[manipud Babiloniko a pagsasao, kaipapananna ti “Dakkel (a Kanal)”].

 Maysa a “karayan” iti “daga dagiti Caldeo” nga iti asideg dayta a naidestiero dagiti Judio nga agnanaed iti Tel-abib. (Eze 1:1-3; 3:15) Idi dinakamatna ti “karayan Kebar,” inusar ni Ezequiel ti Hebreo a termino a na·harʹ (naipatarus a “karayan”) nalabit iti kalawaan a kaipapanan dayta, iti kasta ramanenna ti adu a  kanal ti Babilonia a sigud a limmasat iti nadam-eg a lugar nga adda iti nagbaetan dagiti makimbaba a pagayusan dagiti karayan Eufrates ken Tigris. Daytoy a pannakausar ket maitunos iti katupag a Babiloniko a sao a mangdeskribir met iti maysa a karayan wenno kanal. Saan nga ammo ti eksakto nga ayan ti Kebar.

 Nupay kasta, ti kaaduan a geograpo ti Biblia inaigda ti “karayan Kebar” iti Shatt en-Nil, a naikuna nga isu ti naru Kabaru (wenno “Naindaklan a Kanal”) a nadakamat iti cuneiform a katulagan a taptapi a nasarakan iti siudad ti Nippur, agarup 85 km (50 mi) iti abagatan a daya ti Babilonia. Ti Shatt en-Nil ket sumina manipud iti Eufrates iti ngatuen ti Babilonia ken agayus iti abagatan a daya, a lumasat iti asideg ti Nippur, tapno tumipon manen iti Eufrates iti abagatan ti Ur, agarup 240 km (150 mi) iti baba ti Babilonia.

 Idi 613 K.K.P., idiay Tel-abib, iti asideg ti karayan Kebar, napasamak ti kaunaan a nairekord a sirmata ni mammadto Ezequiel, a gapu iti dayta naikuleng iti pito nga aldaw. Sadiay met a naparebbengan kas “managwanawan iti balay ti Israel.” (Eze 1:1–3:21) Kadagiti naud-udi nga umasping a sirmata ti mammadto, nalagipna ti kapadasanna idiay Kebar.​—Eze 10:15, 20, 22; 43:3.