Oseas 8:1-14
8 “Ita ngiwatmo—maysa a tangguyob!+ Ti maysa umay a kas iti agila+ maibusor iti balay ni Jehova, iti rason a sinalungasingda ti tulagko,+ ket nagsalungasingda a maikaniwas iti lintegko.+
2 Iyik-ikkisda kaniak, ‘O Diosko, dakami, ti Israel, naam-ammodaka.’+
3 “Ti Israel inwaksina ti naimbag.+ Isu kamaten koma daydiay kabusor.+
4 Isuda nangisaadda iti ar-ari,+ ngem saan a gapu kaniak. Nangisaadda kadagiti prinsipe, ngem saanko a naammuan dayta. Babaen kadagiti pirakda ken balitokda inyaramidanda ti bagbagida kadagiti idolo,+ tapno pakagessatanda.+
5 Ti kigaw a bakam naiwaksin,+ O Samaria. Ti ungetko bimmara a maibusor kadakuada.+ Kasanonto kabayag a saanda a kabaelan ti di agbasol?+
6 Ta daytoy met laeng ket naggapu iti Israel.+ Maysa laeng a nasigo a trabahador ti nangaramid iti dayta,+ ket saan a ti Dios; agsipud ta ti kigaw a baka ti Samaria agbalinto a rudrud-ak laeng.+
7 “Ta angin ti imulmulada, ket bagyo nga angin ti apitendanto.+ Awan aniaman nga addaan kadagiti nakatakder a binukel.+ Awan tarubong a mangpataud iti arina.+ No nalabit adda aniaman a mangpataud iti dayta, alun-onento a mismo dagiti ganggannaet.+
8 “Ti Israel masapul a maalun-on.+ Ita masapul a maaddada iti tengnga dagiti nasion,+ kas iti basehas a saan a pakaragsakan.+
9 Ta isuda simmang-atda idiay Asiria,+ kas iti sebra a naiputputong nga agmaymaysa.+ Iti kaso ti Efraim, nangtangdanda kadagiti kaayan-ayat.+
10 Kasta met, nupay itultuloyda a tangdanan ida kadagiti nasion,+ ummongek ida itan a sangsangkamaysa; ket iti apagbiit a kanito agrigatdanto iti nakaro+ gapu iti dadagsen ti ari ken piprinsipe.
11 “Ta ti Efraim nangpaadu kadagiti altar tapno agbasol.+ Naaddaan kadagiti altar tapno agbasol.+
12 Nangisuratak maipaay kenkuana iti adu a banag ti lintegko;+ naibilangda a kas iti banag a karkarna.+
13 Kas dagiti sakripisio a sagutko nagisaksakripisioda iti lasag,+ ket nangnanganda iti saan a nagragsakan ni Jehova a mismo.+ Ita lagipennanto ti biddutda ket makikuenta gapu kadagiti basolda.+ Isuda nagsublida idiay Egipto.+
14 Ket rinugian a linipat ti Israel ti Nangaramid kenkuana+ ket nangbangon kadagiti templo;+ ket ti Juda, iti biangna, nangpaadu kadagiti nasarikedkedan a siudad.+ Ket sigurado a mangibaonakto iti apuy kadagiti siudadna ket alun-onennanto dagiti pagnaedan a torre ti tunggal maysa.”+
