“PAGYAMANAN.” Siasino koma ti di maragsakan no kasta ti maibaga kenkuana gapu iti nasayaat a naaramidanna wenno iti naimpusuan a regalona? Siempre kayattayo amin a maapresiar ti panagreggettayo, nangruna no dagiti ay-ayatentayo ti mangibaga iti dayta. Ngem apresiaren kadi ni Jehova a Dios, a kangrunaan a mangay-ayat kadatayo, ti panagreggettayo nga agserbi kenkuana? Usigentayo ti inaramidna ken Ebed-melec, maysa a lalaki a nangirisgo iti biagna tapno maisalakan ti maysa a propeta ti Dios.​—Basaem ti Jeremias 38:7-13 ken 39:16-18.

Asino ni Ebed-melec? Maysa idi nga opisial iti palasio ni Zedekias nga ari ti Juda. a Kapanawenan ni Jeremias, nga imbaon ti Dios a mangipakdaar iti asidegen a pannakadadael ti di matalek a Juda. Managbuteng ni Ebed-melec iti Dios ken dakkel ti panagraemna ken Jeremias nupay adu kadagiti prinsipe ti di mamati iti Dios. Nasubok dagiti nadiosan a kualidad ni Ebed-melec idi a dagiti nadangkes a prinsipe pinabasolda ni Jeremias a kumonkontra iti gobierno. Impisokda ti propeta iti napitak a pagurnongan ti danum ket binay-anda a matay koman sadiay iti bisin. (Jeremias 38:4-6) Ania ngata ti inaramid ni Ebed-melec?

Situtured ken siaalibtak a nagtignay ni Ebed-melec. Saan a nagamak iti aniaman nga aramiden kenkuana dagiti prinsipe. Napan iti sanguanan ni Zedekias ket imbagana ti di nainkalintegan a pannakatrato ni Jeremias. Nalabit itudtudona pay dagiti makin-aramid iti dayta idi imbagana iti ari: “Dagitoy a lallaki nagaramidda iti dakes . . . ken Jeremias.” (Jeremias 38:9) Napatgan ti kiddaw ni Ebed-melec ket imbilin ni Zedekias a mangikuyog iti 30 a lallaki tapno isalakanda ni Jeremias.

Idin, impakita ni Ebed-melec ti sabali pay a nagsayaat a kababalinna​—ti kinamanangngaasi. Nangala iti ‘rutrot a rigis ken rutrot a lupot ket impababana dagita ken Jeremias babaen kadagiti tali.’ Apay a nangted iti rigis ken lupot? Tapno adda iyap-ap ni Jeremias iti kilikilina ket saan a makulatlatan no mayaon iti kapitakan.​—Jeremias 38:11-13.

Nakita ni Jehova ti inaramid ni Ebed-melec. Ngem inapresiarna kadi dayta? Babaen ken Jeremias, imbaga ti Dios ken Ebed-melec a dandanin ti pannakadadael ti Juda. Kalpasanna, impasigurado ni Jehova nga isalakanna ni Ebed-melec, ket kinunana: “Ispalenkanto . . . Saankanto a mayawat iti ima dagiti lallaki . . . Di bumurong nga ipaayankanto iti itatalaw . . . Iti kampilan saankanto a mapasag . . . Sigurado a matagikuamto ti kararuam kas maysa a samsam.” Apay nga inkari ni Jehova nga ispalenna ni Ebed-melec? Kinuna kenkuana ni Jehova: “Agsipud ta nagtalekka kaniak.” (Jeremias 39:16-18) Ammo ni Jehova a nagtignay ni Ebed-melec saan laeng a gapu ta maseknan ken Jeremias no di ket gapu iti panagtalek ken pammatina iti Dios.

Nalawag ti punto a maadaltayo: Apresiaren ni Jehova ti maar-aramidantayo a panagserbi kenkuana. Ipasigurado ti Biblia a laglagipen ti Dios uray ti kabassitan a maaramidantayo a panagdayaw gapu iti pammatitayo Kenkuana. (Marcos 12:41-44) Matignayka kadi nga umasideg iti kasta a manangapresiar a Dios? No wen, mainanamam a tungpalenna ti karina kas “Mananggunggona kadagidiay sipapasnek a mangsapsapul kenkuana.”​—Hebreo 11:6.

Singasing a Basaen iti Biblia iti Mayo:

◼ Jeremias 32-50

[Footnote]