[Ni Jehova ket Supapak; wenno, Sakripisio a Pakikaykaysa ken Jehova].

  1. Maysa a Levita nga agay-aywan iti ruangan a napili babaen ti binnunot ken naituding nga agbantay iti makindaya a paset ti santuario bayat ti panagturay ni David.​—1Cr 26:14; kitaenyo ti MESELEMIAS.

  2. Apong ni Jehudi a maysa nga opisial ni Jehoiaquim; anak ni Cusi.​—Jer 36:14.

  3. Ama ni Jehucal (Jucal) a mensahero ni Zedekias.​—Jer 37:3; 38:1.

  4. Ama ni Irias, ti opisial nga agay-aywan iti Ruangan ti Benjamin ti Jerusalem; anak ni Hananias.​—Jer 37:13.

  5. Maysa kadagiti mensahero ni Ari Jehoiaquim nga imbaonna a mangidatag kada Jeremias ken Baruc; anak ni Abdeel.​—Jer 36:26.

6,     7. Dua a lallaki a nailista a karaman iti annak wenno kapkaputotan ni Binui nga, idi nagsubli ni Esdras idiay Jerusalem idi 468 K.K.P., pinagtalawda ti ganggannaet nga assawada.​—Esd 10:38, 39, 41, 44.

  8. Ama ni Hananias a timmulong a nangtarimaan iti pader ti Jerusalem.​—Ne 3:30.

   9. Maysa a padi ken karaman kadagidiay nangitalkan ni Nehemias (bayat ti maikadua nga isasarungkarna iti Jerusalem) kadagiti pagipempenan ken iti panangibunong kadagiti apagkapullo kadagidiay maiparbeng nga umawat kadagita.​—Ne 13:6, 7, 12, 13.