Yobi 1:1-22

  • Kwikama mpi kimvwama ya Yobi (1-5)

  • Satana me tula ntembe na bikuma ya kwikama ya Yobi (6-12)

  • Yobi me vidisa bima na yandi mpi bana na yandi (13-19)

  • Yobi me pesa ve Nzambi foti (20-22)

1  Kuvandaka ti muntu mosi na insi ya Usi, zina na yandi Yobi.*+ Yandi vandaka muntu ya mbote mpi ya kwikama;*+ yandi vandaka kuwa Nzambi boma mpi vandaka kutina mambu ya mbi.+  Yandi butaka bana-babakala nsambwadi mpi bana-bankento tatu.  Bitwisi na yandi vandaka mameme 7 000, bashamo 3 000, bangombe 1 000,* mpi bampunda* 500, ti bansadi mingi kibeni, yo yina yandi kumaka muntu ya kuluta nene na kati ya bantu yonso ya Esti.  Bana na yandi ya babakala vandaka kusala nkinsi na banzo na bo, konso muntu na kilumbu na yandi.* Bo vandaka kubingisa bampangi na bo tatu ya bankento sambu na kudia mpi kunwa ti bo.  Kana bilumbu ya bankinsi yina ya kulandana me mana, Yobi vandaka kubinga bo na kukwisa kisika yandi vandaka sambu na kusantisa bo. Ebuna yandi vandaka kutelama na suka-suka mpi kupesa bimenga ya kuyoka+ sambu na konso muntu na kati na bo. Sambu Yobi vandaka kutuba nde: “Ziku bana na mono me sala disumu mpi me singa Nzambi na ntima na bo.” Yai mambu Yobi vandaka kusala ntangu yonso.+  Ebuna kilumbu mosi, ntangu bana ya Nzambi ya kieleka*+ kotaka sambu na kumonika na ntwala ya Yehowa,+ Satana+ mpi kotaka na kati na bo.+  Ebuna Yehowa tubilaka Satana nde: “Nge me katuka na wapi?” Satana vutudilaka Yehowa nde: “Na kulenga-lenga na ntoto mpi na kutambula-tambula na kati na yo.”+  Ebuna Yehowa tubilaka Satana nde: “Keti nge me tula dikebi* na nsadi na mono Yobi? Kele ve ti muntu bonso yandi na ntoto. Yandi kele muntu ya mbote mpi ya kwikama,*+ yina ke waka Nzambi boma, mpi ke tinaka mambu ya mbi.”  Ebuna Satana vutudilaka Yehowa nde: “Keti Yobi ke waka Nzambi boma sambu na mpamba?+ 10  Keti nge me tulaka ve lupangu ya lutaninu na nziunga na yandi,+ na nziunga ya nzo na yandi mpi ya bima yonso yina yandi kele na yo? Nge me sakumunaka kisalu ya maboko na yandi,+ mpi bitwisi na yandi me yalumukaka na insi ya mvimba. 11  Kansi, sambu na kusoba, tandula diboko na nge mpi bebisa yonso yina yandi kele na yo, mpi yandi ta singa nge kibeni na meso* na nge.” 12  Ebuna Yehowa tubilaka Satana nde: “Tala! Yonso yina yandi kele na yo kele na maboko na nge.* Kansi kusimba yandi ve na nitu!” Yo yina Satana katukaka na ntwala* ya Yehowa mpi basikaka.+ 13  Ebuna kilumbu mosi, ntangu bana na yandi ya babakala ti ya bankento vandaka kudia mpi kunwa vinu na nzo ya mbuta na bo ya ntete,+ 14  kinati-nsangu mosi kwisaka na Yobi mpi tubaka nde: “Bangombe vandaka kubundula mpi bampunda vandaka kudia matiti pene-pene na bo 15  ntangu bantu ya Sabea kotaka na ngolo mpi bakaka yo, ebuna bo me fwa bansadi na mbele ya bitumba. Mono mpamba muntu me tina sambu na kukwisa kusonga nge.” 16  Ntangu yandi vandaka ntete kutuba, muntu ya nkaka kwisaka mpi tubaka nde: “Tiya ya Nzambi* me katuka na zulu, yo me bwa mpi me pela na kati ya mameme ti ya bansadi, mpi yo me yoka bo! Mono mpamba muntu me tina sambu na kukwisa kusonga nge.” 17  Ntangu yandi vandaka ntete kutuba, muntu ya nkaka kwisaka mpi tubaka nde: “Bantu ya Kaldea+ me sala bimvuka tatu, bo me kotila bashamo na kintulumukina mpi me baka yo, mpi bo me fwa bansadi na mbele ya bitumba. Mono mpamba muntu me tina sambu na kukwisa kusonga nge.” 18  Ntangu yandi vandaka ntete kutuba, muntu ya nkaka diaka kwisaka mpi tubaka nde: “Bana na nge ya babakala ti ya bankento vandaka kudia mpi kunwa vinu na nzo ya mbuta na bo ya ntete. 19  Na mbala mosi mupepe mosi ya ngolo me katuka na ntoto-makanga, yo me bula binkonko iya ya nzo, yo yina nzo me bwila baleke mpi bo me fwa. Mono mpamba muntu me tina sambu na kukwisa kusonga nge.” 20  Yo yina Yobi telamaka, pasulaka bilele na yandi mpi zengaka nsuki na yandi, ebuna yandi bwaka na ntoto, yandi fukamaka 21  mpi tubaka nde: Mono basikaka na divumu ya mama na mono kinkonga,Mpi mono ta vutuka kinkonga.+ Yehowa me pesa,+ Yehowa me baka. Bika nde zina ya Yehowa kulanda kubaka lukumu.” 22  Na mambu yai yonso, Yobi salaka ve disumu mpi fundaka ve Nzambi nde yandi ke salaka mambu ya mbi.*

Banoti na nsi ya lutiti

Ziku yo ke tendula, “Kima ya Bo Ke Mengaka.”
To “muntu ya kukonda kifu mpi ya mbote.”
Na kisina, “bangombe zole-zole 500.”
Na kisina, “bampunda ya bankento.”
To “kusala nkinsi na nzo ya konso muntu na ntangu na yandi.”
Kutuba mosi ya kifwani ya Kiebreo ya ke tubila bana ya Nzambi, bawanzio.
Na kisina, “me tula ntima na nge.”
To “muntu ya kukonda kifu mpi ya mbote.”
Na kisina, “luse.”
To “kele na nsi ya kiyeka na nge.”
Na kisina, “luse.”
To mbala ya nkaka, “Nsemo.”
To “pesaka ve Nzambi foti ata sambu na kima mosi ya mbi.”