Hebreo 11:1-40
11 Ti pammati+ isu ti sigurado a panangsegsegga iti bambanag nga in-inanamaen,+ ti nabatad a parangarang dagiti kinapudno nupay saan a makita.+
2 Ta babaen itoy dagiti tattao kadagidi un-unana a tiempo naipaayanda iti panangsaksi.+
3 Babaen iti pammati matarusantayo a dagiti sistema ti bambanag+ nayurnos babaen ti sao ti Dios,+ tapno ti makita napaadda manipud iti bambanag a saan nga agparang.+
4 Babaen iti pammati indaton ni Abel iti Dios ti maysa a sakripisio a dakdakkel ti pategna ngem ni Cain,+ a babaen iti dayta a pammati naipaayan iti panangsaksi nga isu nalinteg, a ti Dios ti nangsaksi+ maipapan kadagiti sagutna; ket babaen iti dayta isu, nupay natay, agsasao pay laeng.+
5 Babaen iti pammati nayalis ni Enoc+ tapno saanna a makita ni patay, ket saan a nasarakan iti sadinoman agsipud ta isu inyalis ti Dios;+ ta sakbay ti pannakayalisna isu addaan iti pangsaksi a naay-ayona a naan-anay ti Dios.+
6 Mainayon pay, no awan ti pammati+ isu di mabalin nga ay-aywen a naan-anay,+ ta ti umadani iti Dios masapul a patienna nga isu adda+ ken isu agbalin a mananggunggona+ kadagidiay sipapasnek a mangsapsapul kenkuana.+
7 Babaen iti pammati, kalpasan a naipaayan iti nadibinuan a pakdaar maipapan iti bambanag a saan pay a nakita,+ nangipakita ni Noe+ iti nadiosan a buteng ket nangibangon iti daong+ a pakaisalakanan ti sangakabbalayanna; ket babaen itoy a pammati kinondenarna ti lubong,+ ket isu nagbalin nga agtawid iti kinalinteg+ a maitunos iti pammati.
8 Babaen iti pammati nagtulnog ni Abraham,+ idi naayaban, a mapan iti disso a naikeddeng nga awatenna kas tawid; ket napan, nupay saanna nga ammo no sadino ti pagturonganna.+
9 Babaen iti pammati isu nagnaed kas ganggannaet iti daga ti kari a kas iti sabali a daga,+ ket nagnaed kadagiti tolda+ a kaduana da Isaac+ ken Jacob,+ dagiti makipagtawid kenkuana iti daydi met laeng a kari.+
10 Ta inur-urayna ti siudad+ nga addaan kadagiti pudpudno a pamuon, a ti nangibangon ken nangaramid iti dayta a siudad isu ti Dios.+
11 Babaen met iti pammati inawat a mismo ni Sara+ ti pannakabalin a mangyinaw iti bin-i, uray pay idi nalabsannan ti pagpatinggaan a tawen,+ yantangay imbilangna a matalek daydiay a nagkari.+
12 Gapuna met manipud iti maysa a tao,+ ken arigna natayen,+ adda nayanak nga annak a kas kadagiti bituen ti langit ti kaaduda ken kas kadagiti darat nga adda iti igid ti baybay, di mabilang.+
13 Iti pammati natay amin dagitoy,+ nupay saanda a nagun-odan ti kaitungpalan dagiti kari,+ ngem nakitada ida iti adayo+ ket inabrasada ida ken silalatak nga indeklarada a ganggannaetda ken temporarioda nga agnanaed iti daga.+
14 Ta dagidiay agkuna iti kakasta a bambanag mangipapaayda iti pammaneknek a sipapasnek a sapsapulenda ti bukodda a lugar.+
15 Ket kaskasdi, no pudno a linaglagipda koma dayta a lugar a naggapuanda,+ addaanda koma iti gundaway nga agsubli.+
16 Ngem ita ragragpatenda ti nasaysayaat a lugar, kayatna a sawen, maysa a kukua ti langit.+ Gapuna saan nga ibain ida ti Dios, nga isu awaganda kas Diosda,+ ta nangisagana iti siudad+ a maipaay kadakuada.
17 Babaen iti pammati, idi isu nasubok,+ ni Abraham kaslanan indaton ni Isaac, ket ti tao a siraragsak nga immawat kadagiti kari ginandatna nga idaton ti bugbugtong nga anakna,+
18 nupay naikuna kenkuana: “Ti maawaganto a ‘bin-im’ ket babaento ken Isaac.”+
19 Ngem pinanunotna nga isu kabaelan ti Dios nga ibangon uray pay manipud kadagiti natay;+ ket manipud sadiay isu inawatna met iti mangiladawan a pamay-an.+
20 Babaen met iti pammati binendisionan ni Isaac da Jacob+ ken Esau+ maipapan iti bambanag nga umay.
21 Babaen iti pammati, ni Jacob, idi ngannganin matay,+ binendisionanna ti tunggal maysa iti annak ni Jose+ ket nagdaydayaw a sisasadag iti murdong ti sarukodna.+
22 Babaen iti pammati dinakamat ni Jose, idi umadanin ti panungpalanna, ti ipapanaw+ ti annak ti Israel; ket nangted iti bilin maipapan kadagiti tulangna.+
23 Babaen iti pammati nailemmeng ni Moises iti las-ud ti tallo a bulan babaen kadagiti nagannakna kalpasan ti pannakayanakna,+ agsipud ta nakitada a nalibnos ti ubing+ ket saanda a nagbuteng iti bilin+ ti ari.
24 Babaen iti pammati nagkitakit ni Moises, idi dimmakkelen,+ a maawagan ti anak daydi anak a babai ni Faraon,+
25 a pinilina ti dakes a pannakatrato a kadua ti ili ti Dios imbes a maaddaan iti temporario a panangtagiragsak iti basol,
26 agsipud ta imbilangna ti pannakaumsi+ ti Kristo kas kinabaknang a dakdakkel ngem kadagiti gameng ti Egipto; ta kimmita a sipapasnek iti pannakabayad ti gunggona.+
27 Babaen iti pammati pinanawanna ti Egipto,+ ngem saan a nagbuteng iti unget ti ari,+ ta isu nagtalinaed a natibker a kasla kitkitaenna daydiay Maysa a di makita.+
28 Babaen iti pammati rinambakanna ti paskua+ ken ti pannakaiwarsi ti dara,+ tapno ti manangdadael saanna a sagiden dagiti inaunada.+
29 Babaen iti pammati limmasatda iti Nalabaga a Baybay a kas iti namaga a daga,+ ngem iti sidudursok nga ilalasatda koma iti dayta dagiti Egipcio ket naalimon.+
30 Babaen iti pammati narpuog dagiti pader ti Jerico kalpasan ti pannakalawlawda iti pito nga aldaw.+
31 Babaen iti pammati saan a napukaw ni Rahab+ a balangkantis a nairaman kadagidiay nagtignay a sisusukir, agsipud ta inawatna a sikakappia dagiti managsimisim.+
32 Ket ania pay ti sawek? Ta agkurangakto iti tiempo no itultuloyko a salaysayen ti maipapan kada Gideon,+ Barak,+ Samson,+ Jefte,+ David+ kasta met ni Samuel+ ken ti sabsabali pay a mammadto,+
33 isuda a babaen iti pammati inabakda dagiti pagarian iti panaglalaban,+ nagipakatda iti kinalinteg,+ nakagun-odda kadagiti kari,+ inapputda ti ngiwngiwat dagiti leon,+
34 dinepdepda ti puersa ti apuy,+ nalisianda ti tadem ti kampilan,+ manipud iti nakapuy a kasasaad napabilegda,+ nagbalinda a maingel iti gubat,+ pinagtarayda ti buybuyot dagiti ganggannaet.+
35 Dagiti babbai inawatda dagiti minatayda babaen ti panagungar;+ ngem naparparigat ti dadduma a tattao gapu ta saanda nga awaten ti pannakaluk-at babaen iti aniaman a subbot, tapno maragpatda ti nasaysayaat a panagungar.
36 Wen, ti sabsabali inawatda ti suotda babaen ti pannakarabrabak ken ti pannakasapsaplit, kinapudnona, ad-adda pay ngem iti dayta, babaen ti pannakaparparaut+ ken pannakaibalbalud.+
37 Nauborda,+ nasuotda,+ naragaragadida, natayda+ babaen ti pannakagudas iti kampilan, nagpagnapagnada a sikakawes kadagiti lalat ti karnero,+ kadagiti lalat ti kalding, bayat nga addada iti kinakirang,+ iti rigat,+ iti sidong ti dakes a pannakatrato;+
38 ket ti lubong saan idi a maikari kadakuada. Nagallaallada kadagiti desierto ken bambantay ken kadagiti rukib+ ken kadagiti gukayab ti daga.
39 Ket kaskasdi nga amin dagitoy, nupay adda panangsaksi a naited kadakuada babaen ti pammatida, saanda a nagun-odan ti kaitungpalan ti kari,+
40 yantangay ti Dios nakitana a nasaksakbay ti maysa a banag a nasaysayaat+ maipaay kadatayo,+ tapno saanda+ koma a mapagbalin a naan-anay+ a naisina kadatayo.+
