Kutanga 12:1-16

  • Miriami mpi Aroni me telamina Moize (1-3)

    • Moize, muntu ya kudikulumusa kibeni kuluta bantu yonso (3)

  • Yehowa me kotila Moize (4-8)

  • Maladi ya lepre me simba Miriami (9-16)

12  Kansi, Miriami ti Aroni yantikaka kutuba mambu ya mbi sambu na Moize sambu na nkento ya insi ya Kushi+ yina yandi kwelaka.  Bo vandaka kutuba nde: “Keti Yehowa tubaka kaka na nzila ya Moize? Keti yandi tubaka mpi ve na nzila na beto?”+ Mpi Yehowa vandaka kuwa.+  Kansi, Moize vandaka muntu ya kudikulumusa kibeni kuluta bantu yonso*+ yina vandaka na nsi-ntoto ya mvimba.  Na mbala mosi, Yehowa tubilaka Moize, Aroni, mpi Miriami nde: “Beno tatu, beno basika mpi beno kwenda na tenta ya lukutakanu.” Ebuna bo kwendaka bo tatu.  Na nima, Yehowa kwisaka kukulumuka na dikunzi ya dituti,+ telamaka na munoko ya tenta, mpi bingaka Aroni ti Miriami. Bo zole pusanaka pene-pene.  Ebuna yandi tubaka nde: “Pardo, beno wa mambu ya mono ke tuba. Kana mbikudi ya Yehowa vandaka na kati na beno, mono zolaka kudimonisa na yandi na mbona-meso,+ mpi mono zolaka kusolula ti yandi na ndosi.+  Kansi, yo kele ve mutindu yina sambu na nsadi na mono Moize! Mono me pesa yandi nzo na mono ya mvimba.*+  Mono ke solulaka ti yandi+ meso na meso,* na mutindu ya pwelele, kansi ve na bingana; mpi yandi ke monaka mutindu Yehowa ke monanaka. Ebuna, sambu na nki beno waka boma ve ya kutuba mambu ya mbi sambu na nsadi na mono Moize?”  Ebuna Yehowa wilaka bo makasi mingi, mpi yandi katukaka na ntwala na bo. 10  Dituti katukaka na zulu ya tenta, mpi tala! Maladi ya lepre yina vandaka mpembe bonso mvula ya mpembe*+ simbaka Miriami. Na nima, Aroni talaka Miriami, mpi yandi monaka nde maladi ya lepre+ me simba Miriami. 11  Na mbala mosi, Aroni tubilaka Moize nde: “Mono ke bondila nge, mfumu na mono! Pardo, kutangila beto ve disumu yai! Beto me sala mambu na buzoba na diambu yai. 12  Pardo, kubika ve nde yandi landa kuvanda bonso muntu ya kufwa, yina ndambu ya nsuni na yandi kele ya kupola na lubutuku!” 13  Mpi Moize yantikaka kudidila Yehowa nde: “O Nzambi, pardo, belula yandi! Pardo!”+ 14  Yehowa vutudilaka Moize nde: “Kana tata na yandi kulosila yandi mate na luse, keti yandi zolaka ve kuvanda na nsoni bilumbu nsambwadi? Beno tula yandi na kingenga bilumbu nsambwadi na nganda ya camp,+ mpi na nima beno lenda vutula yandi.” 15  Yo yina, bo tulaka Miriami na kingenga bilumbu nsambwadi+ na nganda ya camp, mpi bantu katulaka ve camp tii kuna bo vutulaka Miriami. 16  Ebuna bantu katukaka na Azeroti+ mpi bo kwendaka kusala camp na bo na ntoto-makanga ya Parani.+

Banoti na nsi ya lutiti

Na kisina, “Na nzo na mono ya mvimba, yandi ke kudimonisa muntu ya kwikama.”
Na kisina, “munoko na munoko.”
To “neige.”
To “Yehozue,” disongidila “Yehowa Kele Luguluku.”