2 Corinto 5:1-21
5 Ta ammomi a no ti naindagaan a balaymi,+ daytoy a tolda,+ madadael,+ maaddaankami iti patakder manipud iti Dios, maysa a balay a saan nga inaramid dagiti ima,+ agnanayon+ iti langlangit.
2 Ta iti daytoy a pagnaedan a balay pudno unay nga umasugkami,+ a sipapasnek a tartarigagayanmi nga ikawes daydiay maipaay kadakami manipud langit,+
3 tapno, inton pudno a naikawesmin dayta, saankaminto a masarakan a lamolamo.+
4 Iti kinapudnona, dakami nga adda itoy a tolda umasugkami, a madagdagsenan; agsipud ta kayatmi, saan nga uksoben dayta, no di ket ikawes ti sabali,+ tapno daydiay mortal alimonen koma ti biag.+
5 Ita ti nangpataud kadakami maipaay itoy met laeng a banag isu ti Dios,+ a nangted kadakami iti tanda+ ti banag a dumteng, a dayta ket, ti espiritu.+
6 Agtalgedkami ngarud a kankanayon ket ammomi a, bayat nga agtataengkami iti bagi, awankami iti Apo,+
7 ta magmagnakami babaen ti pammati, saan a babaen ti panagkita.+
8 Ngem agtalgedkami ken maay-ayokami unay imbes a maawankami iti bagi ken makipagtaengkami iti Apo.+
9 Gapuna pagbalbalinenmi met a kalatmi nga, uray makipagtaengkami kenkuana wenno awankami kenkuana,+ makaay-ayokami koma kenkuana.+
10 Ta masapul a maiparangarangtayo amin iti sanguanan ti tugaw iti panangukom ti Kristo,+ tapno tunggal maysa magun-odna ti gunggonana iti bambanag a naaramidan babaen ti bagi, sigun iti bambanag nga inannurotna, uray naimbag wenno nakadakdakes.+
11 Gapuna, yantangay ammomi ti panagbuteng+ iti Apo, itultuloymi a guyugoyen+ dagiti tattao, ngem naiparangarangkamin iti Dios. Nupay kasta, manginanamaak a naiparangarangkami metten kadagiti konsiensiayo.+
12 Saanmi nga irekrekomenda+ manen ti bagbagimi kadakayo, no di ket ipapaayandakayo iti pakagutugotan iti panagpasindayag no maipapan kadakami,+ tapno maaddaankayo iti isungbat kadagidiay mangipaspasindayag iti makinruar a langa+ ngem saan nga iti puso.+
13 Ta no napukawmi koma ti nakemmi,+ maipaay dayta iti Dios; no nasimbeng ti panagpampanunotmi,+ maipaay dayta kadakayo.
14 Ta ti ayat nga adda iti Kristo pilitennakami, agsipud ta isu daytoy ti impatomi, a ti maysa a tao natay maipaay iti isuamin;+ no kasta, ngarud, natay ti isuamin;
15 ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida,+ no di ket agpaay kenkuana+ a natay maipaay kadakuada ken naibangon.+
16 Iti kasta manipud ita awanen ti ammomi a tao sigun iti lasag.+ Uray pay no naammuanmi ni Kristo sigun iti lasag,+ pudno unay nga ita saanen a kasta ti pannakaammomi kenkuana.+
17 Iti kasta no ti asinoman naikaykaysa ken Kristo, isu maysa a baro a parsua;+ naglabasen ti daan a bambanag,+ adtoy! napaaddan ti baro a bambanag.+
18 Ngem amin a bambanag naggapuda iti Dios, a nangikappia+ kadatayo iti bagina babaen ken Kristo ken nangted kadakami iti ministerio+ ti pannakikappia,
19 awan sabali, a ti lubong inkappia ti Dios+ iti bagina+ babaen ken Kristo,+ saanna nga insingir kadakuada dagiti labsingda,+ ket intalekna kadakami ti sao+ ti pannakikappia.+
20 Dakami+ ngarud ket embahador+ a mangisunsuno ken Kristo,+ a kasla agpakpakaasi ti Dios babaen kadakami.+ Kas dagiti suno ni Kristo ipakaasimi:+ “Makikappiakayo iti Dios.”
21 Daydiay saan a nakaammo iti basol+ inaramidna a basol+ maipaay kadakami, tapno agbalinkami koma a kinalinteg ti Dios+ babaen kenkuana.
