Eclesiastes 4:1-16
4 Ket siak nagsubliak tapno makitak amin dagiti aramid ti panangirurumen+ a maar-aramid iti baba ti init, ket, adtoy! ti lulua dagidiay mairurrurumen,+ ngem awananda ti manangliwliwa;+ ket iti dasig dagiti manangirurumenda adda idi pannakabalin, iti kasta awananda ti manangliwliwa.
2 Ket pinadayawak dagiti natay a natayen imbes a dagiti sibibiag a sibibiag pay laeng.+
3 Gapuna nasaysayaat ngem isuda a dua daydiay saan pay a naadda,+ a saan a nakakita iti aramid a makadidigra a maar-aramid iti baba ti init.+
4 Ket siak nakitak ti isuamin a napinget a panagtrabaho ken isuamin a kinalaing iti trabaho,+ a kaipapanan dayta ti pannakirinnisiris ti maysa iti sabali;+ daytoy met ket kinaubbaw ken panangkamkamat iti angin.
5 Daydiay maag idalikepkepna dagiti imana+ ket kanenna ti bukodna a lasag.+
6 Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.+
7 Siak nagsubliak tapno makitak ti kinaubbaw iti baba ti init:
8 Adda ti maysa, ngem awan ti maikadua;+ kasta met isu awanan anak wenno kabsat,+ ngem awan pagnguduan ti isuamin a napinget a panagtrabahona. Kasta met, dagiti met laeng matana saanda a mapnek iti kinabaknang:+ “Ket agpaay iti siasino nga agtartrabahoak a sipipinget ken pagkurkurangek ti kararuak kadagiti naimbag a banag?”+ Daytoy met ket kinaubbaw, ken maysa a makadidigra a pakakumikoman.+
9 Ti dua nasaysayaat ngem iti maysa,+ agsipud ta addaanda ti naimbag a gunggona gapu iti napinget a panagtrabahoda.+
10 Ta no ti maysa kadakuada matuang, daydiay sabali mabalinna a bangonen ti kaduana.+ Ngem kasanonto koma iti agmaymaysa a matuang no awan ti sabali a mangbangon kenkuana?+
11 Mainayon pay, no ti dua agkaiddada, isuda met sigurado a pumudotdanto; ngem kasano a ti agmaymaysa makapagtalinaed a napudot?+
12 Ket no ti asinoman maringbawanna ti agmaymaysa, ti dua a sangsangkamaysa makapagtakderda a maibusor kenkuana.+ Ket ti tinallo a tali saan a nadaras a mapugsat a magudua.
13 Nasaysayaat ti maysa a marigrigat ngem masirib nga ubing+ ngem iti lakayen ngem maag nga ari,+ a saan pay nga umdas ti naammuanna tapno mapakdaaran.+
14 Ta isu rimmuar manipud iti mismo a balay a pagbaludan tapno agbalin nga ari,+ nupay iti panagari daytoy isu nayanak kas bassitan iti sanikua.+
15 Nakitak amin dagidiay sibibiag nga agpagnapagna iti baba ti init, no kasano ti pannakapasamakna iti ubing, nga isu ti maikadua, a tumakder iti lugar ti sabali.+
16 Awan panungpalan dagiti amin nga umili, kadagidiay amin nga iti kasakbayanda isu naadda;+ saanto met nga agrag-o kenkuana dagiti umili kalpasanna,+ ta daytoy met ket kinaubbaw ken panangkamkamat iti angin.+
