Hebreo 6:1-20
6 Gapu itoy a rason, ita ta binaybay-antayon ti pagdamdamuan+ a doktrina maipapan iti Kristo,+ agreggettayo koma a rumang-ay iti kinanataengan,+ saan a mangisasaad manen iti pamuon,+ kayatna a sawen, ti panagbabawi kadagiti natay nga aramid,+ ken pammati iti Dios,+
2 ti sursuro maipapan kadagiti pammautisar+ ken ti panangipatay kadagiti ima,+ ti panagungar dagiti natay+ ken agnanayon a pannakaukom.+
3 Ket daytoy ti aramidenminto, no pudno nga ipalubos ti Dios.+
4 Ta di mabalin no maipapan kadagidiay namimpinsanen a nalawagan,+ ken nakaramanen iti nailangitan a sagut nga awan bayadna,+ ken nagbalin a makiramraman iti nasantuan nga espiritu,+
5 ken nakaramanen+ iti nasayaat a sao ti Dios ken kadagiti pannakabalin ti um-umay a sistema ti bambanag,+
6 ngem natnagda,+ a pagsublien manen ida iti panagbabawi,+ agsipud ta ilansada manen ti Anak ti Dios a maipaay iti bagbagida ket isu iparangda iti pannakaibabain iti publiko.+
7 Kas pagarigan, ti daga a mangagsep iti tudo a masansan a dumteng iti dayta, ket kalpasanna mangpataud iti mulmula a maikanatad kadagidiay pakaipaayan ti pannakatalonna met,+ umawat iti bendision manipud iti Dios kas supapak.
8 Ngem no mangpataud kadagiti sisiitan ken kalkalunay, mailaksid dayta ket asideg iti pannakailunod;+ ket manungpal iti pannakaipuor.+
9 Nupay kasta, iti kasoyo, dungdungnguen, kombinsidokami iti nasaysayaat a bambanag ken bambanag a naibuyog iti pannakaisalakan, uray no kastoy ti panagsasaomi.
10 Ta saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna,+ ta nagserbikayo kadagiti sasanto+ ken agtultuloykayo nga agserbi.
11 Ngem tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro+ iti namnama+ agingga iti panungpalan,+
12 tapno saankayo nga agbalin a nabuntog,+ no di ket agbalin a tumutulad+ kadagidiay a babaen ti pammati ken kinaanus tawidenda dagiti kari.+
13 Ta idi a ti Dios nagkari ken Abraham,+ yantangay saanna a mabalin ti agsapata babaen iti asinoman a dakdakkel, isu nagsapata+ babaen iti bagina,
14 a kunkunana: “Maipasigurado nga iti pamendision bendisionankanto, ket iti panagadu paaduenkanto.”+
15 Ket iti kasta kalpasan a nangipakita ni Abraham iti kinaanus, nagun-odanna daytoy a kari.+
16 Ta agsapata dagiti tattao babaen iti maysa a dakdakkel,+ ket ti sapatada isu ti pagpatinggaan ti tunggal supiat, yantangay legal a pammatalged dayta kadakuada.+
17 Iti kastoy a pamay-an, idi pinanggepna nga iparangarang a nawadwadwad pay kadagiti agtawid+ iti kari ti di pannakabalbaliw+ ti pammatigmaanna, ti Dios bimmallaet buyogen iti sapata,
18 tapno, babaen iti dua a di mabalbaliwan a banag a di mabalin a pagulbodan ti Dios,+ datayo a nagtalaw nga agturong iti pagkamangan maaddaantayo koma iti nabileg a pammaregta a kumpet iti namnama+ a naikabil iti sanguanantayo.
19 Daytoy a namnama+ adda kadatayo kas maysa a sinipete maipaay iti kararua, agpadpada a sigurado ken natibker, ket sumrek iti uneg ti kortina,+
20 a sadiay ti simrekan ti manangyuna maigapu kadatayo,+ ni Jesus, a nagbalin a nangato a padi iti agnanayon maitunos iti kasasaad ni Melquisedec.+
