“No Kabaelan ni Kingsley, Kabaelak Met!”
IDI tinapikda ti abagana, inrugin ni Kingsley ti panagbasana iti Biblia. Dayta ti kaunaan a pasetna iti Teokratiko nga Eskuelaan ti Panagministro iti kongregasionda. Sinaysayaatna nga imbalikas dagiti sasao nga awan a pulos ti nalabsanna. Ngem saanna a kitkitaen ti Bibliana! Apay?
Bulsek ngamin ni Kingsley a taga-Sri Lanka. Naka-wheelchair ken adda pay tultulengna. Kasano a naam-ammona ni Jehova ken nakapagpasalista iti Teokratiko nga Eskuelaan ti Panagministro? Palubosandak a mangestoria.
Idi naam-ammok ni Kingsley, nasdaawak iti interesna iti kinapudno nga isursuro ti Biblia. Siguden a nakipagadal iti sumagmamano a Saksi. Daan payen ti Braille a kopiana iti libro a Pannakaammo a Mangiturong iti Biag nga Agnanayon. * Immanamong a makipagadal manen kaniak iti Biblia. Ngem adda dua a problemami.
Umuna, agnanaed ni Kingsley ken ti dadduma iti pagtaengan dagiti lallakay, babbaket, ken dagiti addaan iti pisikal a depekto. Natagari ti aglawlaw ken adda tultuleng ni Kingsley isu a masapul a pigsaak ti agsao. Kinapudnona, mangngeg ti amin nga adda iti dayta a pagtaengan ti linawas a panagadalmi!
Maikadua, bassit laeng a baro nga impormasion ti kabaelan ni Kingsley a basaen ken tarusan iti tunggal panagadalmi. Tapno naballigi dayta, agsagana a naimbag ni Kingsley. Nasaksakbay nga ulit-ulitenna a basaen ti adalenmi, birokenna dagiti teksto iti Braille a Bibliana, sa panunotenna a naimbag ti sungbat dagiti saludsod. Epektibo unay dayta! Bayat ti panagadalmi, agdalupisak iti ap-ap a lupot sa maragragsakan bayat a sipipigsa nga ibagbagana ti naadalna. Idi agangay, maminduan nga agadalkami iti kada lawas nga agpaut iti dua nga oras!
PANNAKIGIMONG KEN PANAGPASET
Magagaran ni Kingsley a makigimong iti Kingdom Hall, ngem saan a nalaka dayta. Masapul nga adda mangbagkat kenkuana a mangipan iti wheelchair, iti lugan, ken iti Kingdom Hall. Ngem adu a kakabsat iti kongregasion ti nagsisinnublat a timmulong kenkuana, ket imbilangda pay dayta a pribilehio. Kabayatan ti gimong, ipaabay ni Kingsley ti speaker iti lapayagna, dumngeg a naimbag ken agkomento pay!
Kalpasan ti sumagmamano a tiempo a panagadalna, nagpasalistan ni Kingsley iti Teokratiko nga Eskuelaan ti Panagministro. Dua a lawas sakbay ti panagpasetna, dinamagko no agen-ensayo met laeng. Sikokompiansa nga imbagana, “Wen! Namin-30 a nagensayoak.” Kinomendarak ti reggetna ken kiniddawko a denggen ti panagbasana. Inukradna ti Bibliana, inarikapna dagiti letra, sa inruginan ti agbasa. Ngem nadlawko a saan nga umak-akar dagiti ramayna a kas iti sigud nga ar-aramidenna. Inkabesana gayam ti intero a paset a basaenna!
Uray la nakaluaak iti siddaawko! Dinamagko no kasano a naikabesana ti pasetna nupay 30 a daras laeng a nagensayo. Insungbatna: “Saan, nagensayoak iti 30 a daras iti kada aldaw.” Iti nasurok a makabulan, inulit-ulit ni Kingsley a binasa dagiti teksto, bayat a nakadalupisak iti ap-ap a lupot, agingga a naikabesana.
Dimteng ti aldaw a panagpasetna iti Kingdom Hall. Idi nalpas ni Kingsley ti pasetna, nagpalakpak iti napigsa dagiti kakabsat, ken adu ti nakalua iti kinapasnekna. Maysa a kabsat a babai a nagsardeng nga agpaset gapu ta agnerbios ti nagpasalista manen. Apay? Kinunana, “No kabaelan ni Kingsley, kabaelak met!”
Idi Septiembre 6, 2008, kalpasan ti tallo a tawen a panagadalna, nagbautisar ni Kingsley kas simbolo ti dedikasionna ken Jehova. Matalek a nagserbi agingga iti ipapatayna idi Mayo 13, 2014. Mangnamnama ni Kingsley nga iti Paraiso a daga, napigsa ken nasalun-atton a mangituloy iti matalek a panagserbina. (Isa. 35:5, 6)—Kas insalaysay ni Paul McManus.
^ par. 4 Naipablaak idi 1995 ngem saanen a mayim-imprenta.