Eclesiastes 6:1-12
6 Adda didigra a nakitak iti baba ti init, ket masansan dayta iti sangatauan:
2 maysa a tao nga ipaayan ti pudno a Dios iti kinabaknang ken material a sansanikua ken dayag+ ken, agpaay iti kararuana, saan nga agkasapulan iti aniaman nga il-iliwenna,+ ket kaskasdi nga isu saan nga ipaayan ti pudno a Dios iti pannakabael a mangan manipud iti dayta,+ nupay makan dayta ti maysa a ganggannaet+ laeng. Daytoy ket kinaubbaw ken maysa a dakes a sakit.
3 No ti maysa a lalaki agbalin nga ama iti maminggasut,+ ket agbiag iti adu a tawen, iti kasta agbalin a nakaad-adu dagiti aldaw ti tawtawenna,+ kaskasdi ti bukodna a kararua saan a mapnek kadagiti naimbag a banag+ ket uray ti tanem saan a nagbalin a kukuana,+ makunak a ti maysa a nayanak a kurang ti aldawna nasaysayaat ngem isu.+
4 Ta iti kinaubbaw nga immay daytoy ket iti kinasipnget isu pumanaw, ket ti bukodna a nagan maabbonganto iti kinasipnget.+
5 Uray ti mismo nga init saanna a nakita, saanna met a naammuan.+ Daytoy ti addaan iti inana imbes a daydiay immun-una.+
6 Uray no ipapan nga isu nagbiagen iti sangaribu a tawen iti mamindua a daras ket kaskasdi a saanna a nakita ti naimbag,+ saan aya nga iti maymaysa laeng a lugar ti papanan ti isuamin?+
7 Ti isuamin a napinget a panagtrabaho ti sangatauan ket maipaay iti ngiwatda,+ ngem uray ti bukodda a kararua saan a mapno.
8 Ta ania ti adda a pagsayaatan ti masirib ngem iti daydiay maag?+ Ania ti adda iti daydiay naparigatan nga ammona no kasano ti magna iti sanguanan dagidiay sibibiag?
9 Nasaysayaat ti pannakakita babaen kadagiti mata ngem ti panagpagnapagna ti kararua.+ Daytoy met ket kinaubbaw ken panangkamkamat iti angin.+
10 Aniaman a naaddan, ti naganna naisawangen, ket naammuanen no ania ti tao;+ ket saanna a kabaelan nga irupir ti kalinteganna iti maysa a nabilbileg ngem isu.+
11 Agsipud ta adda adu a banag a mamatpataud iti adu a kinaubbaw,+ ania ti adda a pagsayaatan ti tao?
12 Ta siasino ti makaammo no ania a kinaimbag ti adda iti biag ti maysa a tao+ iti bilang dagiti aldaw ti ubbaw a biagna, inton busbosenna ida a kas anniniwan?+ Ta siasino ti makaibaga iti tao no ania ti mapasamakto kalpasan kenkuana iti baba ti init?+
