Kadakayo a Nagannak

Ania ti kasayaatan a maitedyo kadagiti annakyo? Adu ti kasapulanda, a pakairamanan ti ayat, panangiwanwan, ken proteksion. Ngem ti kapatgan a maitedyo kadakuada ket ti pannakaammo maipapan ken Jehova ken dagiti kinapudno a masarakan iti Saona, ti Biblia. (Juan 17:3) Makatulong dayta a pannakaammo tapno ayatenda ni Jehova bayat a dumakdakkelda ken agserbida kenkuana a naimpusuan, uray ubbingda pay.​—Mateo 21:16.

Napaneknekan ti adu a nagannak a nalaklaka a makasursuro dagiti ubbing kadagiti ababa a leksion ken aktibidad. Gapuna, maragsakankami a mangipaay iti daytoy a publikasion, Dagiti Masursurok iti Biblia. Nadisenio ti tunggal leksion a mangisuro iti simple a pamay-an. Naisagana dagiti ladawan ken sasao a nangnangruna para kadagiti agtawen iti tallo wenno nababbaba. Adda met dagiti aktibidad a maaramid. Ti broshur a Dagiti Masursurok iti Biblia ket saan nga ay-ayam dagiti ubbing. Nairanta daytoy nga ibasayo kadagiti annakyo tapno rumayray ti komunikasionyo.

Mangnamnamakami a makatulong daytoy a publikasion bayat nga isuroyo dagiti kinapudno iti Biblia kadagiti annakyo “manipud kinamaladaga.”​—2 Timoteo 3:14, 15.

Dagiti kakabsatyo,

Bagi a Manarawidwid Dagiti Saksi ni Jehova

[Ladawan iti panid 3]