Jeremias 37:1-21
37 Ket pinagari ni Ari Nabucodonosor* ti Babilonia ni Ari Zedekias+ nga anak ni Josias iti daga ti Juda.+ Sinukatanna ni Conias*+ nga anak ni Jehoiakim.
2 Ngem saan nga impangag ni Zedekias ken dagiti adipenna ken dagiti umili iti daga ti imbaga ni Jehova babaen ken propeta Jeremias.
3 Imbaon ni Ari Zedekias da Jehucal+ nga anak ni Selemias ken ni Sofonias+ nga anak ni Maasias a padi a mapan ken propeta Jeremias tapno ibagada: “Pangngaasim ta ikararagannakami ken Jehova a Diostayo.”
4 Nawaya pay la idi ni Jeremias a makipulapol kadagiti umili ta saanda pay nga imbalud.+
5 Iti dayta a tiempo, palpalawlawan dagiti Caldeo ti Jerusalem+ ngem immatrasda idi nadamagda nga um-umayen ti armada ni Faraon manipud Egipto.+
6 Ket kinuna ni Jehova ken propeta Jeremias:
7 “Daytoy ti kuna ni Jehova a Dios ti Israel, ‘Daytoy ti masapul nga ibagayo iti ari ti Juda, a nangibaon kadakayo nga agsaludsod kaniak: “Kitaenyo! Ti armada ni Faraon nga um-umay tumulong kadakayo ket masapul nga agsublinto iti pagilianna nga Egipto.+
8 Ket agsublinto dagiti Caldeo ket gubatenda daytoy a siudad sada sakupen ken puoran.”+
9 Daytoy ti imbaga ni Jehova, “Diyo allilawen ti bagiyo,* a kunayo, ‘Sigurado a saandatayo a sakupen dagiti Caldeo,’ ta saandanto a pumanaw.
10 Uray no maabakyo ti intero nga armada dagiti Caldeo a makilablaban kadakayo ken dagiti laengen nasugatan a tattaoda ti nabati, rummuardanto latta manipud kadagiti toldada ket puoranda daytoy a siudad.”’”+
11 Idi immatras ti armada dagiti Caldeo manipud iti Jerusalem gapu iti armada ni Faraon,+
12 inkagumaan ni Jeremias ti pimmanaw idiay Jerusalem ket napan iti daga ti Benjamin+ tapno alaenna kadagiti kailianna ti bingayna sadiay.
13 Ngem idi nakadanon ni propeta Jeremias iti Ruangan ti Benjamin, isu ket tiniliw ti hepe dagiti guardia nga agnagan iti Irias nga anak ni Selemias nga anak ni Hananias sana imbaga: “Kumapkapponka kadagiti Caldeo!”
14 Ngem kinuna ni Jeremias: “Saan nga agpayso dayta! Saanak a kumapkappon kadagiti Caldeo.” Ngem saan nga impangag ni Irias isu a tiniliwna ni Jeremias ket impanna kadagiti prinsipe.
15 Nakapungtot dagiti prinsipe ken Jeremias,+ ket kinabkabilda ken imbaludda*+ iti balay ni Jehonatan a sekretario, a naaramid a pagbaludan.
16 Inkabilda ni Jeremias iti maysa kadagiti bartolina* ket nagtalinaed sadiay iti adu nga aldaw.
17 Kalpasanna, pinaayaban ni Ari Zedekias, ket idi addan iti balay* ti ari, insekreto ti ari+ nga insaludsod kenkuana: “Adda kadi mensahe ni Jehova?” Insungbat ni Jeremias: “Adda!” sana innayon: “Mayawatkanto iti ari ti Babilonia!”+
18 Imbaga pay ni Jeremias ken Ari Zedekias: “Ania aya ti basolko kenka ken kadagiti adipenmo ken kadagitoy a tattao ta impaibaludnak?
19 Ayanna ngay itan dagiti propetayo a nangipadto kadakayo, ‘Saanto nga umay ti ari ti Babilonia a manggubat kadakayo ken iti daytoy a lugar’?+
20 Ita, pangngaasim O apo ari ta ipangagnak. Pangngaasim ta ipangagmo ti panagpakaasik. Dinak pagsublien iti balay ti sekretario a ni Jehonatan,+ tapno saanak a matay sadiay.”+
21 Isu nga imbilin ni Ari Zedekias a maibalud ni Jeremias idiay Paraangan ti Guardia,+ ket inaldaw a naikkan iti nagtimbukel a tinapay manipud iti kalsada dagiti panadero,+ agingga a naibus ti amin a tinapay iti siudad.+ Ket nagtalinaed ni Jeremias iti Paraangan ti Guardia.
Footnotes
^ Lit., “Nabucodorosor,” sabali pay nga ispelingna.
^ Naawagan met iti Jehoiakin ken Jeconias.
^ Wenno “kararuayo.”
^ Lit., “inkabilda iti balay dagiti grilios.”
^ Lit., “balay nga addaan iti pagurnongan iti danum ken kadagiti immarko a siled.”
^ Wenno “palasio.”
