Oseas 13:1-16
13 “Idi nagsao ti Efraim, adda panagpigerger; isu mabigbigbig iti Israel.+ Ngem nakabasol maipapan ken Baal+ ket natay.+
2 Ket ita agaramidda iti kanayonan a basol ket iyaramidanda ti bagbagida iti sinukog nga estatua manipud iti pirakda,+ dagiti idolo sigun iti bukodda a pannakaawat,+ ti aramid dagiti nasigo a trabahador, isuamin dayta.+ Kunkunaenda kadakuada, ‘Dagiti agisaksakripisio a tattao agepanda koma dagiti kigaw a baka laeng.’+
3 Gapuna agbalindanto a kas kadagiti ulep iti bigat+ ken kas iti linnaaw a masapa nga agpukaw; kas taep nga ipalais ti bagyo manipud iti pagirikan+ ken kas asuk manipud iti abut ti atep.
4 “Ngem siak ni Jehova a Diosmo manipud iti daga ti Egipto,+ ket awan ti Dios malaksid kaniak nga am-ammom idi; ket awan ti manangisalakan no di siak.+
5 Siak naam-ammoka idiay let-ang,+ idiay daga dagiti gurigor.+
6 Maitunos iti pagpaarabanda napnekda met.+ Napnekda ket ti pusoda nangrugi a tuman-ok.+ Dayta ti makagapu a linipatdak.+
7 Ket agbalinakto kadakuada a kas iti urbon a leon.+ Kas iti leopardo iti dalan agtultuloyakto nga agsapul.+
8 Sabtekto ida a kas iti oso a napukawna dagiti urbonna,+ ket pisangekto ti alug-og ti pusoda. Ket alun-onekto ida sadiay a kas iti leon;+ rangrangkayento ida a mismo ti maysa nga atap nga animal iti tay-ak.+
9 Sigurado a dadaelennakanto,+ O Israel, agsipud ta maibusor kaniak dayta, maibusor iti katulongam.+
10 “Sadino, ngarud, ti ayan ti arim, tapno maisalakannaka kadagiti amin a siudadmo,+ ken dagiti ukommo, a maipapan kadakuada kinunam, ‘Ikkannak iti ari ken piprinsipe’?+
11 Iti ungetko inikkanka iti ari,+ ket iti rungsotko isu ikkatekto.+
12 “Ti biddut ti Efraim nabungon, ti basolna naidulin.+
13 Dumtengto kenkuana dagiti ut-ot ti panagpasikal ti babai nga agpaspasngay.+ Isu ket anak a di masirib,+ ta inton panawenen saanto nga agintek iti iruruar ti annak manipud aanakan.+
14 “Subbotekto ida iti ima ti Sheol;+ alangonekto ida ken patay.+ Sadino ti ayan dagiti panniludmo, O Patay?+ Sadino ti ayan ti kinamanangdadaelmo, O Sheol?+ Ti met laeng panangngaasi mailingedto manipud kadagiti matak.+
15 “No kas pagarigan isu kas anak ti mulmula a runo mangipakita iti kinamanagbunga,+ ti wayaway nga angin, ti angin ni Jehova, umayto.+ Umay dayta manipud iti let-ang, ket pagmagaennanto ti bubonna ken paatiananna ti ubbogna.+ Kamkamento dayta ti gameng dagiti amin a matarigagayan nga aruaten.+
16 “Ti Samaria maibilangto a nakabasol,+ ta pudno nga isu rebelioso iti Diosna.+ Mapasagdanto babaen iti kampilan.+ Malasanglasangto dagiti bukodda nga annak,+ ket mapirsapirsayto dagiti mismo a masikog a babbaida.”+
