Manipud Kadagiti Agbasbasa

Kinaliday Natignayak nga agsurat kadakayo kalpasan a nabasak ti serye nga “Agsolsolo Ngem Saan a Naliday.” (Hunio 8, 2004) Saanak nga interesado idi damo a nakitak daytoy a serye. Ngem idi rinugiak a basaen, naamirisko nga adda ugalik a mangilimed iti riknak. Dagiti singasing a naipaay ti apag-isu a kasapulak.

A. V., Estados Unidos

Masansan a kellaat a sumro ti sakitko ken agsagsagabaak iti depression. Masansan a matmaturogak gapu kadagiti epekto ti agas. Isu a masansan a mariknak nga agmaymaysaak ken naliday. Talaga a tinulongandak dagitoy nga artikulo a makaawat a nupay nalidaytayo, saantayo nga agmaymaysa!

J. C., Estados Unidos

Agtawenak iti 14, ket adda idi tiempo a kayatko a magustuandak dagiti kaklasek. Impagarupko no gagayyemko ida. Nupay kasta, idi nakitada a naidumaak gapu ta maysaak a Kristiano, naammuak a didan kayat ti makikadua kaniak no diak agbalbaliw ken tuladen ida. Naamirisko itan a dagiti pudno a gagayyem​—natataengan ken agtutubo​—ket mabalin a masarakan iti kongregasion Kristiano.

N. C., Espania

Nakatulong kaniak daytoy a serye tapno maawatak no apay a negatiboak unay idi nagbiahe ni lakayko gapu iti negosio ken sisiak ti nabati. Nakatulong kaniak ti pammagbagayo a matmatak ti kinaliday kas gagangay a kapadasan, ken makisaritaak iti maysa a nataengan a gayyem.

J. H., Czech Republic

Asidegen nga umakarak iti lugar nga agkasapulan kadagiti ebanghelisador. Maragsakan ni nanangko, ngem malday no dadduma. Idi pampanunotek no ania ti aramidek, dimteng dagitoy nga artikulo. Panggepko itan a regular a makikomunikarak ken ni nanangko tapno mairanudko dagiti rag-ok iti ministerio.

N. K., Japan

Torre ti London Dimteng iti umiso a tiempo ti artikulo a “Ti Torre ti London​—Historiko a Monumento ti Nariribuk a Napalabas.” (Hunio 8, 2004) Kasangsangpet ti maestrak ken ti dadduma a kaeskuelaak manipud iti panagpasiarda idiay London. Gapu iti daytoy nga artikulo, nailadawan iti panunotko no ania ti makita iti panagpasiar idiay London​—nga awan a pulos ti nagastok!

P. L., Alemania

Panagdukot Nabiit pay a napaksuyanak gapu iti panagdukot. Kimmaro ti kasasaadko ta impagarupko a gapu daytoy iti kurang a pammati. Agyamanak unay idi nakitak ti artikulo a “Ti Panangmatmat ti Biblia: Pakakitaan Aya a Kurang ti Pammatim no Madukotanka?” (Hunio 8, 2004) Kanayon nga ipapaayannak ni Jehova iti pammaregta no madanaganak.

Y. I., Japan

Demograpia Iti artikulo a “Demograpia, ti Biblia, ken ti Masanguanan,” imbagayo a ti Israel pinanawanna ti Egipto kalpasan ti 215 a tawen. (Mayo 8, 2004) Ngem kuna ti Exodo 12:40, 41 nga 430 a tawen dayta.

R. C., Estados Unidos

Sungbat ti “Agriingkayo!”: Kuna ti Exodo 12:40: “Ti panagnaed ti annak ti Israel, a nagnaed idiay Egipto, uppat a gasut ket tallopulo a tawen.” Paliiwenyo a “ti panagnaed ti annak ti Israel” ket saan a limitado iti tiempo a binusbos dagiti Judio idiay Egipto; imbes ketdi, nabatad a saklawenna ti intero a tiempo a nangrugi idi simrek ni Abraham iti daga ti Canaan. Impakita ni apostol Pablo a daytoy 430 a tawen ket nangrugi idi napasingkedan ti Abrahamiko a tulag. (Galacia 3:16, 17) Napasamak dayta idi simrek ni Abraham iti Canaan idi 1943 K.K.P. Ipasimudaag ti kronolohia ti Biblia a dayta ket 215 a tawen sakbay nga immakar dagiti Judio idiay Egipto. Aktual ngarud a 215 a tawen a ‘nagnaed dagiti Judio idiay Egipto.’​—Kitaenyo ti artikulo a “Chronology,” iti Tomo 1 ti “Insight on the Scriptures,” nga impablaak dagiti Saksi ni Jehova.