Eclesiastes 8:1-17
8 Siasino ti umasping iti daydiay masirib?+ Ken siasino ti makaammo iti kayulogan ti maysa a banag?+ Ti met laeng sirib ti maysa a tao pagsilnagenna ti rupana, ket uray ti kinarupanget ti rupana mabaliwan maipaay iti nasaysayaat.+
2 Kunaek: “Salimetmetam ti mismo a bilin ti ari,+ ket maipagapu dayta iti sapata iti Dios.+
3 Dika agdardaras, iti kasta rummuarka manipud sanguananna.+ Dika agtakder iti dakes a banag.+ Ta ti isuamin a pagragsakanna nga aramiden aramidennanto,+
4 agsipud ta ti sao ti ari isu ti pannakabalin a mangituray;+ ket siasino ti makaikuna kenkuana: ‘Ania ti ar-aramidem?’”
5 Ti mangsalsalimetmet iti bilin saannanto a maammuan ti aniaman a makadidigra a banag,+ ket ti masirib a puso maammuannanto agpadpada ti tiempo ken panangukom.+
6 Ta adda tiempo ken panangukom iti tunggal aramid a mismo,+ agsipud ta ti didigra ti sangatauan naruay kadakuada.+
7 Ta awan asinoman a makaammo no ania ti maaddanto,+ agsipud ta siasino ti makaibaga kenkuana no kasano a maaddanto dayta?
8 Awan ti tao nga addaan pannakabalin iti espiritu tapno pawilanna ti espiritu;+ awan uray aniaman a pannakabalin a mangituray iti aldaw ti ipapatay;+ awan met ti aniaman a pannakaikkat manipud iti gubat.+ Ket ti kinadangkes saannanto a mailisi dagidiay maigamgamer iti dayta.+
9 Ti isuamin daytoy nakitak, ket adda panangigaedko iti pusok iti tunggal aramid a naaramid iti baba ti init, bayat ti tiempo a ti tao dinominaranna ti tao iti pakadangrananna.+
10 Ngem, uray no kasta, nakitak dagidiay nadangkes a maitabtabon,+ no kasano a simrekda ken no kasano a pumanawda iti mismo a nasantuan a lugar+ ket malipatanda iti siudad a sadiay ti nagtignayanda iti kasta a wagas.+ Daytoy met ket kinaubbaw.
11 Agsipud ta ti sentensia a maibusor iti dakes nga aramid saan a naipakat a sipapardas,+ dayta ti makagapu a ti puso ti annak ti tattao naan-anay a naitampok kadakuada tapno aramidenda ti dakes.+
12 Nupay ti maysa a managbasol mabalin nga agar-aramid iti dakes+ iti maminggasut ket agtultuloy iti mabayag a tiempo kas iti pakaay-aywanna, kaskasdi nga ammok met a naimbagto ti pagbanagan dagidiay agbuteng iti pudno a Dios,+ agsipud ta nagbutengda kenkuana.+
13 Ngem saanto a pulos naimbag ti pagbanagan daydiay nadangkes,+ saannanto met a mapaatiddog dagiti aldawna a kasla anniniwan,+ agsipud ta saan nga agbuteng iti Dios.+
14 Adda kinaubbaw a maar-aramid iti daga, nga adda dagidiay nalinteg a pakapaspasamakan dayta a kasla maipaay iti aramid dagidiay nadangkes,+ ket adda dagidiay nadangkes a pakapaspasamakan dayta a kasla maipaay iti aramid dagidiay nalinteg.+ Kinunak a daytoy met ket kinaubbaw.
15 Ket siak pinadayawak ti panagrag-o,+ agsipud ta ti sangatauan awanan iti nasaysayaat iti baba ti init ngem iti pannangan ken iyiinum ken panagrag-o, ket kumuyog koma dayta kadakuada iti napinget a panagtrabahoda kadagiti aldaw ti biagda,+ nga inted ti pudno a Dios kadakuada iti baba ti init.+
16 Maitunos iti daytoy inggaedko ti pusok+ tapno maammuak ti sirib ken tapno makitak ti pakakumikoman a maar-aramid iti daga,+ agsipud ta adda maysa a saan a makakitkita iti turog kadagiti matana, uray iti aldaw wenno iti rabii.+
17 Ket nakitak ti isuamin nga aramid ti pudno a Dios,+ no kasano a ti sangatauan saanda a masarakan ti aramid a naaramid iti baba ti init;+ uray kasano kaadu ti panagtartrabaho a sipipinget ti sangatauan tapno agsapul, kaskasdi a saanda a masarakan.+ Ket uray no kunaenda nga umdasen ti siribda a mangammo,+ saandanto a masarakan dayta.+
