banani? Ntumwa Piere kepesa mvutu na ngyufula yai na mukanda na yandi ya ntete ya kupemama. Sambu na bapakulami yina kele nitu ya Kristu, Piere kusonikaka nde: “Beno kele bantu yina ya Nzambi solaka, beno kele banganga-Nzambi ya Mfumu ya nene, beno kele bantu ya santu mpenza. Nzambi solaka beno sambu beno zabisa bantu nsangu ya mambu ya nene ya yandi salaka. Yandi solaka beno mpi sambu beno katuka na mpimpa, beno temuka na mwini na yandi ya kuyituka.” (1 Piere 2:9) Bangogo yai kemonisa pwelele nde na kimvuka, balongoki ya kupakulama ya Yezu kusalaka ‘kinganga-Nzambi yai ya kimfumu,’ yina Piere bingaka mpi nde “bantu ya santu.” Bo kele nzila yina Yehowa kesadilaka sambu na kupesa bantu na yandi malongi mpi lutwadisu ya kimpeve.​—Matayo 24:45-47.

18. Inki kuwakana kele na kati ya bankuluntu yina Nzambi metulaka ti kinganga-Nzambi ya kimfumu?

¹⁸ Bamonisi ya kinganga-Nzambi ya kimfumu kele bankuluntu, yina kele na mikumba na mabundu ya bantu ya Yehowa na ntoto ya mvimba. Beto fwete lemfukila babakala yai mpi kupesa bo maboko, bo vanda bapakulami to ve. Sambu na inki? Sambu, na nzila ya mpeve santu na yandi, Yehowa metulaka bankuluntu na bisika yina bo kele. (Baebreo 13:7, 17) Inki mutindu?

19. Na nki mutindu mpeve santu keponaka bankuluntu?

¹⁹ Babakala yai ya kuyela kelungisaka mambu yina kele na Ndinga ya Nzambi, yina kele mbuma ya mpeve ya Nzambi. (1 Timoteo 3:1-7; Tito 1:5-9) Yo yina, beto lenda tuba nde bo keponaka bo na nzila ya mpeve santu. (Bisalu 20:28) Bankuluntu fwete zaba Ndinga ya Nzambi mbotembote. Na mbandu ya Zuzi ya Nene yina kuponaka bo, bankuluntu fwete buya mambu yonso yina kemonisaka kuponapona na ntangu bo kezenga makambu.​—Kulonga 10:17, 18.

20. Nge kevandaka na ntonda mingi na nki kisalu ya ngolo ya bankuluntu kesalaka?

²⁰ Olie ya kunwanina kiyeka na bo, beto kemonisaka ntonda mingi na kisalu ya ngolo yina bankuluntu na beto kesalaka! Disolo ya kisalu na bo  ya kwikama, yina bo mesala bamvula mingi, kepusa beto na kutudila bo ntima. Na kwikama yonso bo kebongisaka mpi ketambwisaka balukutakanu ya dibundu, bo kesalaka kumosi ti beto na kusamuna “Nsangu yai ya Mbote ya Kimfumu,” mpi bo kepesaka beto bandongisila ya Masonuku ntangu beto kele na mfunu na yo. (Matayo 24:14; Baebreo 10:23, 25; 1 Piere 5:2) Bo ketalaka beto ntangu beto kebela mpi bo kepesaka beto kikesa ntangu beto mefwila muntu. Bo kepesaka maboko na mambote ya Kimfumu na kwikama yonso mpi kukonda kutala mambote na bo mosi. Mpeve ya Yehowa kele ti bo; yandi kendimaka bo.​—Galatia 5:22, 23.

21. Inki mambu bankuluntu fwete vila ve, mpi sambu na inki?

²¹ Ya kyeleka, bankuluntu kele bantu ya kukuka ve. Sambu bo kezabaka bandilu na bo, bo keyalaka ve bantu yina bo ketwadisaka, ‘bantu yina ya Nzambi pesaka bo na kutala.’ Kansi, bo kemonaka nde bo kele ‘bantu ya kisalu sambu na kiese ya bampangi na bo.’ (1 Piere 5:3; 2 Korinto 1:24) Bankuluntu ya kudikulumusa, yina kesalaka mingi kezolaka Yehowa, mpi bo kezabaka nde kana bo kelanda mbandu na yandi mbotembote bo takuka kusala mambu mingi ya mbote na dibundu. Sambu bo kezabaka dyambu yai, bo kesalaka ngolo na kumonisa bikalulu yina Nzambi kemonisaka, bikalulu bonso zola, mawa, mpi kukanga ntima.

22. Inki mutindu disolo ya Kore mekumisa lukwikilu na beto ngolo sambu na organizasio ya Yehowa ya kemonikaka?

²² Beto kele na kyese kibeni sambu Yehowa kele Mfumu na beto ya kemonanaka ve, Yezu Kristu kele Nganga-Nzambi na beto ya Nene, banganga-Nzambi ya kupakulama ya kimfumu kele balongi na beto, mpi Bakristu ya kwikama yina kele bankuluntu kepesaka beto bandongisila! Ata baorganizasio ya bantu ketwadisaka kevandaka ve ya kukuka, beto kele na kyese mutindu beto kekuka kusadila Nzambi na kati ya bampangi na beto Bakristu ya kwikama, bayina kelemfukaka na kiyeka ya Nzambi na kyese yonso!

[Banoti na nsi ya lutiti]

Inki Nge Melonguka?

• Inki bangidika ya zola Yehowa kusalaka sambu na kutwadisa bantu ya Izraele?

• Sambu na nki Nzambi kulolulaka ve kukolama ya Kore na ntwala ya Moize ti Aroni?

• Inki dilongi beto kebaka na mutindu Yehowa kuzengaka makambu ya bankolami yina?

• Inki mutindu beto lenda monisa nde beto kele na ntonda sambu na bangidika ya Yehowa bubu yai?

[Bangyufula ya disolo ya kulonguka]

[Kifwanisu ya kele na lutiti 23]

Keti nge kesepelaka mpi kepesaka lukumu na konso mukumba yina nge kele na yo na kisalu ya Yehowa?

[Kifwanisu ya kele na lutiti 24]

“Ebuna sambu na nki beno ke kudimona nde beno me luta bantu ya nkaka ya Mfumu Nzambi na mfunu?”

[Kifwanisu ya kele na lutiti 26]

Bankuluntu yina Nzambi meponaka kele bamonisi ya kinganga-Nzambi ya kimfumu